ރައްޔިތުންގެ މަޖިލީހުގެ މެންބަރުންގެ އަދަދު ހައްދެއްނެތް މިންވަރަށް އިތުރުވާ ގޮތަށް އޮންނަ އޮތުމަކީ އެއްގޮތަކަށްވެސް ތާއީދު ކުރެވޭ ކަމެއް ނޫން ކަމަށް މޯލްޑިވްސް ނެޝެނަލް ޕާޓީ (އެމްއެންޕީ) ގެ ރައީސް މުހައްމަދު ނާޒިމް ވިދާޅުވެއްޖެއެވެ.
އެކަމަކީ އެއްގޮތަަކަށްވެސް ތާއީދު ކުރެވޭ ކަމެއް ނޫން ކަމަށާއި، މިކަމަށް ނިމުމެއް ގެނައުމަށްޓަކާ މަޖިލީހުގެ ދެންފެށޭ ދައުރުގައި ގާނޫނުއަސާސީ އިސްލާހުކުރުމަށް އެ ޕާޓީން ހުށަހަޅާނެ ކަމަށް ނާޒިމް ވިދާޅުވިއެވެ.
މަޖިލީހުގެ މެންބަރުންގެ އަދަދު އިތުރު ކުރުމާއި ގުޅޭގޮތުން އިލެކްޝަން ކޮމިޝަން (އީސީ)ގެ ނައިބް ރައީސް އިސްމާޢީލް ހަބީބް ވިދާޅުވީ، މަޖިލީހުގެ އިންތިހާބީ ދާއިރާތައް ކަނޑައެޅުމާއި ބެހޭ ގާނޫނު ބަޔާންކުރާގޮތުގެ މަތިން، 2024 ވަނަ އަހަރުގެ މަޖިލީހުގެ އިންތިހާބީ ދާއިރާތަކަށް ގެނެވޭ ބަދަލު މިއަދު ބޭއްވި ކޮމިޝަނުގެ ޖަލްސާ އިން ފާސްކޮށްފައިވާ ކަމަށާއި، އެގޮތުން، 2024 ވަނަ އަހަރުގެ ރައްޔިތުންގެ މަޖިލީހަށް 6 ގޮނޑި އިތުރުވޭ ކަމަށެވެ.
މީގެ ތެރެއިން މާލޭ ސިޓީ އަށް ދެ ގޮނޑި އިތުުރު ކުރެވޭއިރު، އައްޑޫ ސިޓީ، މާޅޮސްމަޑުލު ދެކުނުބުރި، މާލެއަތޮޅުގެ އިތުރުން، ހުވަދުއަތޮޅު އުތުރުބުރިއަށް އެއް ގޮނޑި އިތުރު ކުރެވޭ ކަމަށް އޭނާ ވިދާޅުވިއެވެ.
ޤާނޫނު ނަންބަރު 2009/1 (ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމާބެހޭ ޤާނޫނު) ގެ 8 ވަނަ މާއްދާގެ (ށ) ގައި ބަޔާންކުރާގޮތުގެ މަތީން، 2024 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބީ ދާއިރާތަކަށް ގެނެވޭ ބަދަލު މިއަދު ބޭއްވި ކޮމިޝަނުގެ 794 ވަނަ ޖަލްސާ އިން…
— Ismail Habeeb (@IsmailHabeeb) July 18, 2023
މިއާއެކު ރައްޔިތުންގެ މަޖިލީސް ތަމްސީލު ކުރާ މެންބަރުންގެ އަދަދު ވަނީ 93 އަށް އަރައިފައެވެ.
