"ބިންވެރިޔާ" ސްކީމްގެ ދަށުން މާލެ ސަރަހައްދުން ގޯތި ދޫކުރެވުނުއިރު، ގޯތި ނުލިބުނު މީހަކު އެ މައްސަލަ ހައިކޯޓަށް ހުށަހަޅައިފިއެވެ.
އޭނާއަށް ގޯތި ނުލިބޭނެ ކަމަށް ހައުސިން މިނިސްޓްރީން ބަޔާންކުރާ ސަބަބުގެ ލިޔުމުގައި ހަވާލާދީފައިވަނީ ގޯތި ދިނުމުގެ އުސޫލުގައި މާލެ ރައްޔިތެއްކަން ބެލުމުގެ މިންގަނޑުގައި ބަޔާން ކޮށްފައި ނެތް އިބާރާތަކަށް ކަމަށާއި، ގޯތި ލިބުމަށް ޝަރުތު ހަމަނުވި ސަބަބުގެ ގޮތުގައި މިނިސްޓްރީން ދީފައިވާ ޖަވާބުގައި ހިމެނޭ އިބާރާތަކީ އުސޫލުގައި ނުހިމެނޭ އިބާރާތެއް ކަމުގައި ކަނޑައަޅައި ދިނުމަށާއި އެ އުސޫލު މަނާކޮށްދިނުމުގެ އިތުރަށް، އޭނާއަށް ގޯތި ނުލިބޭ ކަމަށް މިނިސްޓްރީން ކަނޑައަޅާފައިވަނީ އުސޫލާ ހިލާފަށް ކަމަށް ކަނޑައަޅައިދިނުމަށް އޭނާ ހުށަހެޅި މައްސަލައިގައި ބަޔާންކޮށްފައިވެއެވެ.
މާލެ ރައްޔިތެއްކަން ބެލުމުގެ މިންގަނޑު ބަޔާންކޮށްފައިވާ އުސޫލުގެ 11 ވަނަ މާއްދާގެ ހ. ގައި ބުނާ ގޮތުން "އެ މީހެއްގެ މަންމަ ނުވަތަ ބައްޕައަކީ މާލެ ރައްޔިތަކަށް ވެފައި ސަރުކާރުން ހިންގާފައިވާ ސިޔާސަތެއްގެ ސަބަބުން ނުވަތަ ކަނޑައެޅިފައިވާ އުސޫލުގެ ސަބަބުން އެހެން ތަނެއްގައި ރަޖިސްޓްރީ ޖެހުމަށް ފަހު މިހާރު މާލޭގެ ރަޖިސްޓްރީގައިވާނަމަ އެ މީހަކު ބަލާނީ މާލޭގެ ރައްޔިތެއްގެ ކަމުގަ" އެވެ.
ހައުސިން މިނިސްޓްރީން އެފަރާތަށް ދިން ޖަވާބުގައިވަނީ، އެމީހާއަކީ ކުރިން އެހެން ރަށެއްގައި ރަޖިސްޓްރީވެފައިވާ މީހެއް ކަމަށާއި އޭނަގެ މައިންބަފައިންނަކީވެސް މާލެއަށް އުފަން މީހުން ކަމެއް އެމިނިސްޓްރީއަށް ކަށަވަރުވެފައިނުވާ ކަމަށެވެ.
އެ މައްސަލަ ބަލައިގަތުމާ މެދު ހައިކޯޓުން މިހާތަނަށް ގޮތެއް ނިންމާފައެއް ނުވެއެވެ.
މާލެ ސަރަހައްދުން ގޯތި ލިބޭ މީހުންގެ ލިސްޓަށް 800 ޝަކުވާ ހުށަހަޅާފައިވެއެވެ. އެ ޝަކުވާތައް ދިރާސާ ކުރުމުގެ މަސައްކަތް ކުރިއަށްދާ ކަމަށް މަޢުލޫމާތު ލިބެއެވެ.
ކިޔުންތެރިންގެ ޚިޔާލުތައް:
ރަނގަޅު އިންސާފު ލިބޭނެ ކަމަށް އުންމީދު ކުރަން
ރަނގަޅު އިންސާފު ލިބޭނެ ކަމަށް އުންމީދު ކުރަން އަދި އިންސާފު ދެއްވާ ފަރާތެއްވެއެވެ.