މި އަހަރު ގެފުޅުގެ އުރަކޮޅު ބަދަލުކުރުން ޖުލައި 18 ވާ އަންގާރަ ދުވަހު ބާއްވާގޮތަށް ހަމަޖައްސައިފިއެވެ. އެއީ ހިޖްރީގޮތުން 1444 ޒުލްޙިއްޖާ މަހުގެ 29 ވަނަ ދުވަހެވެ.
މިހާރު ހަމަޖެހިފައިވާ ގޮތުން އެދުވަހުގެ އިޝާ ދަމާދަށްފަހު، މިހާރުގެ އުރަކޮޅު ބާލައި، އައު އުރަކޮޅު އަރުވާނެއެވެ.
ޢަރަބި ބަހުން ގެފުޅުގެ އުރަކޮޅަށް ކިޔަނީ، ކިޝްވާއެވެ.
ކޮންމެ އަހަރެއްގެ ވެސް ހައްޖު ދުވަހާ ދިމާކޮށް ގެފުޅުގެ އުރަކޮޅު ބަދަލުކުރަމުންދެއެވެ. މިކަމަށް ޚާއްސަ ޓީމަކުން މިހާރުވެސް ގެންދަވަނީ އުރަކޮޅު ބަދަލުކުރުމުގެ ރަސްމިއްޔާތަށް ތައްޔާރުވަމުންނެވެ.
ގެފުޅުގެ އުރަކޮޅުގައި ގެފުޅުގެ ހަތަރު ފަރާތުގައި ހަރުކުރާ ހަތަރު ގަނޑު ފޮއްޗާއި، ގެފުޅުގެ ދޮރުކޮޅުގައި ހަރުުކުރާ ފަރުދާއެވެ.
ގެފުޅުގެ އުރަކޮޅު ބަދަލު ކުރާއިރު ކޮންމެ ފަރާތަކުން ވެސް ވަކި ފޮތިގަނޑެއް ގެފުޅުގެ މައްޗަށް އަރުވައެވެ. އެއަށްފަހު، މަތީ ކައިރީގައި ހަރުކުރުމަށްފަހު، އުރަކޮޅު މަތިން ވައްޓާލައެވެ.
ހަތަރުފަރާތުން އުރަކޮޅު ވައްޓާލުމަށްފަހު ހަތަރު ފަރާތުގެ ފޮތިގަނޑު އެއް ފޮތިގަނޑު އަނެއް ފޮތިގަނޑާ ގުޅާލަނީ ތިނޯހުން ފަހައިގެންނެވެ. ގެފުޅުގެ އުރަކޮޅު ހެދުމާއި އެރުވުމުގެ މަސައްކަތުގައި ހަރަކާތްތެރިވެލައްވާނީ، އެކަމަށް ޚާއްޞަ ފަންނީ މަސައްކަތްތެރީންނެވެ.
ގެފުޅުގެ އުރަކޮޅު ތައްޔާރު ކުރުމަށް 670 ކިލޯގެ މޮޅު ފަށުވި އާއި 120 ކިލޯގެ ރަން ބަރަންޏާއި، 100 ކިލޯގެ ރިހި ބަރަނި ބޭނުން ކުރާ ކަމަށް މަޢުލޫމާތު ލިބެއެވެ.
މިފަހަރު އައު އުރަކޮޅު މިއަރުވަނީ ޙައްޖު މޫސުން ނިމުމުންނެވެ. އެހެންނަމަވެސް އާންމުކޮށް ބަދަލުކުރަމުން އައިސްފައިވަނީ ޙައްޖުގެ އަޅުކަން ކުރާ ދުވަސްވަރުއެވެ. އެދުވަސްވަރު އުރަކޮޅު އަޅުވާނަމަ، އައުރަކޮޅު ބަދަލުކުރުމަށްފަހު ހައްޖުގެ އަޅުކަން ނިމެންދެން އުރަކޮޅު ވަކިހިސާބަކަށް ބަހައްޓައެވެ. މީގެ ބޭނުމަކީ ހައްޖުވެރިން ތަވާފުގެ އަޅުކަން އަދާކުރާއިރު، އުރަކޮޅަށް ލިބިދާނެ ގެއްލުމަކުން ސަލާމަތްކުރުމެވެ. އަދި ކިސްވާގެ ތިރީ ކައިރީގައި ޙައްޖުވެރިންގެ އިޙުރާމު ސިފަވާ ގޮތަށް ހުދު ފޮތި ގަނޑެއް ވެސް ދަމައެވެ.
