ގޯތި ކަށަވަރުކޮށްދިނީއޭ ކިޔާފަ މާލޭގެ ރައްޔިތުންނަށް ގޮތް ދައްކަން ކަރުދާސް ކޮޅެއް ދީގެން ފުއްދާލަން ނުހެއްދެވުމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.
އާޒިމް މިހެން ވިދާޅުވީ ރައީސް ޞާލިހުގެ ވެރިކަމުގެ ދައުރު ހަމަވާން 3 މަހަށް ވެފައި ވަނިކޮށް، މާލޭ ގެ ރައްޔިތުންނަށް ގޯއްޗާއި ފްލެޓް ދޭން ވެފައިވާ ވައުދު ފުއްދުމަށް އަންނަ ހަފްތާގައި ލިސްޓު ޢާންމު ކުރާނެކަމަށް ސަރުކާރުން ބުނުމާއި ގުޅިގެން ކުރެއްވި ޓުވީޓެއްގައެވެ.
އާޒިމް ވިދާޅުވީ ރައީސް ޞާލިހުގެ ވެރިކަމަށް ބާކީ މަދު ދުވަސް ކޮޅެއް އޮއްވައި ގޯއްޗާއި ފުލެޓް ދޭނެކަމަށް ދައްކާ ވާހަކަތަކީ އެއްވެސް ތާކުން ތާކު ނުޖެހޭ ހޮޅި ވާހަކަތަކެއްކަން މާލޭ ރައްޔިތުން ގަބޫލު ކުރާނެކަމަށެވެ. ވެރިކަމުގެ 5 އަހަރު ނިމިގެންދާއިރު ނުދެވުނު ގޯއްޗާއި ފުލެޓް ވެރިކަމުން ފައިބަން މަދު ދުވަސް ކޮޅަކަށް ވެފައި އޮއްވާ ގަނޑުކޮޅެއް ދިއްކޮށްގެން ކުރަން އުޅުމަކީ އޭގެ ނަތީޖާ ގޯސްވާނެ ކަމެއްކަމަށް އާޒިމް ވިދާޅުވިއެވެ.
ވެރިކަން ނިމެން ބާކީ އޮތީ 77 ދުވަސް. ގޯތި ކަށަވަރުކޮށްދިނީއޭ ކިޔާފަ ދެން ދޭނީ ކަރުދާސްކޮޅެއް ނޫން. ކޮބާހޭ މާލޭ މީހުންނަށް ދޭންބުނި ގޯތި؟ 5 އަހަރު ނިމެނީ!
– އާޒިމް ވިދާޅުވިއެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން، މާލޭ ރައްޔިތުންނަށް ޚާއްސަކޮށްގެން ދޫކުރާ ގޯއްޗާއި ފްލެޓަށް އެދި ކުރިމަތިލާން ފުރުޞަތު ހުޅުވާލީ މިދިޔަ އަހަރުގެ ޖޫންމަހުގެ 26 ވަނަ ދުވަހުއެވެ. އަދި ފޯމް ހުށައެޅުމުގެ ސުންގަޑި މިދިޔަ އޮކްޓޯބަރު މަހުގެ 16 ވަނަ ދުވަހަށް ވަނީ ހަމަވެފައެވެ. މާލޭގެ ބޯހިޔާވަހިކަމަށް ހުޅުވާލި ފުރުޞަތުގައި ފްލެޓަށް އެދި 20697 އެޕްލިކޭޝަންވަނީ ހުށައަޅާފައެވެ. އަދި ގޯއްޗަށް އެދި 15164 އެޕްލިކޭޝަން ވަނީ ހުށައަޅާފައެވެ.
މާލޭގެ ގެދޮރުވެރިކަމަށް ބޭނުންވެފައިވާ ގިނަ ބަޔަކު އިންތިޒާރުކޮށްގެން ތިބި އެ ލިސްޓު، މިމަހު އާންމުކުރައްވާނެކަން ސަރުކާރުން ކުރިން ހާމަކުރައްވާފައިވެއެވެ. ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ ތަރުޖަމާން މިޢުވާން މުޙައްމަދު ވިދާޅުވީ، ގޯއްޗާއި ފްލެޓް ލިބޭ މީހުންގެ ލިސްޓް ޢާންމުކުރައްވާނެކަމަށެވެ.
"ގެދޮރުވެރިން" މި ނަމުގައި ސަރުކާރުން ކުރިއަށްގެންދާ ޕްރޮގްރާމުގެ ތެރެއިން މާލޭ ރައްޔިތުންނަށް ގޯއްޗާއި ފްލެޓް ދޫކުރަން ހަމަޖެހިފައިވަނީ ސަރުކާރުގެ "ބިންވެރިޔާ ސްކީމް" އާއި "ގެދޮރުވެރިޔާ" ސްކީމުގެ ދަށުން ހުޅުމާލެއާއި ގުޅީފަޅުންނެވެ. މި ޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓާއި، 3000 ގޯއްޗަށް ކުރިމަތިލުމަށެވެ. މީގެތެރެއިން 1000 ގޯއްޗާއި، 4000 ފްލެޓް ދޫކުރުމަށް ހަމަޖެހިފައިވަނީ ހުޅުމާލެއިންނެވެ. އަދި ބާކީ 2000 ގޯތި ދޫކުރުމަށް ނިންމާފައި ވަނީ ގުޅީފަޅުންނެވެ.
މިހާރު ދިނުމަށް ނިންމާފައިވާ 5000 ގޯތީގެ އިތުރުން މާލެ ސަރަޙައްދުން އިތުރު ގޯތި ދިނުމަށް ނިންމަވާފައިވާކަން މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު ވަނީ އިއުލާންކުރައްވާފައެވެ.
