ކޮންމެ ބަޔަކު އަޔަސް މި ހިނގަނީ އެއްކަމެއް ރިޕީޓްވާ ފިލްމެއް ގޮތަށް ހިނގާ ކަންތައްތަކެއް ކަމަށާއި، އިންތިޚާބު ނިމޭއިރަށް، ކޮލިޝަންގެ އެހެން ބަޔަކު ނެތްކަމަށް ވެރިކަމަށް އަންނަ ފަރާތްތަކުން ޤަބޫލުކުރާ މަންޒަރު ފެނިގެންދާކަމަށް، މޯލްޑިވްސް ރިފޯމް މޫވްމަންޓްގެ ރައީސް އަޙްމަދު ފާރިސް މައުމޫން ވިދާޅުވެއްޖެއެވެ.
އެމްއާރްއެމް އިން ބޭއްވި އިވެންޓެއްގައި ވާހަކަދައްކަވަމުން، ފާރިސް ވިދާޅުވީ، ވެރިކަން ކުރަން ނިކުންނަ އިރު، ދިވެހި ދިދަ ހިފައިގެން ނިކުމެ، ބާކީ ތިބި ހުރިހާ ސިޔާސީ ލީޑަރުން އެއްކޮށްގެން ވެރިކަމަށް އަންނަކަމަށާއި، ވަރަށް ވަރުގަދަ ކޯލިޝަނެކޭ ކިޔާފައި ނިކުމެ، ހުރިހާ ބޭފުޅުންނަށްވެސް ފުރުޞަތު އޮންނާނޭ، ދިވެހި ރައްޔިތުން އެދޭ ހުރިހާ ކަމެއް ކޮށްދޭނަމޭ ވިދާޅުވާކަމަށެވެ.
"އެއްވެ އުޅުމުގެ މިނިވަންކަން ހޯދައިދޭނަމޭ، ޚިޔާލު ފާޅުކުރުމުގެ މިނިވަންކަން ކަށަވަރު ކޮށްދޭނަމޭ، ކުދި ވިޔަފާރިތަކަށް ފުރުޞަތު ހުޅުވައިދޭނަމޭ، އަމިއްލައަށް ކުރާ މަސައްކަތަކަށް އެކަންޏޭ ޑިޕެންޑްވާނީ، މުއްސަނދިވާން ފުރުޞަތު ހޯދައިދޭނަމޭ، މިހުރިހާ ވާހަކައެއް ދައްކައިގެން އައިސް އިންތިޚާބު ހަމަ ނިމުނީ، ކޮލިޝަންގެ އެހެން ބަޔަކުވެސް ނެތް، ތިމަންނަ މޮޅު ކަމުން މިހުރީ ވެރިކަމަށް އައިސް."
ފާރިސް ވިދާޅުވިއެވެ.
ފާރިސް އިތުރަށް ވިދާޅުވީ، ކަންކަން އިސްލާޙުކުރުމަށްކަމަށް ބުނެ ވެރިކަމަށް އައިސް ވައުދުވާ ކަންކަން މަތިން ހަނދާނެތޭ ކަމަށެވެ.
"އެއްވެ އުޅުމުގެ މިނިވަންކަން އެދެން ފަހުން ކޮށްދެވިދާނެ ކަމެއްތާއޭ، މިވަގުތު އަދި ހާލަތުހުރި ގޮތުން ކުރެވޭ ކަށް ނެތޭ، ކޯޓްތައްވެސް ދެން ދެތިން ބޭފުޅަކު ބަދަލުކޮށްލީމަ އިސްލާޙްވީ، އެގޮތަށް މިކުރިއަށް ދަނީ."
ފާރިސް ވިދާޅުވިއެވެ.
މިއީ ވަރަށް މުހިއްމު ވަގުތެއްކަން ފާހަގަކުރައްވަމުން ފާރިސް ވިދާޅުވީ، މިޤައުމުގައި ފުރަތަމަ ފަހަރަށް ދެވަނަ ފަހަރަަށް ވޯޓްލާ ވަަރަށް ތަޢުލީމީ ވަރަށް ޤާބިލު، ވަރަށް މޮޅު، ވަރަށް މަސައްކަތްތެރ،ި ކަންކަމަށް އުންމީދީ ބަޔަކު އެބަތިބިކަމަށާއި، އެއެންމެންގެ މުސްތަޤްބަލު މިއޮތީ މި ވޯޓާ ގުޅިފައިކަމަށެވެ. އަދި މިވޯޓް ދެއްވާއިރު ރަނގަޅަށް ވިސްނަވައިގެން ވޯޓްދެއްވުމަށް ފާރިސް އެދިވަޑައިގެންނެވިއެވެ.
ފާރިސް މި މޭމޭރުމުން ވާހަކަ ދައްކަވާފައިވާއިރު، އެމްއާރްއެމްއިން ކެންޑިޑޭޓަކު ނެރުމަށް ވިސްނަމުންދާކަމަށް މީގެ ކުރިން ވަނީ ހާމަކޮށްފައެވެ. އަދި މިހާރުގެ ރައީސްުލްޖުމްހޫރިއްޔާ އިބްރާހީމް މުޙައްމަދު ޞާލިޙް ކުރިއަށް އޮތް ރިޔާސީ އިންތިޚާބަށް ކުރިމަތިލައްވަން ނިންމަވާފައިވާއިރު، އެމްޑީޕީގެ ކޮލިޝަނާ ގުޅުމަށް، އެމްއާރްއެމްއަށް ދަޢުވަތު އަރުވާފައިވެއެވެ. އެހެންނަމަވެސް، އެމްއާރްއެމްއިން އެކަމަށް ވަކި ގޮތެއް އަދި ނިންމަވާފައެއް ނުވެއެވެ.
