ކުޑަކުދިންނަށް ކުރާ އަނިޔާގެ 104 މައްސަލަ، މިދިޔަ މަހު ޖެންޑާ މިނިސްޓްރީއަށް ރިޕޯޓުކޮށްފައިވާއިރު، އޭގެ ތެރޭގައި 33 ކުއްޖަކަށް އަޅައިނުލައިގެން ރިޕޯޓްކޮށްފައިވާ ކަމަށް އެ މިނިސްޓްރީގެ ތަފާސްހިސާބުތަކުން ދައްކައިފިއެވެ.
މިމަހު 17 ވަނަ ދުވަހު ޖެންޑާ މިނިސްޓްރީން އާންމުކުރި ޖޫން މަހުގެ ތަފާސް ހިސާބުތަކަށް ބަލާއިރު، ކުޑަކުދިންނަށް އަޅާނުލުމުގެ 33 މައްސަލައެއް އެ މިނިސްޓްރީއަށް ރިޕޯޓްކޮށްފައިވާއިރު، އޭގެ ތެރޭގައި ހިމެނެނީ 15 އަންހެން ކުދިން އަދި 18 ފިރިހެން ކުދިންގެ މައްސަލައެވެ.
މިދިޔަ މަހުގެ ޖެންޑަރ މިނިސްޓްރީގެ ތަފާސްހިސާބުގައިވާ ގޮތުން، ކުޑަކުދިންނަށް ކުރާ އަނިޔާގައި އެންމެ ގިނައިން ރިޕޯޓުކޮށްފައި ވަނީ، ފިރިހެން ކުދިންނަށް އަނިޔާ ކޮށްގެންނެވެ.
ކުޑަކުދިންނަށް އެކިކަހަލަ އަނިޔާކުރުމާ ގުޅޭގޮތުން މިދިޔަ ޖޫންމަހު އެ މިނިސްޓްރީއަށް ހުށަހަޅާފައިވާ މައްސަލަތަކަށް ބަލާއިރު، 15 އަންހެން ކުދިންނަށް އަދި 10 ފިރިހެން ކުދިން ޖިންސީ ގޯނާކޮށްގެން މައްސަލަ ހުށަހަޅާފައިވާއިރު، ކުޑަކުދިން ބޭނުންކޮށްގެން ނާޖާއިޒު ފައިދާ ނަގައިގެން ދެ ފިރިހެން ކުދިންގެ މައްސަލަ ހުށަހަޅާފައިވެއެވެ. މީގެއިތުރުން، 6 އަންހެން ކުދިންނާއި 12 ފިރިހެން ކުދިންނަށް ޖިސްމާނީ އަނިޔާ ކޮށްގެން މައްސަލަ ހުށަހަޅާފައިވެއެވެ.
ޖެންޑާ މިނިސްޓްރީއަށް މިދިޔަ މަހު ހުށަހެޅި އާއިލީ މައްސަލަތަކަށް ބަލާއިރު، ދަރިން ބެލުމުގެ 11 މައްސަލައެއް ހުށަހަޅާފައި ވެއެވެ. އަދި ކޯޓު މެދުވެރިކޮށް ދަރިން ހޯދުމަށް ފަސް މައްސަލައެއް ހުށަހަޅާފައި ވާއިރު، ދަރިފުޅާ ބައްދަލު ނުވެވޭ 14 މައްސަލައެއް ހުށަހަޅާފައި ވެއެވެ.
ޖެންޑާ މިނިސްޓްރީއަށް މިދިޔަ މަހު އެންމެ ގިނައިން ހުށަހަޅާފައި ވަނީ 10 އަހަރާއި 13 އަހަރާ ދެމެދުގެ ކުދިންނާ ގުޅުންހުރި މައްސަލަތަކެވެ. އަދި މި އުމުރުފުރާގެ 28 އަންހެން ކުއްޖެއްގެ މައްސަލަ ހުށަހަޅާފައި ވާއިރު، 23 ފިރިހެން ކުއްޖެއްގެ މައްސަލަ ހުށަހަޅާފައިވެއެވެ.
