ޖުމްހޫރީ މައިދާނުން އިއްޔެ ހަވީރު ހައްޔަރު ކުރި އިދިކޮޅު ޕީޕީއެމް ކޯލިޝަންގެ ހުރިހާ އެންމެ ދޫކޮށްލައިފިއެވެ.
އިދިކޮޅު ކޯލިޝަންގެ ބައެއް ބޭފުޅުން އިއްޔެ ހަވީރު ޖުމްހޫރީ މައިދާނުގައި ތިއްބާ ފުލުހުން ވަނީ ޕީޕއެމަށް ނިސްބަތްވާ މަޖިލިސް މެންބަރުންނާއި ސިޓީ ކައުންސިލުގެ މެންބަރުންތަކެއް ހައްޔަރު ކޮށްފައެވެ.
ހައްޔަރު ކޮށްފައިވާ ބޭފުޅުންގެ ތެރޭގައި ޕީއެންސީގެ ޕީޖީ ލީޑަރު އާދަމް ޝަރީފް، ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް، މާވަށު ދާއިރާގެ މެމްބަރު އަދި ޕީއެންސީގެ ނައިބު ރައީސް މުހައްމަދު ސައީދު، މަހިބަދޫ ދާއިރާގެ މެމްބަރު އަހުމަދު ތާރިގު، މާލެ ސިޓީ ކައުންސިލަރ އިބްރާހިމް ޝުޖާއުގެ އަދި މާލެ ސިޓީ ކައުންސިލަރ އަދި ޕީޕީއެމްގެ ސެނެޓަރ، އަހުމަދު އައިފާން ހިމެނޭއިރު، ފުލުހުން އޭރު ވިދާޅުވީ، އެބޭފުޅުން ހައްޔަރު ކޮށްފައިވަނީ އެއްވެ އުޅުން މަނާ ސަރަޙައްދަކަށް އެއްވެ މުޒާހަރާކޮށް އަދި ފުލުހުންގެ ގާނޫނީ ވާޖިބު އަދާކުރުމަށް ހުރަސް އަޅައި، ފުލުހުންގެ އަމުރަށް ނުކިޔަމަންތެރިވި ކަމުގެ ތުހުމަތުގައި ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވެފައިވަނީ، އިއްޔެ ހަވީރު ފުލުހުންގެ ބެލުމުގެ ދަށަށް ގެނައި ހުރިހާ ބޭފުޅުން ދޫކޮށްލާފައިވާ ކަމަށެވެ.
ޖުމްހޫރީ މައިދާނުން އެފަރާތްތައް ހައްޔަރު ކޮށްފައިވާއިރު، އިދިކޮޅު ކޯލިޝަނުން ބުނީ އެބޭފުޅުން ހައްޔަރު ކޮށްފައިވަނީ ދިވެހިންގެ ރިޔާސީ ކެނޑިޑޭޓް އަދި ޕީޕީއެމްގެ ރައީސް، ރައީސް އަބްދުﷲ ޔާމީން އަބްދުލްގައްޔޫމަށް އިންސާފުވެރި ޝަރީއަތެއް ހޯދައިދިނުމާއި ގުޅޭ ޕެނަލް ޑިސްކަޝެއްގައި ތިއްބަވަނިކޮށް ކަމަށެވެ.
