ރައީސް އިބްރާހިމް މުހައްމަދު ޞާލިހްގެ ސިއްހީ ހާލުކޮޅާ ގުޅޭ ގޮތުން ރައްޔިތުންގެ މަޖިލިހުގެ ރައީސް މުހައްމަދު ނަޝީދު ދެއްކެވި ވާހަކަތަކަށް ދިވެހި ސަރުކާރުން ރައްދުދެއްވައިފިއެވެ.
ދަ ޑިމޮކްރެޓްސް ޖަގަހައިގައި ރޭ ބޭއްވި ޖަލްސާއެއްގައި ވާހަކަފުޅު ދައްކަވަމުން ނަޝީދު ވިދާޅުވީ ރައީސް ސޯލިހަކީ ކޮންމެ ދުވަހަކު ހެނދުނު "މުށެއް ފުރާ ބޭސް" ފަރިއްކުޅުއްވަން ޖެހިވަޑައިގަންނަވާ ބޭފުޅެއް ކަމަށާއި، ރައީސް ޞާލިހަކީ ހިތުގެ އާލާސްކަންފުޅާ އުޅުއްވާ ބޭފުޅެއް ކަމަށެވެ
އެ ވާހަކަތަކަށް ރައްދުދެއްވައި، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ޕްރައިމަރީން ނަޝީދު ނާކާމިޔާބުވެވަޑައިގަތީމައި، ކާމިޔާބު ކުރެއްވި ކެންޑިޑޭޓުގެ ފަހަތަށް ނާރަން އެކި ފާޑުގެ ތާކުން ތާކު ނުޖެހޭ ބަހަނާ ދެއްކެވި ބޭފުޅަކު އެއް ގޮތް ނެތިއްޔާ އަނެއް ގޮތަކުން ފިތުނައިގެ ވާހަކަތައް ފަތުރަމުންދާ ކަމަށެވެ.
މީގެ އިތުރުން، އެ ދަރަޖައަށް އެފަދަ ބޭފުޅަކު ވެއްޓުނީތީ އެކަމާ މެދުގައި ހިތާމަ ކުރައްވާ ކަމަށް ވެސް މިއުވާން ވިދާޅުވިއެވެ.
"އެ ދަރަޖައަށް އެފަދަ ބޭފުޅަކު ވެއްޓުނީތީ ހިތާމަކުރަން، ހައިރާނެއް ނުވޭ، ހިތާމަކުރަން."
މިއުވާން ވިދާޅުވިއެވެ.
ޕްރައިމަރީއިން ބަލިވީމާ، ކާމިޔާބުކުރި ކެންޑިޑޭޓުގެ ފަހަތަށް ނާރަން އެކިފާޑުގެ ތާކުންތާކުނުޖެހޭ ބަހަނާ ދެއްކެވި ބޭފުޅަކު އެއް ގޮތް ނެތިއްޔާ އަނެއް ގޮތަކުން ފަތުރަމުންދާ ފިތުނައިގެ އިތުރު ބޮޅެއް. އެ ދަރަޖައަށް އެފަދަ ބޭފުޅަކު ވެއްޓުނީތީ ހިތާމަކުރަން- ހައިރާނެއް ނުވޭ، ހިތާމަކުރަން. https://t.co/yOPyKbY7TC
— Miuvan (@Miuvaan) July 23, 2023
ނަޝީދުގެ ވާހަކަފުޅުގައި ވަނީ ރައީސް "މުސްކުޅި" ވެފައިވާ ކަމަށް ވިދާޅުވެ، ރާއްޖޭގެ ވެރިކަން ޒުވާން ބޭފުޅަކަށް ދެއްވަން ޖެހޭ ކަމަށް ވިދާޅުވެފައެވެ.
"އަޅުގަނޑު އެމްޑީޕީގެ މެމްބަރުންނަށް ތަކުރާރުކޮށް ދަންނަވަން، ތި ބޭފުޅުންގެ ރައީސް އަދި ތިބޭފުޅުންގެ ކެންޑިޑޭޓް، ކޮންމެ ދުވަހަކު ހެނދުނު މުށެއް ފުރައި ބޭސް ފަރިއްކުޅުއްވަން ޖެހިވަޑައިގަންނަވާ. ތި ބޭފުޅުންގެ ކެންޑިޑޭޓްގެ ހިތުގެ އާލާސްކަންފުޅު، ތިބޭފުޅުންގެ ކެންޑިޑޭޓްގެ ސިއްހީ ހާލުކޮޅު އެއީ ވިސްނަވަން ޖެހޭނެކަމެއް. ރާއްޖެއަށްޓަކައި އެ ވިސްނުން ކުރިއަށް ނެރެން ޖެހޭ،" ނަޝީދު ވިދާޅުވިއެވެ.
ގުޅުންހުރި ޚަބަރު:
ރައީސް ޞާލިޙް މުށެއް ފުރައި ބޭސް ފަރިއްކުޅުއްވަން ޖެހިވަޑައިގަންނަވާ: ރައީސް ނަޝީދު
