ސަރުކާރުގެ "ބިންވެރިޔާ" މަޝްރޫޢުގެ ދަށުން ދޫކުރާ ގޯއްޗަށް އެދި ހުށަހެޅި ފަރާތްތަކުގެ ތެރެއިން 10314 މީހަކަށް ގޯތި ލިބޭނެކަމަށް ހައުސިން މިނިސްޓަރ މުޙައްމަދު އަސްލަމް ވިދޅުވެއްޖެއެވެ.
މި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ ގޯތި ލިބޭ މީހުންގެ ލިސްޓު ގެޒެޓްކުރެއްވުމަށްފަހު، 15 ޖުލައިއާ ހަމައަށް އެ ލިސްޓަށް ޝަކުވާ ހުށަހެޅުމުގެ ފުރުޞަތު އޮންނާނެކަމަށެވެ. އަދި އެ މުއްދަތު ހަމަވުމުން ގޯތި ލިބޭ މީހުންގެ ދާއިމީ ލިސްޓް އާއްމުކުރައްވާނެކަމަށެވެ. މިނިސްޓަރ އަސްލަމް ވަނީ ފްލެޓާއި ގޯތި ލިބޭ ފަރާތްތައް ކަނޑައެޅުމުގައި ކޮމެޓީން ކުރެއްވި މަސައްކަތްތަކުގައި އެއްވެސް ފަރާތެއްގެ ނުފޫޒެއް ނުފޯރުވާކަމުގެ ޔަޤީންކަން ދެއްވާފައެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވަޢުދުފުޅާ އެއްގޮތަށް ފުރަމާލެއިން ގޯތިލިބޭ ފަރާތްތަކުގެ ވަގުތީ ލިސްޓު ސަރުކާރުން އިއްޔެ ވަނީ ޢާއްމުކުރައްވާފައެވެ.
ފްލެޓާއި ގޯތި ލިބޭ މީހުންގެ ވަގުތީ ލިސްޓު އިޢުލާންކުރެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ބައްދަލުވުމުގައި އެ މަސައްކަތްކުރިއަށްގެންދެވި ކޮމިޓީން ވިދާޅުވީ، ގޯއްޗަށް އެދި ހުޅުވާލި ފުރުޞަތުގައި 15164 ފޯމް ހުށަހެޅިކަމަށާއި އެއީ 23088 މީހުންކަމަށެވެ. އޭގެތެރެއިން 12794 ފޯމު ޝަރުތު ހަމަވާކަމަށާއި، އޭގެ ތެރޭގައި ޝަރުތު ހަމަވާ 19857 މީހުން ހިމެނޭކަމަށް އެ ކޮމިޓީން ވިދާޅުވިއެވެ. އޭގެތެރެއިން މިފަހަރު ދޫކުރައްވާ 5000 ގޯތި 10314 މީހަކަށް ލިބޭކަމަށްވެސް އެ ކޮމިޓީން ވިދާޅުވެއެވެ.
ކޮމިޓީން ވިދާޅުވީ، ޝަރުތު ހަމަވާ 19857 މީހުންގެ ތެރެއިން މިފަހަރު ގޯތި ނުލިބުނަސް، 9544 މީހަކު ގޯއްޗަށް ޝަރުތު ހަމަވާކަމަށެވެ. އަދި އެ ފަރާތްތަކުން އިތުރު މީހަކާއި ނުވަތަ ބަޔަކާއި ގުޅިގެން ފޯމް ހުށަހެޅުއްވުމުން ގޯތި ލިބުމުގެ ފުރުޞަތު ބޮޑުވާނެކަމަށްވެސް ކޮމިޓީން ވިދާޅުވެއެވެ. ކޮމެޓީން ހިއްސާކުރެއްވި މަޢުލޫމާތައް ބަލާއިރު ބިންވެރިޔާ ސްކީމަށް ހުށަހެޅި ފަރާތްތަކުގެ ތެރެއިން ޝަރުތު ހަމަނުވަނީ 2370 ފޯމެކެވެ. އެއީ ޖުމްލަ 3231 މީހެކެވެ.
މިފަހަރު ދޫކުރައްވާ 5000 ގޯއްޗަކީ ހުޅުމާލެއާއި ގުޅީފަޅުން ދޫކުރެއްވުމަށް ހަމަޖެހިފައިވާ ގޯއްޗެވެ. އޭގެތެރެއިން 1500 އަށްވުރެ ގިނަ ގޯތި ހުޅުމާލެއިން އަދި ބާކީހުރި ގޯތިތައް ދޫކުރުމަށް ހަމަޖެހިފައިވަނީ ގުޅީފަޅާއި ގިރާވަރު ފަޅު ހިއްކައިގެނެވެ.
މި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ، ގޯތީގެ ސައިޒު ހުންނާނީ އެޕްލިކަންޓުގެ ޢަދަދަށް ބަލައިގެންކަމަށެވެ. އެގޮތުން ގިނަ ބޭފުޅުންގެ ނަމުގައި ހުންނަ ފޯމްތަކަށް ލިބޭ ގޯތީގެ ސައިޒު، އެންމެ ބޭފުޅެއްގެ ނަމުގައި ހުށަހަޅުއްވާ ފޯމަށް ލިބޭ ގޯއްޗަށް ވުރެ ބޮޑުވާނެކަމަށެވެ.
ގޯތީގެ ބޮޑުމިން ކަނޑައަޅާނެ އުޞޫލު:
- ގޯތީގެ އެންމެ ކުޑަ ސައިޒަކީ 1250 އަކަފޫޓު
- އިތުރަށް ބައިވެރިވާ ކޮންމެ މީހަކަށް 400 އަކަފޫޓު ގޯތީގެ ބޮޑުމިނަށް އިތުރުކުރެވޭ
- 7 މީހުންނަށްވުރެ ގިނަ މީހުން ބައިވެރިވާނަމަ 4000 އަކަފޫޓުގެ ގޯއްޗެއް
ގޯތި ލިބޭ މީހުންގެ ވަގުތީ ލިސްޓު މިހާރު ޢާއްމުކުރައްވާފައިވާއިރު، ގޯތިނުލިބޭ ފަރާތްތަކަށް ގޯތިނުލިބޭކަން ގެދޮރުވެރިން ޕޯޓަލް މެދުވެރިކޮށް ސަބަބާއެކީ ފެންނަން ހުންނާނެކަމަށް ފްލެޓާއި ގޯތީ ދޫކުރުމުގެ ކަންކަން ކުރިއަށްގެންދަވާ ކޮމެޓީން ވިދާޅުވެއެވެ.
