ކުރީގެ ރައީސް ޔާމީންގެ އިސްތިއުނާފީ މައްސަލަ ބައްލަވާ ހައި ކޯޓުގެ ދެ ފަނޑިޔާރަކު ޗުއްޓީ ނެންގެވުމުން މި މަސް ތެރޭގައި ދެން އެ މައްސަލާގެ އަޑުއެހުމެއް ބޭއްވޭނެ ކަމުގެ އުއްމީދު ގެއްލިއްޖެއެވެ.
އިދިކޮޅު ރިޔާސީ ކެނޑިޑޭޓް ރައީސް ޔާމީން އިންތިޚާބުގައި ވާދަ ކުރެއްވުމަށްޓަކައި ކުރަމުންދާ މަސައްކަތަށް މީގެ ސަބަބުން ބިޑު ހުރަހެއް އެޅިގެންދާނެއެވެ. އިންތިޚާބުގައި ކުރިމަތިލުމަށް މިމަހުގެ 23 ވަނަ ދުވަހު ހުޅުވާލާނެއެވެ.
ހައި ކޯޓުން މިއަދު ބުނި ގޮތުގައި ފަނޑިޔާރު ހުޒެއިފާ ހުންނެވީ މެޑިކަލް ޗުއްޓީއެއް ނަންގަވައިގެންނެވެ. ކުރިން އޮތް ގޮތުން މި ހަފުތާ އަށް ވެސް ޔާމީންގެ މައްސަލާގެ އަޑުއެހުންތަކެއް ތާވަލުކޮށްފައި އޮތެވެ. ނަމަވެސް، މި ޗުއްޓީއާ އެކު އެ އަޑުއެހުންތައް ވަނީ ފަސްކުރަން ޖެހިފައެވެ.
އޭގެތެރެއިން މި މަހުގެ 15 ވަނަ ދުވަހުން ފެށިގެން ފަނޑިޔާރު ސަލީމް ޗުއްޓީ އަށް ވަޑައިގަންނަވާ ގޮތަށް ވަނީ ހަމަޖެހިފައެވެ. މި ޗުއްޓީއަކީ ޖުޑީޝަލް ސާވިސް ކޮމިޝަނުން މިހާރު އަމަލު ކުރަމުން އަންނަ، ދުރާލާ ޗުއްޓީތައް ނެގުމުގެ އުސޫލުގެ ދަށުން މިދިޔަ އަހަރުގެ ޑިސެމްބަރު މަހު ހުށަހަޅާފައިވާ ޗުއްޓީއެކެވެ.
ހައިކޯޓުގައި ކުރިއަށްދާ ރައީސް ޔާމީންގެ މައްސަލަތަކަކީ ތިން ފަނޑިޔާރުންގެ ބެންޗަކުން ބައްލަވާ މައްސަލަތަކެއްް ކަމަށް ވާތީ އެއްވެސް ޝަރީއަތުގެ އަޑުއެހުމެއް ބޭއްވޭނީ ތިން ފަނޑިޔާރުން ހާޒިރުވެ ތިއްބަވައިގެންނެވެ. ހައިކޯޓުގައި އޮތް މައްސަލައިގެ ހުކުމް އިއްވުމުގެ ކުރިން އަދި މަދުވެގެން ދެއަޑުއެހުން ބާއްވަން ޖެހޭނެ ކަމަށް ލަފާކުރެވެއެވެ.
ސެޕްޓެމްބަރ މަހު އޮންނަ ރިޔާސީ އިންތިހާބުގައި ވާދަކުރުމުގެ ފުރުސަތު އިލެކްޝަންސް ކޮމިޝަނުން މިމަހު ފަހުކޮޅު ހުޅުވާލާނެއެވެ. އިންތިހާބަށް ކުރިމަތިލުމުގެ އެންމެ ފަހު ތާރީޚަކަށް ވާނީ އޮގަސްޓް މަހުގެ 07 ވަނަ ދުވަހެވެ.
