ޢީދު ކުޅިވަރު ސިޔާސީކުރުން އެއީ ރަނގަޅު ކަމެއް ނޫން ކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖު ޔުމްނާ މައުމޫން ވިދާޅުވެއްޖެއެވެ.
އެ ކަމަނާ މިއަދު ކުރެއްވި ޓްވީޓެއްގައި ވިދާޅުވެފައިވަނީ، ޢީދަކީ ރަށުގެ ކުދިބޮޑު އެންމެން އެއްވެ އުފާފާޅުކޮށް ސަގާފީ ކުޅިވަރާއި ޒަމާނީ ކުޅިވަރުގެ ތެރެއިން އިޖުތިމާޢީ ރޫޙު އާލާ ކުރާ ދުވަސްވަރެއްކަމަށާއި ޢީދު ކުޅިވަރު ސިޔާސީކުރުން އެއީ ރަނގަޅު ކަމެއް ނޫން ކަމަށެވެ.
އެކަމަނާ އެފަދައިން ވިދާޅުވެފައިވަނީ، ގިނަ ރަށްރަށުގައި ޢީދުގެ ތިންވަނަ ދުވަހު މާލި ނެރުމުގެ ޙަރަކާތްތައް ކުރިއަށް ގެންގޮސްފައިވާއިރު، މާލޭގައި މާލި ނެރުމުގެ ސިޔާސީ ހަރަކާތެއް އިދިކޮޅު ޕީޕީއެމް/ޕީއެންސީން ކުރިއަށް ގެންގޮސްފައިވާތީ، އެކަމަށް އިޝާރާތް ކުރައްވައެެވެ.
ޢީދަކީ ރަށުގެ ކުދިބޮޑު އެންމެން އެއްވެ އުފާފާޅުކޮށް ސަގާފީ ކުޅިވަރާއި ޒަމާނީ ކުޅިވަރުގެ ތެރެއިން އިޖުތިމާޢީ ރޫޙު އާލާ ކުރާ ދުވަސްވަރެއް. ޢީދު ކުޅިވަރު ސިޔާސީކުރުން އެއީ ރަނގަޅު ކަމެއް ނޫން. https://t.co/gO258OOkOx
— Yumna Maumoon 🇲🇻 🤝🇵🇸 (@yumna_maumoon) June 30, 2023
ރާއްޖޭގައި އިންޑިއާ ސިފައިން ތިބުމާ ދެކޮޅަށް ކުރިއަށް ގެންދިޔަ އެ ހަރަކާތުގައި "އިންޑިއާ އައުޓް ހަރަކާތް" ގައި އިންޑިއާގެ ބޮޑުވަޒީރު ނަރެންދުރާ މޯދީއާއި ރައީސް އިބްރާހީމް މުހައްމަދު ސޯލިހުގެ ސިފަގެނައުމަށް ތައްޔާރުކޮށްފައިވާ "މާލި"ތަކެއް ނެރެފައިވެއެވެ. ސަރުކާރާ ދެކޮޅަށް އިދިކޮޅުން ތައްޔާރުކޮށްފައިވާ ލަވަތައް އަޑުގަދަކޮށް ޖަހާފައިވެއެވެ.
ސަގާފީ ތަރިކަތައް ހިމާޔަތްކޮށް އަންނަން އޮތް ޖީލުތަކަށް ފޯރުކޮށްދިނުމަކީ އެންމެންގެ ޒިންމާއެއް ކަމަށް މީގެ ކުރިން އެތައް ފަހަރެއްގެ މަތިން މިނިސްޓަރ ޔުމްނާ ވަނީ ވިދާޅުވެފައެވެ، ތައުލީމީ ބިންގާ އަޅާއިރު ކުޑަކުދިންނަށް ސަގާފީ ތަރިކަތައް އެނގެން ޖެހޭ ކަމަށް، މިނިސްޓަރ ފާހަގަކުރައްވަމުން ގެންދަވާފައިވެއެވެ.
