އިދިކޮޅު ޕީޕީއެމް ޕީއެންސީ ކޯލިޝަނާއި ރައީސް މުހައްމަދު ނަޝީދުގެ އަޑީގައި ހުންނަވައިގެން އުފައްދަން މަސައްކަތް ކުރަމުންދާ "ދަ ޑިމޮކްރެޓްސް" ގުޅިގެން ސިޔާސީ މަސައްކަތް ކުުރުމަށް ރަސްމީ މަޝްވަރާތައް ފަށަން ތައްޔާރުވެއްޖެއެވެ.
މިބައްދަލުވުމުގައި ބައިވެރިވެ ވަޑައިގަންނަވާ ޕީޕީއެމްގެ އިސްބޭފުޅަކު ވިދާޅުވީ މިބައްދަލުވުން ފެށުމަށް ހަމަޖެހިފައިވަނީ މިއަދު 12 ޖަހާއިރުކަމަށެވެ. ބައްދަލުވުމުގައި މަޝްވަރާ ކުރާނީ ދެ ފަރާތުން އެކީގައި ކުރިއަށްދާނެ ގޮތަކާއި، މިހާރުގެ ސިޔާސީ މަސްރަހުގައި ހުރި ކަންކަމުގައި ދެފަރާތުން ގުޅިގެން ކުރެވިދާނެ ކަންކަމާއި ގުޅޭގޮތުންނެވެ.
މިބައްދަލުވުމުގައި ދަ ޑިމޮކްރެޓްސް އުފެއްދުމުގެ ހުއްދަ ނުދީ އިލެކްޝަނުން ހިފަހައްޓާފައިވާތީ އެކަމުގައި ކުރިއަށްދާނެ ގޮތަކާއި ގުޅޭގޮތުންވެސް މަޝްވަރާ ކުރުމަށް ވަނީ ހަމަޖެހިފައެވެ.
ޕީޕީއެމްއާ ގުޅިގެން ސިޔާސީ މަސައްކަތް ކުރުމަށް މިދިޔަ އަހަރު ރައީސް ނަޝީދު ހުށަހެޅުއްވުމާ ގުޅިގެން އޭރު އިދިކޮޅު ކޯލިޝަނުން ވަނީ އެ ހުށަހެޅުމަށް ދެކޮޅު ހަދާފައެވެ. ނަމަވެސް ދަ ޑިމޮކްރެޓްސްއާ ގުޅިގެން ކުރިއަށް ދިއުމަށް މަޝްވަރާ ކުރުމަށް ޖަލުގައި މިވަގުތު ހުންނެވި ޕީޕީއެމްގެ ރައީސް ޔާމީން ހުއްދަ ދެއްވާފައިވާ ކަމަށް ޕީޕީއެމްގެ ބައެއް އިސް ބޭފުޅުންގެ ފަރާތުން މައުލޫމާތު ލިބިފައިވެއެވެ.
އެކުގައި މަސައްކަތްކުރަން ބައްދަލުވުންތައް ބާއްވާއިރު ޑިމޮކްރެޓްސް އިން ވަނީ ރިޔާސީ ކެންޑިޑޭޓަކު ނެރޭނެކަން އިއުލާންކޮށްފައެވެ. އިދިކޮޅުގެ ކެންޑިޑޭޓަކީ ޖަލު ހުކުމެއް ތަންފީޒުކުރައްވާ ކުރީގެ ރައީސް ޔާމީނެވެ. އެމަނިކުފާނުގެ ޖަލު ހުކުމްގެ އިސްތިއުނާފް ހައި ކޯޓުގައި ހިނގާއިރު ވާދަކުރެއްވޭނެ ކަމުގެ ކަށަވަރުކަން ލިބޭނީ ހައި ކޯޓުގެ ހުކުމަށް ފަހުއެވެ.
ޑިމޮކްރެޓްސްގެ އަމާޒަކީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ދެ ވަނަ ދައުރެއް ކަށަވަރުވިޔަ ނުދިނުމެވެ. އެ މަގްސަދުގައި ޖުމްހޫރީ ޕާޓީއާ އެކު ވެސް ކޯލިޝަން ހަދަން މަޝްވަރާތައް ބޭއްވިއެވެ. ނަމަވެސް އެކަން ވާނީ ކޮޅެއްގައި ނުޖެހި ނިމިފައެވެ.
