މިއަހަރުގެ ހައްޖުގެ މަތިވެރި އަޅުކަން އަދާކުރަން މައްކާއަށް ދިޔަ ޙައްޖުވެރިންގެ އެންމެ ފަހު ގްރޫޕް އިއްޔެ ރާއްޖެ އަތުވެއްޖެއެވެ.
މިއަދު ރާއްޖެއައި ހައްޖުވެރިންގެ އެންމެ ފަހު ގްރޫޕަށް ވެލާނާ އިންޓަނޭޝަނަލް އެއާޕޯޓުން މަރުހަބާ ވިދާޅުވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ. ފައިސަލް ނަސީމްވެސް ވަނީ ސަރުކާރުގެ އިސް މަންދޫބެއްގެ ގޮތުގައި މިއަހަރު ޙައްޖަށް ވަޑައިގަންނަވާފައެވެ.
1444 ވަނަ އަހަރު ޙައްޖުގެ މަތިވެރި އަޅުކަން ނިންމުމަށްފަހު، ދިވެހި ޙައްޖުވެރިންގެ ފުރަތަމަ ގްރޫޕް މި މަހުގެ 7 ވަނަ ދުވަހުގެ ހެނދުނު ރާއްޖެ އައިސްފައިވާއިރު ރާއްޖެއައި ފުރަތަމަ ގްރޫޕްގައި ހިމެނެނީ އަލް މަނާސިކް ޕްރައިވެޓް ލިމިޓެޑްގެ ހަވާލުގައި ޙައްޖަށްދިޔަ ޙައްޖުވެރިންނެވެ.
ރާއްޖެ އައުމަށްޓަކައި ހައްޖަށްދިޔަ ދެވަނަ ގްރޫޕްވެސް އެދުވަހު ރާއްޖެއަންނަން ފުރިއިރު މިއީ މޯލްޑިވްސް ޙައްޖު ކޯޕަރޭޝަން ލިމިޓެޑްގެ ހަވާލުގައި ޙައްޖަށްދިޔަ ޙައްޖުވެރިންނެވެ.
ތިންވަނަ ފްލައިޓު ޖުލައި 10 ވަނަ ދުވަހު އައިސްފައިވާއިރު، އެ ފްލައިޓުން އައީވެސް ޙައްޖު ކޯޕަރޭޝަންގެ ޙަވާލުގައި ދިޔަ ޙައްޖާޖީންގެ ގްރޫޕެކެވެ. ޖުލައި 11ވަނަ ދުވަހު ސިސިލްފަރު ޙައްޖު އެންޑް ޢުމްރާ ގުރޫޕު އަދި ޖުލައި 12ވަނަ ދުވަހު އަލްޙަރަމައިން ޙައްޖު އެންޑް ޢުމްރާ ގުރޫޕުގެ ޙަވާލުގައިދިޔަ ހައްޖާޖީންވަނީ ރާއްޖެ އައިސްފައެވެ.
މި އަހަރު ޙައްޖަށް މީހުން ގެންދިޔައީ އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑާއި ސިސިލްފަރު ޙައްޖު އެންޑް ޢުމްރާ ޕްރައިވެޓް ލިމިޓެޑްގެ އިތުރުން އަލްމަނާސިކް ޕްރައިވެޓް ލިމިޓެޑުންނެވެ. މި ތިން ކުންފުންޏަށް ވެސް 90 ކޯޓާ އިސްލާމިކް މިނިސްޓްރީން ދީފައިވެއެވެ.
