ކޮންމެ މީހަކަށް ސިމް ބަލައިގަނެވޭ އަދަދު ލިމިޓްކޮށް، އެ މަސައްކަތް ކުރިޔަށް އޮތް ދެ ހަފްތާގެ ތެރޭގައި ފަށާނެ ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން ވިދާޅުވެއްޖެއެވެ.
ރާއްޖޭގައި ހިންގާ ފައިސާގެ ސްކޭމްތައް އިތުރުވެފައިވާ މިދަނޑިވަޅުގައި، އެ ސްކޭމްތައް މަދުކުރުމުގެ ގޮތުން، ކޮންމެ މީހަކަށް ގަނެވޭ ސިމްގެ އަދަދު ލިމިޓް ކުރުމަށް ކޮމިއުނިކޭޝަން އޮތޯރިޓީން ހަދަން ޖެހޭ ގަވައިދު 15 ދުވަސް ތެރޭ ނިންމަން މިދިޔަ އޭޕްރިލް މަހު ފަހުކޮޅު ރައްޔިތުންގެ މަޖިލީހުން އަންގަވާފައިވެއެވެ.
މައުލޫމާތު ލިބިފައިވާ ގޮތުގައި، މިކަމާ ބެހޭގޮތުން ކޭމްއިން ގިނަ ސްޓޭކް ފަރާތްތަކަކާއެކު މަޝްވަރާތަކެއް ކުރިއަށް ގެންގޮސް، މިކަމާ ބެހޭ ޓެކްނިކަލް މައުލޫމާތު އެއްކޮށްފައިވެއެވެ. އަދި ކުރިޔަށް އޮތް ދެ ހަފްތާގެ ތެރޭގައި މަސައްކަތް ނިންމައި ތަންފީޒު ކުރަން ފަށާނެ ކަމަށް ކޭމްއިން ހާމަ ކުރައްވައެވެ.
އެ އިދާރާއިން ވިދާޅުވެފައިވަނީ، ކޮންމެ މީހަކަށް ގަނެވޭނެ ސިމްގެ އަދަދާ މެދު މިހާރު އެއްބަސްވުމަކަށް އާދެވިފައިވާ ކަމަށާއި، ނަމަވެސް އަންނަ ކަންކަމަށް ބަލައި، ފަހުން އެ އަދަދަށް ބަދަލު އައިސްދާނެތީ އަދި އެ އަދަދު ހާމަ ކުރަން ބޭނުން ނުވާ ކަމަށެވެ.
ސްކޭމްތައް އިތުރުވަމުން އައިސްފައިވާ ކަމަށް ބެލެވޭ އެއްކަމަކީ، ގިނަ ސިމްތަކެއް އެއްވެސް ހައްދެއްނެތި ދޫކޮށްފައިވުން ކަމަށް މިކަމުގެ ޓެކްނިކަލް ބޭފުޅުން ހާމަކުރައްވައެވެ. އަދި ސިމް ލިމިޓް ކުރަން ފަށާއިރު މިހާރު ވެސް އެންމެ މީހެއްގެ ނަމުގައި އެތައް ސިމްތަކެއް ނަގާފައި ހުރުމަކީ މިކަމަށް އޮތް ވަރަށް ބޮޑު ނުރައްކަލެއް ކަމަށްވެސް އެފަރާތްތަކުން ވިދާޅުވެއެވެ.
ބޭންކުތަކުންނާއި އެނޫން ގޮތް ގޮތުން އޮޅުވާލައިގެން ފައިސާގެ މުޢާމަލާތްތައް ހިނގަގަމުންދާ މި ދަނޑިވަޅުގައި މިފަދަ ފިޔަވަޅެއް އެޅިގެން ދިޔުމަކީ މުހިއްމު ކަމެކެވެ. ރާއްޖޭޭގައި މި ފަހަކަށް އައިސް ހިނގާފައިވާ ބޮޑެތި ސްކޭމްތަކުގައި ނުދަންނަ މީހެއްގެ ނަމްބަރުން މީހުންނަށް ގުޅައި އޮޅުވާލައިގެން ގިނަ އަދަދެއްގެ ފައިސާ ވަނީ އަތުލައިފައި ވާއިރު، މިފަދަ ކަންކަމުގެ އެންމެ އަޑީގައި ތިބީ ޖަލުތަކުގައި ތިބި މީހުންކަން މޯލްޑިވްސް ޕޮލިސް ސާވިސްއިން މީގެ ކުރިން ހާމަކޮށްފައިވެއެވެ.
