މިނިވަން ދުވަހުގެ މުނާސަބަތަކީ ހުރިހާ ޤައުމެއްގައިވެސް ނުހަނު މަޝްހޫރު ދުވަހެކެވެ. އާއްމުގޮތެއްގައި ޤައުމުތަކުން މިދުވަސް ފާހަގަކުރަނީ މިނިވަންކަން ލިއްބައިދިން ދުވަސްކަމުގައި ކަނޑައަޅައި، އެހެން ދައުލަތެއްގެ އިސްތިއުމާރީ އަޅުވެތިކަމުން މިންޖުވީ ދުވަހުއެވެ. މިދުވަސް ފާހަގަކުރަނީ އެޤައުމެއްގެ ސަޤާފީ، ފަންނީ، ޤައުމީ ޙަރަކާތްތަކާ އެކުގައެވެ.
ދުނިޔޭގެ އެކި ޤައުމުތުކުގައި މިނިވަން ދުވަސް އެކިއެކި ސަބަބުތަކަށްޓަކައި ފާހަގަކުރެއެވެ. އެގޮތުން ކަނޑި، ބަޑިން ހަނގުރާމަކޮށް ލިބޭ ނަސްރަކީ ސަބަބަކަށް ވާއިރު، ދެ ޤައުމެއް ދޭތެރޭ ސޮއި ކުރެވޭ އަހުދުނާމާއަކީ ވެސް ސަބަބަކަށްވެއެވެ. މިއިން ކޮންމެ ސަބަކާ ހުރެ ނަމަވެސް، މިނިވަންކަމެއް ހޯދުމަށްޓަކައި ބޮޑެތި ޤުރުބާނީތަކެއްވާންޖެހެއެވެ. ޖާނާއި މާލުން ޤުރުބާންވާންޖެހޭނެކަމަށް ޤަބޫލުކުރެވެއެވެ. ހަނގުރާމަކޮށްގެން މިނިވަންކަން ހޯދުމަކީ ގިނަ ބަޔަކަށް ވިސްނޭ ހަމައެވެ. މިގޮތުން ވިސްނާއިރު ރަބީޢުލް އައްވަލް މަހުގެ 1 ވަނަ ދުވަހު މިފާހަގަކުރާ ޤައުމީ ދުވަސް މިނިވަން ދުވަހުގެ ގޮތުގައި ފާހަގަކުރުން މާ އައުލާކަން ބޮޑުކަމަށް ގިނަ ބަޔަކަށް ޤަބޫލުކުރެވޭނެއެވެ. ބޮޑު ތަކުރުފާނު ވެވަޑައިގަތް ޤުރުބާނީއާއި އެ އުނދަގޫ ހަނގުރާމައަށް ތައްޔާރުވެވަޑައިގަތް ގޮތާއި، މިފަދަ ކަންކަމަށް ރިއާޔަތް ކުރާއިރު ހަމަގައިމުވެސް މިއީ މިނިވަން ދުވަހުގެ ގޮތުގައި ފާހަގަކުރުން އެންމެ މުނާސަބު ދުވަސް ނޫންތޯއެވެ؟.
އޭގެ ބަދަލުގައި، މިނިވަން ދުވަހުގެ ގޮތުގައި ދިވެހިރާއްޖޭގައި ފާހަގަކުރަމުން ދަނީ، 1887 ވަނަ އަހަރު ޑިސެމްބަރުން، 1965 ވަނަ އަހަރުގެ ޖުލައި މަހުގެ ސައްބީސް ވަނަ ދުވަހާ ހަމައަށް އިނގިރޭސީންގެ ހިމާޔަތުގެ ދަށުގައި އޮތުމަށްފަހު ރާއްޖެއަށް ފުރިހަމަ ސިޔާސީ މިނިވަންކަން ލިބުނު ދުވަހެވެ.
ދުނިޔޭގެ އެކިއެކި ޤައުމުތަކުގައި މިނިވަން ދުވަސް ފާހަގަކުރާ ގޮތަށް ބަލާލަމާތޯއެވެ. އެމެރިކާގައި މިދުވަސް ފާހަގަކުރަނީ ޖުލައި ކޮންމެ އަހަރަކު މަހުގެ 4 ވަނަ ދުވަހު ބަޑިބޭހުގެ ކުޅިވަރު ތަކާއެކުގައެވެ. އެހެންނަމަވެސް ބައެއް ސަރަހައްދުތަކުގައި އަލިފާނުގެ ހާދިސާތައް ކުރިމަތިވަމުންދާތީ އެކަން މަނާކޮށްފައި އެބަހުއްޓެވެ. ޕެރޭޑްކުޅުމާއި އެންމެން އެއްވެ އުފާފާޅު ކުރުމާއެކު ފާހަގަކުރުމަކީ އާއްމުކޮށް އެމެރިކާގައި އެކަން ކުރަމުން އަންނަ ގޮތެވެ. އެމެރިކާގައި މިނިވަން ދުވަސް ފާހަގަކުރަނީ އިނގިރޭސީންގެ އަޅުވެތިކަމުން މިނިވަން ޤައުމެއްގެ ގޮތުގައި ކަނޑައެޅުނު ދުވަހުގެ ގޮތުގައެވެ.
އަވަށްޓެރި އިންޑިއާގައި މިދުވަސް ފާހަގަކުރަނީ އޯގަސްޓްމަހުގެ 15 ވަނަ ދުވަހު އިނގިރޭސީންގެ އަތްދަށުން މިނިވަންވީ ދުވަހުގެ ގޮތުގައެވެ. މިދުވަހަކީ އިންޑިއާގައި ރަސްމީ ބަންދު ދުވަހެއްގެ ގޮތުގައި ކަނޑައަޅާފައި އޮންނަ ދުވަހެކެވެ. އަދި މިދުވަސް ފާހަގަކުރުމުގައި މައިގަނޑު ގޮތެއްގައި ދިދަ ނެގުމާއި ތެލަނގަ އެރުވަމުން ގެންދެއެވެ. މިދުވަހަކީ އާއިލާއާއި ރަށްޓެހިންނާއިއެކު ބައްދަލުކޮށް އެކުގައި ބޮޑެތި ޖާފަތްތައް ހެދުމާއެކު މިދުވަހުގެ މުހިންމުކަމާމެދު ވިސްނާ އަޅުވެތިކަމުގެ ދުވަސްވަރު އުޅުނު ދަތި ޙާލާމެދު ވިސްނާ މިދުވަހުގެ މުހިންމުކުމާމެދު ވިސްނުމުގެ ގޮތުން ފާހަގަކުރާ ދުވަހެކެވެ.
މެދުއިރުމަތީގެ ޤައުމުތަކުގައި ޤަތަރުގައި 3 ދުވަހުގެ މުއްދަތަށް ދިގު ޕާރޓީއެއް ގޮތަށް ކުރިއަށް ގެންދެއެވެ. ތައްޔާރީތައް ސެޕްޓެންބަރު މަހުގެ 1 ވަނަ ދުވަހު ފަށައެވެ. މިނިވަން ދުވަސް ފާހަގަކުރުމުގެ ގޮތުން ޤަތަރުގެ ދައުލަތުން އޮން އެއަރ ޓީވީ ޝޯވތަކާއި ރައްޔިތުން ޤައުމުގެ އަމީރާއި ބައްދަލުކުރުމަށް ދަތުރުކޮށް ހަދައެވެ.
މިނިވަން ދުވަހަކީ ކޮންމެ ޤައުމެއްގައިވެސް މުހިންމު އިސްކަމެއްދީގެން އެޤައުމުގެ ޤައުމީ ވަންތަކަމާއި، މިނިވަންކަމުގެ ރަމްޒު ފާހަގަކުރުމުގެ ގޮތުން ކުލަ ގަދަ ގޮތެއްގައި ފާހަގަކުރަމުން އަންނަ ދުވަހެކެވެ. ގިނަ ޤައުމުތަކުގައި މިދުވަސް ފާހަގަކުރަނީ ޤައުމީ އަބްޠާލުންގެ ޒިކުރާއާކޮށް އެ އަބްޠާލުން ވެވެޑައިގެންނެވި ޤުރުބާނީގެ ހަނދާންތައް އާކޮށް ޤައުމު މިނިވަންކަން އުފަންވި ދުވަސް ފާހަގަކޮށް، ޤައުމީ ލޯބި އުފެއްދުމުގެ މާތް މަޤްސަދުގައެވެ. ބައެއް ޤައުމުތަކުގައި ދީނީ އަޅުކަންތައް ހިމަނައިގެން ކުރިއަށް ގެންދިއުމާއި، ސަޤާފީ ނެށުމާއި ބަޑިބޭހުގެ ކުޅިވަރާއެކު މިމުނާސަބާ ފާހަގަކުރަމުން ދެއެވެ. މިމުނާސަބާގެ މައިގަނޑު އަސާސަކީ މިނިވަންކަމަށްޓަކައި ހުއްބުލް ވަޠަންގެ ޖޯޝުގައި ޤައުމަށްޓަކައި ޖިހާދުކޮށް، ޤުރުބާންވީ އަބްޠާލުންގެ ހަނދާނުގައި ކަމަށްވީއިރު، މިނިވަން ދުވަސް ފާހަގަ މިކުރަނީ އެންމެ މުނާސަބު ދުވަހުގައި ތޯއެވެ؟
