އެމްޑީޕީގެ ވެރިކަން 2018 ގައި ފެށުނުއިރު، ޖެމްސް ނިޒާމު އޮތީ އައިސީޔޫގައި ކަމަށް، އިންފޮމޭޝަން ޓެކްނޮލޮޖީ މިނިސްޓަރު އާމިނަތު ޝައުނާ މިއަދު ވިދާޅުވެއްޖެއެވެ.
"ވަންގަވް" ލޯންޗުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ޝައުނާ ވިދާޅުވީ ސަރުކާރުގެ އެއް އިދާރާއަކުން އަނެއް ތަނަކަށް ފޮނުވާ ސިޓީތައް ޑްރާފްޓްކޮށް ނުފޮނުވި ދެ ތިން ދުވަސް ފާއިތުވެދާނެ ކަމަށާއި، އެކަމުގެ ޝަކުވާތައް އެކި ފަރާތްތަކުން ދިޔައީ ހިއްސާކުރަމުން ކަމަށެވެ.
2010 ވަނަ އަހަރު ލޯންޗުކުރި ޖެމްސް އޮތީ، މި ސަރުކާރު އައިއިރު އައިސީޔޫގައި ކަމަށާއި، އެހެންކަމުން، އެކަމަނާ މިނިސްޓަރު ކަމާ ޙަވަލުވެވަޑައިގަތުމަށްފަހު، އެންމެ އިސްކަންދެއްވި އެއް ކަމަކީ ސަރުކާރަށް ފޮނުވާ ސިޓީތަކަށް އަވަހަށް ޖަވާބު ދިނުމުގައި ލުއި ފަސޭހަތަކެއް ހަމަޖައްސައިދިނުން ކަމަށް ޝައުނާ ވިދާޅުވިއެވެ.
ޝައުނާ ވިދާޅުވީ އިދާރާތަކަށް ފޮނުވާ ސިޓީތައް، މިނިސްޓަރުންނަށް ޖެމްސް އިން ފަސޭހައިން ފެންނާކަށް ނުހުންނަ ކަމަށާއި، އެ ސިސްޓަމަށް އަލަށް ގެނައި ބަދަލަކީ، މިނިސްޓަރުން އަދި ތަންތަނުގެ ވެރިންނަށް، އެ މިނިސްޓްރީ ނުވަތަ އިދާރާއެއްގެ މުވައްޒަފުންނަށް ހަވާލުކޮށްފައި ހުންނަ މަސައްކަތްތައް އަދި ޖަވާބުދޭ މިންވަރު ބެލޭނެ ގޮތަށް ކަމަށެވެ.
މިނިސްޓަރު ވިދާޅުވީ އެ ތަނުގެ އަމާޒަކީ ސަރުކާރުގެ 400 އެއްހާ އިދާރާ، ޖެމްސްގެ އާ ނިޒާމުގެ ތެރެއަށް ވައްދައި ގުޅުވާލުން ކަމަށެވެ.
ޖެމްސް އަދި އާއްމުންނަށް ހިދުމަތް ދޭ "ވަންގަވް" އާއެކު ޑިޖިޓަލް ރާއްޖެއަކަށް ދާއިރު މައުލޫމާތުގެ ރައްކާތެރިކަމަށް ވިސްނަންޖެހޭ ކަމަށާއި، ސައިބަ ސެކިއުރިޓީ ބިލް ޑްރާފްޓް ކުރުމުގެ މަސައްކަތްކުރާއިރު، ޑޭޓާ ޕްރައިވެސީ އަދި ޕްރޮޓެކްޝަން ބިލަށް އާއްމުންގެ ހިޔާލު ހޯދަން ވަނީ ފަށައިފައި ކަމަށްްވެސް މިނިސްޓަރ ވިދާޅުވިއެވެ.
ޑިޖިޓަލް ރާއްޖެއަށް ހެދުމަށް ކުރާ މަސައްކަތް ފުރިހަމަވެގެންދާނީ، ކަމާގުޅޭ ގާނޫނުތައް އައިސްގެން ކަމަށްވެސް ވިދާޅުވިއެވެ.
