މޯލްޑިވްސް އިސްލާމިކް ބޭންކް (އެމްއައިބީ) ގެ ބިޒްނަސް ސެންޓަރ، ކުރީގެ ރައީސް އަލްއުސްތާޒް މައުމޫން ޢަބްދުލްޤައްޔޫމް މިއަދު ހުޅުއްވައިދެއްވައިފިއެވެ.
މިއަދު ހަވީރު ހ. މެރައިން ޑްރީމްގައި އޮތް ރަސްމިއްޔާތެއްގައި، އެމްއައިބީ ބިޒްނަސް ސެންޓަރ ރަސްމީކޮށް ހުޅުއްވައިދެއްވައި ރައީސް މައުމޫން ދެއްކެވި ވާހަކަފުޅުގައި، އެ ސެންޓަރ ހުޅުވުމުގެ ރަސްމިއްޔާތަށް ދަޢުވަތު ދެއްވިކަމަށްޓަކައި، ސީއީއޯ މިސްޓަރ މުފައްދަލް އިދްރީސް ޚުމްރީއަށާއި، ޑިރެކްޓަރުންގެ ބޯޑަށާއި، ސީނިއަރ މެނޭޖްމަންޓަށް ޝުކުރުއަދާކުރައްވައި، 2011 ވަނަ އަހަރު އެމްއައިބީ ރާއްޖޭގައި ޤާއިމުކުރެވުނުފަހުން، ކަސްޓަމަރުންނާ ގާތުން ފުރިހަމަ ޚިދުމަތެއް ދެއްވާފައިވާކަން ފާހަގަކުރެއްވިއެވެ.
އަދި އެ ބޭންކުގެ ޚިދުމަތް ފުޅާކުރައްވައި، ރީޓެއިލް އަދި ކޯޕަރޭޓިވް ޚިދުމަތްތަކާއެކު ބޭންކުން ފެންވަރު ރަގަޅު ޚިދުމަތްތަކެއް ފޯރުކޮށްދެއްވައި، މިއަދު ހުޅުވުނު ބިޒްނަސް ސެންޓަރ މެދުވެރިކޮށް އެއްލައްކައަށްވުރެ ގިނަ ކަސްޓަމަރުންނަށް ޚިދުމަތް ފޯރުކޮށްދިނުމަށް އެޅުއްވި މުހިއްމު ފިޔަވަޅަކީ ތާރީޚީ ކާމިޔާބެއް ކަމުގައި ރައީސް މައުމޫން ވިދާޅުވިއެވެ.
އެމްއައިބީގެ ޝެއަރހޯލްޑަރުންގެ ގޮތުގައި 16،000 އާންމު ރައްޔިތުންނަށް ފުރުޞަތު ފަހިކޮށްދެއްވާފައިވާކީ ވަރަށް ބޮޑު ފަޚުރެއްކަމުގައި ފާހަގަކުރައްވަމުން، މިއަދު ހުޅުވުނު ބިޒްނަސް ސެންޓަރުގެ ޚިދުމަތް ކާމިޔާބުކަމާއެކު ކުރިއަށް ގެންދަވައި، ކަސްޓަމަރުންނަށް ފަހި ޚިދުމަތްތަކެއް ފޯރުކޮށްދެވިގެންދާނެ ކަމަށް އުއްމީދުކުރައްވާ ކަމުގައިވެސް ރައީސް މައުމޫން ވިދާޅުވިއެވެ.
އެ ބޭންކުގެ ސީއީއޯ އަދި މެނޭޖިންގ ޑިރެކްޓަރ މިސްޓަރ މުފައްދަލްގެ ދެއްކެވި ވާހަކަފުޅުގައި، 2011 ވަނަ އަހަރުން ފެށިގެން އެ ބޭންކުން ހޯއްދަވާފައިވާ ކާމިޔާބީތައް ފާހަގަކުރައްވަމުން، ރާއްޖޭގެ 5 އަތޮޅެއްގައި 6 ބުރާންޗެއްގެ ޚިދުމަތް ފޯރުކޮށްދެމުންދާ ދާކަމަށާއި، އިސްލާމިކް ޕްރިންސިލްއާ އެއްގޮތަށް މިއަދާ ހަމައަށް އެ ބޭންކުން ދެވޭ ޚިދުމަތްތައް ބައްޓަންކުރެވިގެންދާ ކަން ފާހަގަކުރެއްވިއެވެ. އަދި ރައީސް މައުމޫން އެ ރަސްމިއްޔާތުގައި ބައިވެވަޑައިގެންދެއްވައި، ބިޒްނަސް ސެންޓަރ ހުޅުއްވައިދެއްވި ކަމަށްޓަކައި ރައީސް މައުމޫނަށް ޝުކުރު އަދާކުރެއްވިއެވެ.
މި ރަސްމިއްޔާތުގައި، އެމްއައިބީގެ ފަރާތުން ރައީސް މައުމޫނަށް ހަނދާނީ ފިލައެއް ވަނީ އަރުވާފައެވެ. ހަނދާނީފިލާ އެރުވީ އެ ބޭންކްގެ ސީއީއޯ މިސްޓަރ މުފައްދަލްއެވެ.
އެ ބޭންކުން ހާމަކުރައްވާފައިވާ ގޮތުގައި، މިއަދު ހުޅުވުނު ބިޒްނަސް ސެންޓަރުގައި ބިޒްނަސް ލައުންޖެއް ޤާއިމުކުރެވިފައިވާއިރު، ކާޑް ކަލެކްޝަން ސެންޓަރުގެ ޚިދުމަތާއި އޭޓީއެމް/އީސީއާރްއެމްގެ ޚިދުމަތް ލިބިވަޑައިގަންނަވާނެއެވެ. އަދި އެ ސެންޓަރުން ކަސްޓަމަރުންނާ ވީހާވެސް ގާތުން، އަވަސް ޚިދުމަތެއް ފޯރުކޮށްދެއްވާނެ ކަމަށް އެ ބޭންކުން ވިދާޅުވިއެވެ.
މި ރަސްމިއްޔާތުގައި، ރައީސް މައުމޫނުގެ އަރިހުގައި އެމްއާރްއެމްގެ ރައީސް އަޙްމަދު ފާރިސް މައުމޫން ވަނީ ބައިވެވަޑައިގަންނަވާފައެވެ. އަދި އެ ބޭންކުގެ ޑިރެކްޓަރުންގެ ބޯޑުގެ މެންބަރުންނާއި، އިސްވެރިންނާއި، ގިނަ އަދަދެއްގެ މުވައްޒަފުން ބައިވެރިވެވަޑައިގެންނެވިއެވެ.
