ކުރީގެ ރައީސް އަދި ޕީޕީއެމްގެ ރިޔާސީ ކެނޑިޑޭޓް ޢަބްދުﷲ ޔާމީން ޢަބްދުލްޤައްޔޫމްއަށް އިންސާފު ލިބުން ލަސްވުމުގެ ޒިންމާ ރައީސް އިބްރާހިމް މުހައްމަދު ޞާލިހް އުފުލަން ޖެހޭނެ ކަމަށާއި އަނިޔާވެރިކަން ކަމަށް ޕީޕީއެމްގެ ނާއިބު ރައީސް އަދި ގުރައިދޫ ދާއިރާގެ މެންބަރު މުހައްމަދު ޣައްސާން މައުމޫން ވިދާޅުވެއްޖެއެވެ.
"ރައީސް ޔާމީންއަށް އިންސާފް ލިބުން ލަސްވުމުގެ ޒިންމާ ރައީސް ޞާލިހް އުފުއްލަވަން ޖެހޭނެ. އަނިޔާވެރިކަން ހުއްޓުވޭނީ ރައީސްއާ ހިސާބުން."
ޣައްސާން ވިދާޅުވިއެވެ.
ވ. އާރަށް ކުއްޔަށް ދޫކުރި މައްސަލައިގައި ޔާމީންގެ މައްޗަށް ރިޝްވަތު ނެންގެވުމާއި، މަނީ ލޯންޑަރިންގެ ކުށް ސާބިތުވެ، ކްރިމިނަލް ކޯޓުން މިދިޔަ ޑިސެމްބަރު 25 ވަނަ ދުވަހު ވަނީ އެމަނިކުފާނުގެ މައްޗަށް 11 އަހަރު ދުވަހުގެ ޖަލު ހުކުމެއް އިއްވާފައެވެ. އެ ހުކުމް ޔާމީންގެ ފަރާތްޕުޅުން ހައި ކޯޓުގައި އިސްތިއުނާފްކޮށްފައިވާއިރު، އެ މައްސަލައިގައި އިސްތިއުނާފީ ޝަރީއަތް ހިނގަމުންދާތާ ދުވަސްތަކެއް ވަނީ ވެފައެވެ.
