ރާއްޖޭގެ ވެރިކަން ކުރާ ރަށް ފުރަމާލެ ތަރައްގީ ކުރީ ހުރިހާ އަތޮޅުތަކުގެ ތަރައްގީ ގުރުބާންކޮށްފައި ކަމަށް ކުރީގެ ބަންޑާރަނައިބު އަލްއުސްތާޒާ އާޒިމާ ޝުކޫރު ވިދާޅުވެއްޖެ އެވެ.
އާޒިމާ މިފަދައިން ވިދާޅުވެފައިވަނީ ހުޅުމާލޭގެ ދެވަނަ ފިޔަވަހީގައި ކުރީ ސަރުކާރުން ހަދާފައިވާ ހިޔާ ފްލެޓުތަކަށް ކުލި ދައްކަމުންދާއިރު، ހުޅުމާލެގެ އަގުބޮޑެތި ބިންތައް ސަރުކާރުގެ "ބިންވެރިޔާ" ސްކީމުގެ ދަށުން ގޯތި ދޫކުރާ އުސޫލުން މަދުބަޔަކަށް ހިލޭ ދޭން ނިންމުމާ ގުޅިގެން ފާޅުކުރަމުންދާ ޝުޢޫރަށް ބިނާކުރައްވައި، ފޭސްބުކުގައި ލިޔުއްވި ޕޯސްޓެއްގައެވެ.
މާލެ އާއި އަތޮޅުތަކުގެ މެދުގައި އޮންނަ ބައިބައިވުން ބޮޑުވެ މާލޭގައި ދިރިއުޅުމަށް އޮތް "ޑިމާންޑު" ބޮޑުވެގެން ދިޔައީ ހަމައެކަނި މާލެ ތަރައްގީ ކުރުމުން ކަމަށް އާޒިމާ ވިދާޅުވިއެވެ.
އަދި މާލެ ތަރައްގީކުރީ އަތޮޅުތެރޭގެ ތަރައްގީ ޤުރުބާންކޮށްފައި ކަމަށާއި، އެކަމުގެ ސަބަބުން ބޯހިޔާވަހިކަން ކަށަވަރުކޮށްދިނުމުގެ މަސައްކަތް ސަރުކާރުން ކުރާއިރު، ސަރުކާރުން ގެންގުޅޭ ސިޔާސަތުތަކުގައި ތަފާތުކުރުންތައް ގެންގުޅޭނަމަ، އެއީ އޭގެ ސަބަބުން މިހާރު އުފެދިފައިވާ ބައިބައިވުންތައް އަދި އިތުރަށް ބޮޑުވެގެންދާނެ ކަމެއްކަމަށް އާޒިމާ ވިދާޅުވިއެވެ.
އާޒިމާ ވިދާޅުވީ ހުރިހާ ދިވެހިންނަކީ ވެސް ހަމަހަމަ ބައެއް ކަމަށާއި، ސަރުކާރުގެ ސިޔާސަތުތަކުގައި ވެސް ރައްޔިތުންގެ މެދުގައި ތަފާތުކުރުންތަކެއް ގެންގުޅެގެން ނުވާނެކަމަށް އާޒިމާ ވިދާޅުވިއެވެ.
