ދިރާސީ އައު އަހަރު ފެށޭއިރު، ހުރިހާ ސްކޫލަކަށްވެސް މުދައްރިސުން ހަމަވާނެ: މިނިސްޓްރީ

އަންނަ ދިރާސީ އަހަރު ފެށޭއިރު ހުރިހާ ސްކޫލަކަށްވެސް ބޭނުންވާ މުދައްރިސުން ހަމަވާނެ ކަމަށް އެޑިޔުކޭޝަން މިނިސްޓްރީން ވިދާޅުވެއްޖެއެވެ.

އެޑިޔުކޭޝަން މިނިސްޓްރީން ހާމަކޮށްފައިވަނީ، ސްކޫލްތަކަށް ބޭނުންވާ މުދައްރިސުން ހޯދުމުގެ މަސައްކަތް އަދިވެސް ކުރިއަށްދާކަމަށާއި، އަދި އަންނަ ދިރާސީ އައު އަހަރުގެ ކިޔެވުން ފެށުމުގެ ކުރިން ހުރިހާ ސްކޫލަކަށްވެސް މުދައްރިސުން ހަމަވާނެކަމަށެވެ. މުދައްރިސުންގެ އިތުރުން، ޕްރިންސިޕަލުން ހޯދުމުގެ މަސައްކަތްވެސް ކުރަމުންދާ ކަމަށްވެސް ޚަބަރު ލިބެއެވެ.

އަތޮޅުތެރޭގެ 14 ސްކޫލެއްގައި ބިދޭސީ ޕްރިންސިޕަލުން ހަރަކާތްތެރިވާނެ ކަމަށް އެޑިޔުކޭޝަނުން މައުލޫމާތު ދެއެވެ.
ފެށޭ ދިރާސީ އައު އަހަރަށް ބޭނުންވާނެ ހުރިހާ ޓެކްސްޓު ފޮތްތަކެއް ސްކޫލުތަކަށް ހަވާލު ކުރެވިފައިވާކަމަށާއި، އަދި މިހާރު ކުރިއަށްދަނީ ސްކޫލުތަކަށް ހަވާލުކުރެވިފައިވާ ފޮތްތައް ޗެކްކުރުމަށްފަހު، ހަމަނުވާ ފޮތްތައް ހަމަކޮށްދިނުމުގެ މަސައްކަތްކަމަށާއި، އަދި މަދުވާ ޓެކްސްޓް ފޮތްތައް، މިމަހުގެ 31ގެ ނިޔަލަށް ހުރިހާ ސްކޫލަކަށްވެސް ހަވާލުކޮށް ނިމޭނެ ކަމަށް ވެސް އެޑިޔުކޭޝަނުން ހާމަކުރެއެވެ.

މި ފެށޭ ދިރާސީ އައު އަހަރުގެ ކިޔެވުން ފެށުމަށް ހަމަޖެހިފައިވަނީ އަންނަ އޮގަސްޓް މަހުގެ 6 ވަނަ ދުވަހު ކަމަށްވާއިރު، އަންނަ ދިރާސީ އަހަރުގައި، 201 ދުވަހު ސްކޫލުތަކުގައި ކިަޔވާދޭނެއެވެ. އެއީ، ފުރަތަމަ ޓާމުގައި 93 ދުވަހު، އަދި ދެވަނަ ޓާމުގައި 108 ދުވަހެވެ.