ޕްރޮގްރެސިވް ކޯލިޝަނުން ޤާސިމާއި ބައްދަލުކޮށްފި

އިދިކޮޅު ޕްރޮގްރެސިވް ކޯލިޝަނުން ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމާއި ބައްދަލު ކޮށްފިއެވެ.

މިބައްދަލުވުމުގައި ޖޭޕީގެ ފަރާތުން ބައިވެރިވީ ޤާސިމާއި، ނިހާނެވެ. އަދި ޕްރޮގްރެސިވް ކޯލިޝަނުން ބައިވެރިވީ ކޯލިޝަން މިވަގުތު ހިންގުމާއި ހަވާލުވެ ހުންނެވި އަބްދުއްރަހީމާއި، ފަރެސްމާތޮޑާ ދާއިރާގެ މެމްބަރު ހުސެއިންނާއި، ޕީޕީއެމްގެ ނައިބް ރައީސް ޝިޔާމްއާއި، މަހިބަދޫ ދާއިރާގެ މެމްބަރު އަހުމަދު ތޯރިގެވެ.

މިބައްދަލުވުމުގައި މަޝްވަރާ ކޮށްފައިވަނީ ގައުމުގައި ހުރި ބޮޑެތި މައްސަލަތަކާ ގުޅޭގޮތުން ރައީސް ޔާމީނުގެ ލަފާފުޅާ އިރުޝާދުގެ މަތިން ޖޭ.ޕީގެ ލީޑަރ ޤާސިމާއި އެކު މިއަދުވަނީ މަޝްވަރާ ބައްދަލުވުމެއް ބޭއްވިފައިވާކަމަށެވެ. ނަމަވެސް މިބައްދަލުވުމުގެ ތަފްސީލެއް ނުދެއްވައެވެ.

ގައުމުގައި ހުރި ބޮޑެތި މައްސަލަތަކާ ގުޅޭގޮތުން ޕީޕީއެމް ގެ ރައީސް @prz_ymn ގެ ލަފާފުޅާ އިރުޝާދުގެ މަތިން، ޕްރޮގްރެސިވް ކޮންގްރެސް ކޯލިޝަން އިން ވަނީ، ޖުމްހޫރީ ޕާޓީގެ @JPSecretariat ގެ ލީޑަރ އޮނަރަބަލް @qasimibrahim އާއި އެކު މިއަދު މުހިންމު ބައްދަލުވުމެއް ބޭއްވިފައި. pic.twitter.com/eofY5G7YUB

— Abdul Raheem Abdulla (@Banafsaa) July 11, 2023

ސެޕްޓެމްބަރ މަހު އޮންނަ ރިޔާސީ އިންތިހާބުގައި ވާދަކުރުމުގެ ފުރުސަތު އިލެކްޝަންސް ކޮމިޝަނުން މިމަހު ފަހުކޮޅު ހުޅުވާލާނެއެވެ. އިންތިހާބަށް ކުރިމަތިލުމުގެ އެންމެ ފަހު ތާރީޚަކަށް ވާނީ އޮގަސްޓް މަހުގެ 07 ވަނަ ދުވަހެވެ.

ރައީސް ޔާމީންގެ އިސްތިއުނާފު މައްސަލައަށް ފަނޑިޔާރުންގެ ޗުއްޓީގެ ސަބަބުން އިތުރު ހުރަހެއް ކުރިމަތިވެފައި ވާއިރު އިންތިހާބުގައި ވާދަކުރުމަށް އޮންނަ މުއްދަތު ހަމަވުމުގެ ކުރިން ރައީސް ޔާމީންގެ ޖަލު ހުކުމް ހައިކޯޓުން ބާތިލް ނުކޮށްފިނަމަ ރިޔާސީ އިންތިހާބުގައި ވާދަކުރުމުގެ ފުރުސަތު އެމަނިކުފާނަކަށް ނުލިބޭނެއެވެ.