މިއަހަރު ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިހާބަށް އެމްޑީޕީއިން ވޯޓުލާން ފަށާނީ އެއް ލައްކަ ވޯޓާއެކު ކަމަށް ރައީސް އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އިއްޔެ ކ.ގުރައިދޫގައި ބޭއްވި ކެމްޕެއިން ހަރަކާތުގައި ވާހަކަފުޅު ދައްވަމުންނެވެ. އެމްޑީޕީ އަކީ އެންމެ ބޮޑު ކޯލިޝަން ކަމަށާއި އިންތިހާބު ކާމިޔާބު ކުރަން ހަމަކޮށްލަން އޮތީ ކުޑަ ކުޑަ މިންވަރެއް ކަމަށް ރައީސް ވިދާޅުވިއެވެ.
"މާލެ އަތޮޅުން އެކަނި ވެސް އިރާދަކުރެއްވިއްޔާ ނިންމޭނެ. ރާއްޖެއަށް ބޭނުންވަނީ ތަރައްގީ. ތަރައްގީއަކީ ހިތަށް ފިނިކަން ލިބުން،"
ރައީސް ވިދާޅުވިއެވެ.
ރައީސް އިތުރަށް ވިދާޅުވީ، އުފާވެރި ދިރިއުޅެއް ހޯދުމަށް ބޭނުންވާ ތަރައްގީ ގެނެސްދެނީ އެމްޑީޕީއިން ކަމަށާއި ރާއްޖޭގެ ހުރިހާ ރަށަކަށް ބޭނުންވާ ތަރައްގީ ގެނެސްދިނުމަށް މުހިއްމު ގިނަ މަސައްކަތްތަކެއް ކުރަމުން އަންނަ ކަމަށެވެ.
އެމަނިކުފާނު ވިދާޅުވީ، ގުރައިދޫ ދާއިރާގެ މެޖޯރިޓީ އަންނަ ރިޔާސީ އިންތިހާބުގައި ލިބޭނެ ކަމުގެ ޔަގީންކަން އެބަ އޮތް ކަމަށާއި، ގުރައިދޫގެ ބިން ހިއްކި ރައްޔިތުންނަށް ގޯތި ދެވޭނެ ގޮތް ހައްދަވާ ދެއްވާނެކަމަށެވެ. ނަމަވެސް، ލާމަރުކަޒީ ގާނޫނުގެ ދަށުން ރަށްރަށުގެ ގޯތި ދިނުމުގެ ކަންކަން ކުރަން ޖެހެނީ ކައުންސިލުން ކަމަށާއި އެކަން ނުކޮށް އޮތުމަކީ ހިތާމަ ކުރައްވާ ކަމެއް ކަމަށެވެ.
މި ޖަލްސާގައި ގުރައިދޫ ކައުންސިލަށް، ރައީސް ޞާލިޙް ވަނީ ވަރަށް ބޮޑަށް ފާޑު ވިދާޅުވެ، ރައްޔިތުންނަށް ބޭނުންވާ ކަންކަން ނުކޮށްދީ، އެކަން ހުއްޓުވަން ޖާގަ ނުދެއްވާނެ ކަމަށް ވިދާޅުވެފައެވެ.
