އީދު ކުޅިވަރުތަކުގައި ވެސް ހެދުން އެޅުމުގެ ވަކި މިންގަނޑުތަކެއް ގެންގުޅެއް ޖެހޭ ކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
ޔުމްނާ ވިދާޅުވީ އީދަކީ ރަށުގެ ކުދި ބޮޑު އެންމެން އެއްވެ އުފާ ފާޅުކޮށް ސަގާފީ ކުޅިވަރާއި ޒަމާނީ ކުޅިވަރުގެ ތެރެއިން އިޖުތިމާއީ ރޫހު އާލާކުރާ ދުވަސްވަރެއް ކަމަށެވެ.
އެހެންކަމުން ހެދުން އެޅުމުގައި ވަކި މިންގަނޑެއް ގެންގުޅުމުގެ މުހިންމުކަން މިނިސްޓަރު ފާހަގަ ކުރެއްވިއެވެ.
"އީދު ކުޅިވަރުގައި ވެސް އެހެނިހެން ކުޅިވަރުތަކުގައި ވެސް ހެދުން އެޅުމުގެ ކޮންމެވެސް ކަހަލަ މިންގަނޑުތަކެއް ހުންނަން ޖެހޭ" މިނިސްޓަރ ޔުމްނާގެ ޓުވީޓުގައި ވެއެވެ.
މައުލޫމާތު ލިބިފައިވާ ގޮތުގައި ބުރުގާ އަޅައިގެން ނިވާކަން ކުޑަ ގޮތެއްގައި ޝޯއެއް ބާއްވާފައިވަނީ ގއ. ވިލިނގިލީގައެވެ.
ޖޫން 29 ވަނަ ދުވަހުގެ ރޭ ބޭއްވި މި ޝޯގެ ވީޑިއޯތަކެއް މީސްމީޑިއާގައި ދައުރުވަމުން އަންނައިރު، އެ ވީޑިއޯއިން ތިން އަންހެނަކު ނަށާ މަންޒަރު ފެނެއެވެ. އޭގެ ތެރެއިން ބުރުގާ އަޅައިގެން ތިބީ ދެ އަންހެނުންނެވެ.
