ޖުމްހޫރީ ޕާޓީ(ޖޭޕީ)ގެ ކުރީގެ ސެކެޓްރީ ޖެނެރަލް އަދި ރައީސް އޮފީހުގެ މިނިސްޓަރު އަހުމަދު ސަމީރު އާއި އެމްޑަބްލިޔުއެސްސީގެ މެނޭޖިންގ ޑިރެކްޓަރު ޙަސަން ޝާހާއި ޖޭޕީގެ ކުރީގެ ކައުންސިލު މެންބަރުންތަކެއް ވެރިކަންކުރާ މައި ޕާޓީ އެމްޑީޕީއާ ގުޅުނީ ވަޒީފާގެ ބިރާއި ނުފޫޒު އޮތުމުން ކަމުގައި ޤާސިމް އިބްރާހިމްގެ ސްޕެޝަލް އެންވޯއީ އިލްހާމް އަހުމަދު ވިދާޅުވެއްޖެއެވެ.
އިލްހާމް ވިދާޅުވީ ޖޭޕީ ސްލޮޓްތަކުގައި ސަރުކާރުގެ މަޤާމްތަކުގައި ތިއްބެވި ބޭފުޅުން ޖޭޕީ ދޫކޮށް ވަޑައިގަތުމަކީ އާކަމެއް ނޫންކަމަށެވެ. އެއީ މިއަދަކު އެބޭބޭފުޅުން ނިންމެވި ނިންމެވުމެއްވެސް ނޫންކަމަށެވެ. މިދިޔަ ރަމަޟާން މަހުވެސް އެބޭފުޅުން ޖޭޕީ ދޫކުރެއްވިކަމަށް ސަރުކާރު ކޮންޓްރޯލްކުރާ ނޫސްތަކުން ބޮޑެތި ޚަބަރު ހެދި ކަމަށް އިލްހާމް ވިދާޅުވިއެވެ.
ސިޔާސީ މަޤާމްތަކުގައި ތިއްބެވި ބޭފުޅުންގެ ތެރެއިން ބައެއް ބޭފުޅުންނަށް އަދިވެސްދަނީ ވަޒީފާގެ ބިިރާއި، ނުފޫޒް ފޯރުވަމުން. މިކަމަކީ އާ ކަމެއްނޫން. ކުރީގެ ސަރުކާރު ތަކުންވެސް ބަލިކަށިވެ، ގޮތްހުސްވީމަ، ރައްޔިތުން މާޔޫސްކުރުވަން މިފަދަ މީޑިއާ ސްޓަންޓް ޖައްސަވާ.
– އިލްހާމް ވިދާޅުވިއެވެ.
ސަމީރު އާއި ޝާހާއެކު އެމްޑީޕީއަށް ސޮއިކުރެއްވި ބޭފުޅުންގެ ފޯމުތަކާ ހަވާލުވެވަޑައިގަތީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ. މިރަސްމިއްޔާތުގައި އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއީލް ވެސް ބައިވެރިވެވަޑައިގަތެވެ.
މިބޭފުޅުންގެ ފޯމުތައް ހަވާލުކުރުމަށް ބޭއްވި ރަސްމިއްޔާތުގެ ފޮޓޯތަކާއެކު އެމްޑީޕީން ކޮށްފައިވާ ޓްވީޓެއްގައި ބުނެފައިވަނީ ކުރީގެ ކައުންސިލް މެންބަރުން ހިމެނޭގޮތަށް ޖޭޕީގެ ކުރީގެ ގިނަ މެންބަރުންތަކެއް އެމްޑީޕީ އަށް ސޮއިކޮށްފައިވާކަމަށެވެ. މައުލޫމާތު ލިބިފައިވާގޮތުގައި ކުރީގެ ޖޭޕީ މެންބަރުން އެމްޑީޕީއާ ގުޅިވަޑައިގަތީ 50 މީހުންނާއެކުއެވެ.
