ދާދިފަހުން ކޮރަޕްޝަންގެ ތުހުމަތު ކުރެވިފައިވާ، ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ)ގެ ސީއެފްއޯ ޔާސިރު ހަސަން، "މިހާރު" ނޫހުގައި ޝާއިއުކޮށްފައިވާ ލިއުމަކާއި ގުޅިގެން އެނޫހާ ދެކޮޅަށް އޭނާ ދައުވާކުރަން ނިންމައިފިއެވެ.
ޔާސިރު ނެރުނު ބަޔާނެއްގައި ވާގޮތުން، މިހާރު ނޫހުގައި ޝައިއުކޮށްފައިވާ ލިއުމަކީ ހަގީގަތާ ހިލާފަށް ޝާއިޢުކޮށްފައިވާ ލިޔުމެއް ކަމަށާއި، އެއީ ކުންފުނީގެ މުވައްޒަފުންނާއި ކްލައިންޓުންގެ ކުރިމަތީގައި ޔާސިރު އާއި އާރުޑީސީގެ އަގު ވައްޓާލުމަށް ޝާއިއުކޮށްފައިވާ ލިއުމެއް ކަމަށް އޭނާ ތުހުމަތުކުރައްވާފައިއެވެ.
"މުވައްޒަފުންގެ އެކައުންޓަށް ޖަމާވެފައި ހުންނާނީ ޕެޓީކޭޝް: ޔާސިރު"ގެ ސުރުހީގެ ދަށުން "މިހާރު" ނޫހުގައި ޝާއިއުކޮށްފައިވާ ލިއުމުގައި ޔާސިރުއަށް ސީރިއަސް ތުހުމަތުތަކެއްކޮށްފައިވާއިރު، ޕެޓީކޭޝްގެ ނަންދީ ބައެއް މުވައްޒަފުންގެ އެކައުންޓުތަކަށް ޖަމާކޮށްފައިވާ ބޮޑެތި އަދަދުތަކަކުން ފައިސާ ދޫކޮށްފައިވާ ކަމަށް ބުނެފައިވެއެވެ.
އެ ބަޔާނުގައި ޔާސިރު ވިދާޅުވީ، އެފަދަ ހިޔާނާތުގެ އަމަލެއް ހިނގާފައި ނުވާކަން އާރްޑީސީގެ އޮޑިޓް ރިޕޯޓުން ވެސް ފެންނާނެ ކަމަށާއި، އަމިއްލައަށް އެފަދަ މުއާމަލާތްތަކެއް ހިންގުމުގެ ބާރެއް އޭނާއަށް ނޯންނަކަމަށެވެ. އަދި ފައިސާއާ ގުޅުންހުރި މުއާމަލާތްތައް ހިންގަނީ ކުންފުނީގައި އެކަމަށް ހާއްސަކޮށް ތިބޭ މުވައްޒަފުން ކަމަށް ވެސް ޔާސިރު ވިދާޅުވިއެެވެ.
ޔާސިރު ވިދާޅުވީ އެ މައްސަލަ ކަމާ ގުޅުން ހުރި އިދާރާތަކަށް ހުށަހަޅާނެ ކަމަށެވެ. އެކަމުގައި ގާނޫނީ ފިޔަވަޅުތައް ވެސް އަޅުއްވާނެ ކަމަށް ވެސް އޭނާ ފާހަގަކުރެއްވިއެވެ.
އާރުޑީސީ އިން ވަނީ އޮންލައިން ނޫސް "ދިޔަރެސް"އާ ދެކޮޅަށް ވެސް ދައުވާކުރަން ނިންމައި، އެ މައްސަލައިގެ ދިފާއުގައި ތެދުވެފައެވެ.
