ސައުދީއަރަބިއްޔާއަކީ ހަނަފަސް ސަހަރާއެއްގެ ގޮތުގައި މީގެ ކުރިން ސިފަކުރަމުން އައިސްފައިވެއެވެ. އެތަނުގެ ބިމަކީ އެއްވެސް ދިރުމެއްނެތް ތަނެއްގެ ގޮތުގައި ޒަމާނުއްސުރެ ފާހަގަކުރަމުން އައިސްފައިވެއެވެ. ގަހެއް ރުކެއް ނެތް، ދިރުމެއް ނުވާ ތަނަކަށް ސައުދީވެގެން ގޮސްފައިވަނީ ކީއްވެހެއްޔެވެ؟
އެ ޤައުމަކީ ހޫނުގަދަ ޤައުމެއްގެ ގޮތުގައި އަބަދުވެސް ފާހަގަވެއެވެ. ޙައްޖުވެރިންނާއި ޢުމުރާވެރިންނަށް އެ ބިމަށް ގޮސް އެނބުރި އައުމަށްފަހު، ވާހަކަތައް ކިޔައިދޭއިރު އެތަނުގެ ހޫނަގަދަ ކަމުން އުނދަގޫވާ ވާހަކައާއި، ހިރަފުސްކަމާހެދި މާހައުލު ތަޣައްޔަރުވެފައި ހުންނަ ކަމަށް ފާހަގަކުރަމުންދެއެވެ. އާންމު ގޮތެއްގައި އެ ޤައުމުގެ ފިނިހޫނު މިން ހުންނަނީ 27 ޑިގްރީ ސެލްސިއަސް އާއި 43 ޑިގްރީ ސެލްސިއަސްއާ ދެމެދުގައެވެ. އެހެންކަމުން، އެ ޤައުމަކީ ގިނަ ދުވަސްދުވަހު ހޫނު ގަދަ ޤައުމެއްގެ ގޮތުގައި ފާހަގަކުރެވެއެވެ.
ހައްޖާއި އުމުރާއަށް ގޮސް އުޅޭއިރު ހޫނުގަދަ ކަމުން ފިނިކުރުމަށްޓަކައި، ޒަމްޒަމްފެން ބޮލަށް އަޅައި ހޫނުގަނޑު މައިތިރިކުރެއެވެ. ގިނަގިނައިން ޒަމްޒަމް ފެން ބޮއި ހޫނުގެ ސަބަބުން ވާ ވަރުބައްޔާއި ކަރުހިއްކުން ފިލުވާލައެވެ. މާމަމެން ކާފަމެން ކިޔައިދޭ ވާހަކަތަކުން އެނގޭ ގޮތުގައި، އެބިމުން ކަނދުރު ނޫން އެއްޗައް ދަނޑުވެރިކަމުން ލިބެމުން ގޮސްފައެއް ނުވެއެވެ.
ކޮންމެއަކަސް، ސައުދީގެ ހަނަފަސް ކަމާހެދި އެ ޤައުމުގައި ގަސްގަހާގެހި ހެއްދުމާއި ދަނޑުގޮވާން ކުރުމަށް މީގެކުރިން ވަނީ ދަތިތަކާ ކުރިމަތިލާންޖެހިފައެވެ. އެ ޒަމާނަކީ، ޒަމާނީ ޓެކްނޮލޮޖީ ވަރަށް ފަނޑު ދުވަސްވަރެއް ކަމުން، މިފަދަ ހަނަފަސް ބިމަކަށް ދިރުން ގެނެސް ދަނޑުވެރިކަމުގައި ކާމިޔާބު ހޯދޭނެ ގޮތެއް ތަސައްވުރެއް ނުކުރެވޭނެއެވެ.
ނަމަވެސް، ޒަމާނީ ޓެކްނޮލޮޖީއާއި އައު އީޖާދުތަކާއި، ވަސީލަތްތަކަށް އައި ކުރިއެރުމާއެކު، މާތްﷲ ގެ ރަޙްމަތްފުޅުން، ސައުދީގެ ބިންގަނޑަށް މިއަދު މިވަނީ ދިރުން އައިސްފައެވެ. ދަނޑު ގޮވާންކުރެވޭނެ ފަހި ފުރުޞަތުތައް މިވަނީ ތަނަވަސްވެ، ދަނޑުވެރިކަމުން ޤައުމަށް ލިބޭ ނަފާ އުހައް އުފުލިފައެވެ. ޤައުމަށް ތިޔާގި ކަމާއި އާރޯކަން މިވަނީ އަންނަން ފަށާފައެވެ. ފެހިކަމާއި ތާޒާކަން މިވަނީ ވެރިވާން ފަށާފައެވެ. މިކަމުގައި ސައުދީ ސަރުކާރުން ވަނީ އިސް ދައުރެއް އަދާކޮށްފައެވެ.
ދަނޑުވެރިކަމުގެ ނަފާއިން އެ ޤައުމުގެ ޖީޑީޕީ އަށް އައި ކުރިއެރުމުން އެ ޤައުމު މިއަދު މިވަނީ ހެއްވާލާފައެވެ. އެ ޤައުމުގެ ތާރީޚުގައިވެސް ނުލިބޭވަރުގެ ކާމިޔާބެއް ދަނޑުވެރިކަމުގެ އުފެއްދުންތެރިކަމުން މިއަދު ލިބިގެން ގޮސްފިއެވެ. މިހާރު އެ ޤައުމުގެ ދަނޑުވެރިކަމުގެ އުފެއްދުންތެރިކަމުން ޖީޑީޕީއަށް 100 ބިލިއަން ރިޔާލަ ނުވަތަ 27 މިލިއަން ޑޮލަރު ޙިއްސާކުރެއެވެ. މިއީ އެ ޤައުމުގެ އިޤްޞާދަށް ލިބިގެން ދިޔަ ވަރަށް ބޮޑު ކުރިއެރުމެކެވެ. ހަމައެކަނި ތެލަށް ބަރޯސާވެ، ހިފެހެއްޓިފައިވާ އިޤްތިޞާދު ސިންދަފާތު ކުރުމަށް އެޅިގެން ދިޔަ ހަރުދަނާ އަދި އެހާމެ މުހިއްމު ފިޔަވަޅެކެވެ.
އެ ޤައުމުގެ އިޤްތިޞާދަށް އަންނަ ކޮންމެ ކުރިއެރުމަކީ، ވަކިން ޚާއްޞަކޮށް އިސްލާމީ ޤައުމުތަކަށް ލިބިގެންދާނެ ހިތްހަމަޖެހުމެކެވެ. އެ ހިތްހަމަޖެހުމާއެކު، މިއަދު އިސްލާމީ އުންމަތަށް ދިރުން ލިބިގެންދާނެ ކަމާމެދު ޝައްކެތް ނެތެވެ. އެއީ ހަނަފަސް ދިރުމެއް ނެތް ބިމެއް ނަމަވެސް މިއަދު އެވަނީ، ދުރުވިސްނުމާއި ޒަމާނީ ޓެކްނޮލޮޖީއާއިއެކު އެ ބިމަށް ދިރުން އައިސްފައެވެ.
