ހުކުރު ދުވަސް އައުމުން، އަދިވެސް އަޅުގަނޑުމެން ހިތްތަކަށް އާވެއާލާވާ ވަރަށް މުހިއްމުކަމެއް އެބައޮތެވެ. އެއީ، "ދީނުގެ މަގު" ގެ ހަނދާންތަކެވެ. ހަފުތާ މަޖައްލާއެއްގެ ގޮތުގައި "ދީނުގެ މަގު"، 1986 އިން 2008 ވަނަ އަހަރުގެ ނިޔަލަށް ނެރުއްވާފައިވެއެވެ. ކުރީގެ ރައީސް އަލްއުސްތާޒް މައުމޫން ޢަބްދުލްޤައްޔޫމް، އިސްވެ ހުންނަވައިގެން ނެރުއްވި މި މަޖައްލާ ކޮންމެ ހުކުރު ދުވަހެއްގެ ހުކުރު ނަމާދަށްފަހު އާންމުންނަށް ހިލޭ ބައްސަވާފައިވެއެވެ. މަޖައްލާގެ ކޮންމެ އަދަދެއްގައިމެ، ޚުދު ރައީސް މައުމޫން ލިޔުއްވާފައިވެއެވެ. އަދި އެހެން މަޝްހޫރު ދީނީ އިލްމުވެރިން ވެސް ލިޔުއްވެވިއެވެ.
"ދީނުގެ މަގު" އަކީ އިސްލާމީ ތަޢުލީމު ފެތުރުމަށް އެޅިގެން ދިޔަ ހަރުދަނާ ފިޔަވަޅެކެވެ. ރައްޔިތުން ދީނީ ކަންކަމަށް ލޯ ހުޅުވައިދީ، ހޭލުންތެރި ކުރުމުގައި "ދީނުގެ މަގު" ގެ ދައުރު އެހާމެ ބޮޑެވެ.
"ދީނުގެ މަގު" ގެ އަދަދުތަކަށް، އަޅުގަނޑު ސިލްސިލާ ގޮތެއްގައި ނަޒަރު ހިންގާލަން ގަސްތު ކުރަމެވެ. އެގޮތުން ދީނުގެ މަގުގެ އެންމެ ފުރަތަމަ އަދަދު ޝާއިޢުކުރައްވާފައިވަނީ މީލާދީން 1986 ވަނަ އަހަރުގެ މޭ މަހުގެ 23 ވަަނަ ދުވަހުއެވެ. އެއީ ހިޖުރީ ސަނަތުން 1407 ވަނަ އަހަރުގެ ރަމަޟާން މަހުގެ 14 ވަނަ ދުވަހެވެ. އޭގެ ފަހުން 37 އަހަރު ފާއިތުވެގެން ދިޔައީއެވެ.
މި ހަފުތާގައި މި ބަލާލަނީ، "ދީނުގެ މަގު" ގެ އެންމެ ފުރަތަމަ އަދަދަށެވެ. 1407 ވަނަ އަހަރުގެ ހުކުރު ދުވަހު ނެރުއްވި އަދަދުން ރައީސް މައުމޫން، "މުޤައްރިރުގެ ޤަލަމުން" ލިޔުއްވާފައިވާ ލިޔުންކޮޅަށެވެ.
އެންމެ ފުރަތަމަ ފައްޓަވަމުންވެސް ރައީސް މައުމޫން ވިދާޅުވެފައިވަނީ، "ދީނުގެ މަގަކީ، ﷲ ގެ މަގެވެ. ދުނިޔެއާއި އާޚިރަތުގެ ބާއްޖަވެރިކަން ލިބިދެނިވި މަގެވެ."
ރައީސް މައުމޫން އިތުރަށް ވިދާޅުވެފައިވަނީ، ދީނުގެ މަގަކީ އިސްލާމް ދީނުގެ މަގު ކަމަށާއި، އެހެނީ އިސްލާމްދީން އައުމާއެކުހެން ހުރިހާ ދީންތަކެއް ބާޠިލުވެ، ނަސްޚްވެ ފޮހޮވިގެން ދިޔަކަމަށެވެ. ކީރިތި ޤުރުއާނުގެ އާޔަތަކުން، އެލިޔުމުގައި މިކަމުގެ ހެކި ދައްކަވާފައިވެއެވެ.
"އެންމެހައި ރަސޫލު ބޭކަލުންނާއި ނަބީބޭކަލުންގެ މައްޗަށް ބާވާލައްވާފައިވަނީ ހަމަ އެއް ދީނެވެ. އިސްލާމްދީނެވެ. މޫސާގެފާނަށް ބާއްވާލެއްވީވެސް އިސްލާމްދީނެވެ. ޢީސާގެފާނުގެ މައްޗަށް ބާވާލެއްވީވެސް އިސްލާމްދީނެވެ." ރައީސް މައުމޫން ވިދާޅުވިއެވެ.
މީސްތަކުންނަށް ގޮވާލައްވާފައިވަނީ، މާތް ﷲ އަށް އީމާންވުމަށާއި، އެކަލާނގެ އެއްކައުވަންތަކަން ޤަބޫލުކުރަން ކަމަށާއި، ހެޔޮ ޢަމަލުކޮށް ނުބައި ޢަމަލުތަކުން ދުރުހެލިވުމަށާއި، މީސްތަކުން މެދުގައި ހަމަހަމަކަން ޤާއިމުކުރުމަށް ކަމަށާއި، އެކަކު އަނެކަކަށް ކަމޭހިތައި، އެއްބަނޑު އެއްބަފާބައެއްގެ ގޮތުގައި ދިރިއުޅުންކަމަށް ވިދާޅުވެ، ދީނުގެ މައިގަނޑު ޢަޤީދާތަކާއި އުޞޫލުތަކަކީ، ކޮންމެ ސަމާވީ ދީނެއްގައި ވެސް ހަމަ އެކައްޗެއް ކަމަށް، ރައީސް މައުމޫން ބަޔާންކޮށްދެއްވިއެވެ.
ލިޔުންކޮޅު ނިންމަވާލައްވާފައިވަނީ، ކީރިތި ރަސޫލާ އަޅުގަނޑުމެންނަށް ދައްކުވައިދެއްވި، މަގުގައި ހިނގުމަށް ބާރު އަޅުއްވައި، ނަޞޭޙަތްތެރިވެވަޑައިގަންނަވަމުންނެވެ.
