ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހީމްގެ އަރިހަށް ޒިޔާރަތްކުރައްވައި، ޖުމްހޫރީ ޕާޓީގެ ލިޑާރ ޤާސިމް އިބްރާހީމަށް ވަރަށް ބޮޑަށް ތައުރީފް ކުރައްވައި ކުރީގެ ޓޫރިޒަމް މިނިސްޓަރު އަލީ ވަހީދު ވާހަކަދައްކަވައި، ޤާސިމުގެ ކެމްޕެއިންގައި މަސައްކަތްކުރައްވާނެ ކަމުގެ އިޝާރާތެއް ޢަލީ ވަހީދު ކުރައްވައިފިއެވެ.
އޭނާގެ މައްޗަށް އުފުލި ޖިންސީ ގޯނާގެ ދައުވާތައް ކުރިއަށް ނުގެންދިއުމަށް ދައުލަތުން ނިމިދިޔަ ޖޫން މަހު 14 ގައި ވަނީ ނިންމުމާ ގުޅިގެން މިދިޔަ އަންގާރަ ދުވަހު އޭނާ ވަނީ ތިން އަހަރަށް ފަހު އެނބުރި ރާއްޖެ ވަޑައިގެންފައެވެ.
ޤާސިމުގެ ކެމްޕެއިންގައި މަސައްކަތްކުރައްވާނެ ކަމުގެ އިޝާރާތެއް ކުރައްވަމުން، ގާސިމްގެ އަރިހަށް ޒިޔާރަތް ކުރުމަށް ފަހު ދިން އިންޓަވިއުއެއްގައި ޢަލީ ވިދާޅުވީ، ސިޔާސީ ދާއިރާގައި އަބަދުވެސް އެންމެ ބޮޑު މަދަދުގާރަކީ ގާސިމް ކަމަށާއި، އިނގިރޭސިވިލާތަށް އަރުވާލެވިގެން ހުންނެވި ތިން އަހަރު ތެރޭގައި ކޮންމެ ދުވަހަކު ވެސް "އިރު އަރަނީ ގާސިމްގެ ހެޔޮ އެދުންތަކާއެކު" ގައި ކަމަށެވެ.
"މިދިޔަ ހިތްދަތި ދުވަސްތަކަށް ފަހު، އުފާވެރިކަމެއް ލިބުމުން އެންމެ ފުރަތަމަ މަރުހަބާ ކިޔުއްވީ ވެސް ގާސިމް،" އަލީ ވިދާޅުވިއެވެ.
ސިޔާސީ މުސްތަޤްބަލާ މެދު ވާހަކަ ދައްކަވަމުން ގާސިމަށް ތާއީދު ކުރައްވާނެ ވާހަކަ ސީދާ ޢަލީ ވަހީދު ވިދާޅުވެފައެއް ނުވެއެވެ. ނަމަވެސް އަލީ ވިދާޅުވީ އަދިވެސް ހުންނެވީ ޖުމްހޫރީ ޕާޓީގެ މެންބަރެއްގެ ގޮތުގައި ކަމަށާއި މި މަހުގެ 20 ގެ ފަހުން ދާއިރާއިން ފެނިގެންދާނެ ކަމަށެވެ.
ޢަލީ ވަހީދު ވިދާޅުވީ،
"އަޅުގަނޑު ދެކޭ ގޮތުގައި ކުރިއަށް ދާއިރު އަޅުގަނޑުމެންގެ ތަފާތުވާނެ މާ ބޮޑު ހިޔާލެއް ނުހުންނާނެ، އެއީ ވަރަށް ތުރާތަކާއެކު އުނދަގުލުގައި އެކުގައި ތިބި ބައެއް އަޅުގަނޑުމެންނަކީ،"
އަލީ ވަހީދަށް ކުރެވޭ ޖިންސީ ގޯނާގެ ވާހަކަތައް ގަބޫލުނުކުރެވޭ ކަމަށް މީގެ ކުރިން ވެސް ވިދާޅުވެފައިވާ ގާސިމް މިއަދުވެސް ވިދާޅުވީ އެއީ ސިޔާސީ ގޮތުން ބަޔަކު ރާވައިގެން، އަލީ ފްރޭމް ކުރުމަށް ކުރި ކަމެއް ކަމަށެވެ.
ކޮވިޑުގައި އެންމެ އިސްކޮށް މަސައްކަތް ކުރެއްވި މިނިސްޓަރަކީ އަލީ ވަހީދުކަމަށާއި، އަލީ ވަހީދަށް ދިމާވީ "ހަސަދަވެރިންގެ އެތިފަހަރެއް" ކަމަށް ވިދާޅުވެ ޢަލީ ވަހީދަށް ތައުރީފް ކުރެއްވިއެވެ.
އަލީ ވަހީދުގެ މައްސަލަ އަނބުރާ ގެންދިއުމުން އެންމެ ފުރަތަމަ މަރުހަބާ ވިދާޅުވީ ވެސް ގާސިމެވެ.
