ވަގު ޑޮލަރުތަކެއް ބޭނުންކޮށްގެން އޮޅުވާލައިގެން ބިދޭސީއެއްގެ އަތުން އައިފޯނެއް ނެގި މީހަކު ހަތް މަހާއި 24 ދުވަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
ސ. ހިތަދޫ، އިރަމާގެ، ހުސެއިން ޒައިދާންގެ މައްޗަށް މި ދައުވާ ކޮށްފައިވަނީ، މެއި 11، 2023 ވަނަ ދުވަހުއެވެ. އެކަން ހިނގާފައިވަނީ، ފޯނު ވިއްކުމުގެ ވިޔަފާރި ކުރާ ބިދޭސީއަކަށް ގުޅައި އައިފޯން 13 ޕްރޯ މެކްސްއެއް ގަންނަން އޯޑަރު ދީ، އޭގެ އަގަށްވާ 1000 ޑޮލަރު ދެއްކާނެ ކަމަށް ބުނެއެވެ. އެހެންކަމުން އެ ދައުވާ އުފުލާފައިވަނީ، އެ ބިދޭސީ މީހާއަށް އޮޅުވާލައިގެން އެ އަދަދަށް ވާ ވަރަށް ސައްހަ ނޫން ޑޮލަރު ނޫޓުތަކެއް ދީފައިވާ ކަމަށް ބުނެއެވެ.
އެ މައްސަލައިގައި އޭނާގެ މައްޗަށް ދައުލަތުން މަކަރާއި ހީލަތުގެ ދައުވާ އުފުލިއެވެ. އަދި ކްރިމިނަލް ކޯޓުގައި ޒައިދާން ވަނީ ދައުވާއަށް އިއުތިރާފުވެފައެވެ.
ގާނޫނުލްއުގޫބާތުގައި، މަކަރާއި ހީލަތުގެ ކުށުގައި ހިމެނޭ މުދަލުގެ އަގު 5000ރ.އަށް ވުރެ މަތިވާ ނަމަ އެ ކުށް ވާނީ ޖިނާއަތުގެ ފަސް ވަނަ ދަރަޖައިގެ ކުށަކަށެއްގެ ގޮތުގައި ކަނޑައަޅާފައިވެއެވެ. އަދަބުގެ އަސާސީ މިންގަނޑަކީ ނުވަ މަހާއި 18 ދުވަހަށް ޖަލަށްލުން ކަމުގައިވެސް އޮވެއެވެ.
މައްސަލަ ބެއްލެވުމަށްފަހު، ކްރިމިނަލް ކޯޓުގެ ގާޒީ އިބްރާހިމް ޒިހުނީ ހުކުމްކުރެއްވީ، ޒައިދާންގެ އިއުތިރާފުުން ކުށް ސާބިތުވާތީ އޭނާ 9 މަހާއި 18 ދުވަހަށް ޖަލަށްލުމަށެވެ. އެ ހުކުމް އިއްވާފައިވަނީ މިދިޔަ ބުރާސްފަތި ދުވަހުއެވެ.
ހުކުމުގައިވަނީ، އޭނާ މި މައްސަލައާ ގުޅިގެން ބަންދުގައި ހޭދަ ކުރި އެއް މަހާއި 24 ދުވަހުގެ މުއްދަތު ޖަލު އަދަބުން އުނިކުރުމުން ތަންފީޒު ކުރަން ޖެހޭނީ ހަތް މަހާއި 24 ދުވަސް ކަމަށެވެ.
