އަޟްޙާ ޢީދުގެ މުނާޞަބަތުގައި ސަލްޓަން ޕާކުގައި ކުޑަކުދިންގެ ހަވީރެއް ބާއްވައިފިއެވެ.
ސަލްޓަން ޕާކުގައި މި ހަވީރު ކުރިއަށްގެންގޮސްފައިވަނީ މިއަދު ހަވީރު 16:00 އިން 18:00 އަށެވެ. މި ހަވީރަކީ މާލޭ ސިޓީ ކައުންސިލާއި ފެސްޓިވޯ އިންސްޓިޓިއުޓް ގުޅިގެން ކުރިއަށްގެންދިޔަ ހަރަކާތެކެވެ.
މި ކުޑަކުދިންގެ ހަވީރުގައި ކުރެހުމާއި ކުލަޖެއްސުމާއި، މިނޫންވެސް ފަންނުވެރި ކަމާއި ގުޅޭ ޙަރަކާތްތަކުގައި ބައިވެރިވުމުގެ ފުރުޞަތު އެކި ޢުމުރުފުރާގެ ކުދިންނަށް ދީފައިވެއެވެ. މި ހަވީރުގެ މަޤްޞަދަކީ އާރޓް އެންޑް ކްރާފްޓްގެ ދާއިރާއަށް ކުޑަކުދިން އަހުލުވެރި ކުރުވުމާއެކު މާލެ ސިޓީގައި ދިރިއުޅޭ ހުރިހާ ކުޑަކުދިންނަށް ޢާއިލާ އާއެކު އަޟްޙާ ޢީދު އުފާވެރި ޢީދެއްގޮތުގައި ފާހަގަކުރުންކަމަށް ސިޓީ ކައުންސިލުން ވިދާޅުވިއެވެ.
މި ހަވީރު ކުރިއަށްދިޔަ ވަގުތު ގިނަ ޢަދަދެއްގެ ކުދިންވަނީ ކުރެހުމާއި ފަންނުވެރި އެކި ހަރަކާތްތަކުގައި ބައިވެރިވެފައެވެ.
ޢީދު ފާހަގަކުރުމުގެ ގޮތުން ޢީދު ނަމާދަށްފަހު ސަލްޓަންޕާކު ސަރަޙައްދުގައި ދިރާގާއި މާލެ ސިޓީ ކައުންސިލް ގުޅިގެން ޢީދު ސަޔެއް ބާއްވާފައިވާއިރު، އުރީދޫ އާއި މާލެސިޓީ ކައުންސިލް ގުޅިގެން އުސްފަސްގަނޑު ސަރަޙައްދުގައި އުޟްހިޔާ ކަތިލުމުގެ ޚާއްސަ ހަރަކާތެއްވެސް ކުރިއަށްގެންގޮސްފައިވެއެވެ.
