ކުރިއަށް އޮތް ރިޔާސީ އިންތިޚާބު އެއްބުރުން ކާމިޔާބު ކުރުމުގެ ފުރުސަތު ރައީސް އިބްރާހިމް މުހައްމަދު ޞާލިހު ހޯއްދަވާފައިވާކަމަށް ޔޫތު މިނިސްޓަރ އަހުމަދު މަޚުލޫފް ވިދާޅުވެއްޖެއެވެ.
މިނިސްޓަރ މަޚުލޫފް މިހެން ވިދާޅުވީ އެމްޑީޕީގެ 18 ވަނަ އަހަރީ ދުވަހުގެ ތަހުނިޔާ އެމްޑީޕީގެ އާންމު މެމްބަރުންނަށާއި އިސް ލީޑަރު ރައީސް ޞާލިހަށް ފޮނުއްވައި ކުރެއްވި ޓުވީޓުގައެވެ.
މަޚުލޫފް ވިދާޅުވީ ސިޔާސީ މަސްރަހު މިހާރު އަތުރެމުންދާ ގޮތަށްބަލާއިރު ފެނިގެންދަނީ ރައީސް ޞާލިހަށް އެއްބުރުން ރިޔާސީ އިންތިޚާބު ކާމިޔާބު ކުރެވޭ ތަންކަމަށެވެ. ގިނަ ކެނޑިޑޭޓުން ވާދަކުރާ ރިޔާސީ އިންތިޚާބެއްގައި އެއްބުރުން އިންތިޚާބު ކާމިޔާބު ކުރާނެ ހުރިހާ ޖާގައެއް ރައީސް ޞާލިހު ތަނަވަސް ކޮށްފައިވާކަމަށް މަޚުލޫފް ވިދާޅުވިއެވެ.
އެމްޑީ.ޕީގެ އަހަރީ ދުވަހުގެ ތަހުނިޔާ ޕާޓީގެ އިސްލީޑަަރު ރައީސް އިބްރާހިމް މުހައްމަދު ޞާލިހާއި ޗެއަރޕާސަން ފައްޔާޒު އިސްމާއިލް އަދި އެންމެހާ މެންބަރުންނަށް އަރިސްކުރަން. ސިޔާސީ މަޝްރަހުގައި މިއަދު ކުޅިބައި އެތުރެމުން ދާގޮތަށް ބަލާއިރު، ގިނަ ކެނޑިޑޭޓުން ވާދަކުރާ ރިޔާސީ އިންތިހާބެއް، ފުރަތަމަ ފަހަރަށް އެއްބުރުން ކާމިޔާބު ކުރެއްވުމުގެ ފުރުސަތު މިވަނީ ރައީސް ޞާލިހު ހޯއްދަވާފައި. އެމްޑީޕީއަށް 18 އަހަރު ފުރިގެން ދާއިރު މިއީ ހޯދިފައިވާ ވަރަށް ބޮޑު ކާމިޔާބެއް.
– މަޚުލޫފް ވިދާޅުވިއެވެ.
މަޚުލޫފް މިހެން ވިދާޅުވެފައިވާއިރު ރައީސް ސޯލިހުވެސް ވަނީ ކުރިޔަށް އޮތް ރިޔާސީ އިންތިހާބުގައި އަދާލަތު ޕާޓީ އާއި އެމްޑީއޭއާއެކު އިންތިހާބު އެއްބުރުން ކާމިޔާބު ކުރެވޭނެ ކަމަށް ވިދާޅުވެފައެވެ.
ރިޔާސީ އިންތިހާބުގައި އެ ތިން ޕާޓީ ގުޅިގެން ރަނގަޅު މަސައްކަތްތަކެއް ކުރެވޭނެ ކަމަށާއި މިހާތަނަށް ދެކެވުނު ވާހަކަތަކާއެކު އަމާޒަކީ އެއްބުރުން އިންތިހާބު ކާމިޔާބު ކުރުން ކަމަށް އެމަނިކުފާނު ވިދާޅުވިއެވެ.
