އެމްއާރްއެމްގެ ފަރާތުން ރިޔާސީ އިންތިޚާބު 2023 ގައި ވާދަކުރުމަށް ބާއްވާ ޕްރައިމަރީގެ ފުރުޞަތު، އެ ޕާޓީން މިއަދު ހުޅުވާލައިފިއެވެ.
2023 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި މޯލްޑިވްސް ރިފޯމް މޫވްމެންޓް (އެމް.އާރް.އެމް) ގެ ޓިކެޓްގައި ވާދަކުރުމަށް ބޭނުންވާ މެންބަރުން އެކަމަށް އެދި ހުށަހެޅުމުގެ ފުރުޞަތު، މިއަދުން ފެށިގެން (25 ޖުލައި 2023 ވާ އަންގާރަ ދުވަހުން) 27 ޖުލައި 2023 ވާ ބުރާސްފަތި ދުވަހުގެ ހަވީރު 16:00 އާ ހަމައަށް ވަނީ ހުޅުވާލާފައެވެ.
އެހެންކަމުން "އިންތިޚާބަށް ކުރިމަތިލުމަށް އެދޭ ފޯމު" ފުރިހަމަ ކުރުމަށްފަހު ޕާޓީ އޮފީހަށް ހުށަހެޅުމަށް އެ ޕާޓީން މިއަދު ކުރި އިޢުލާނެއްގައި ބުނެފައިވެއެވެ. ޕްރައިމަރީގައި ވާދަކުރުމަށް އެދި ފުރިހަމަކުރާ އެޕްލިކޭޝަން ފޯމާއި އިންތިޚާބުގެ ޓައިމްލައިން އެމް.އާރް.އެމްގެ ވެބްސައިޓް www.mrm.mv އަދި ޕާޓީގެ އޮފީހުން ލިބެން ހުންނާނެ ކަމަށްވެސް އެ ޕާޓީން ހާމަކުރައްވައެވެ.
އެމްއާރްއެމްގެ އިޢުލާނުގައިވަނ،ީ ޕްރައިމަރީގައި ވޯޓު ދިނުމުގެ ޙައްޤު ލިބިގެން ވަނީ އެ ޕާޓީގެ ދަފްތަރުގައި ހިމެނޭ މެންބަރުންނަށެވެ.
އެމް.އާރް.އެމްގެ ޓިކެޓްގައި ރިޔާސީ އިންތިޚާބުގައި ވާދަކުރަން ހުށަހަޅާ ފަރާތްތަކުގެ ތިރީގައި މިދަންނަވާ ޝަރުޠުތައް ފުރިހަމަވާންވާނެ ކަމަށްވެސް އެ އިޢުލާންގައި ފާހަގަކުރައްވާފައިވެއެވެ.
- ރިޔާސީ އިންތިޚާބުގައި 2023 ގައި ވާދަކުރުމަށް އެދި އިލެކްޝަންސް ކޮމިޝަނުން ކޮށްފައިވާ އިޢުލާނުގައިވާ ހުރިހާ ޝަރުޠެއް ފުރިހަމަވުން.
- ޕާޓީގެ މެމްބަރެއްގެ ގޮތުގައި މަދުވެގެން އެއް (01) އަހަރު ވެފައިވުން.
- ޕާޓީގެ އިގްރާރުގައި ސޮއިކޮށްފައި ހުށަހެޅުން.
އެމްއާރްއެމްގެ ޓިކެޓްގައި ރިޔާސީ އިންތިޚާބުގައި ވާދަކުރަން ހުށަހަޅާ ފަރާތްތަކުން ތިރީގައި މިދަންނަވާ ތަކެތި 27 ޖުލައި 2023 ވާ ބުރާސްފަތި ދުވަހުގެ ހަވީރު 16:00 ގެ ކުރިން ޕާޓީ އޮފީހަށް ހުށަހެޅުމަށްވެސް އެ ޕާޓީން އެދިވަޑައިގަންނަވައެވެ.
– އެމްއާރްއެމްގެ ޓިކެޓްގައި [އިންތިޚާބަށް ކުރިމަތިލުމަށް އެދޭ ފޯމު] ހުށަހެޅުން.
– މީގެ އިތުރުން، ސަރުކާރުގެ މުއައްސަސާތަކުން ސާފުކުރަންޖެހޭކަމަށް އިލެކްޝަންސް އިން ކަނޑައަޅާފައިވާ ލިޔުންތައް އެ މުއައްސަސާތަކުން ސާފުކޮށް ލިޔެކިޔުންތައް ފުރިހަމަކޮށް، އޭގެ ކޮޕީ ޕާޓީ އޮފީހަށް 31 ޖުލައި 2023 ގެ 16:00ގެ ކުރިން ހުށަހެޅުމަކީ އެކެނޑިޑޭޓެއްގެ ޒިންމާއެއް ކަމުގައިވެސް އެ ޕާޓީން ފާހަގަކުރައްވާފަައިވެއެވެ.
30 ޖުލައި 2023 ގައި ބޭއްވުމަށްހަމަޖެހިފައިވާ އެމްއާރްއެމްގެ ޓިކެޓްގައި ރިޔާސީ އިންތިޚާބުގައި ވާދަކުރަން ހުށަހަޅާ ފަރާތްތަކުން ތިރީގައި މިވާ ޓައިމްލައިންއާ އެއްގޮަތަށް ޢަމަލުކުރުމަށްވެސް އެ ޕާޓީން އެދިވަޑައިގަންނަވައެވެ.
- ޕްރައިމަރީއަށް ޢިއުލާން ކުރުން – 25 ޖުލައި 2023
- ޕްރައިމަރީގައި ވާދަކުރުމަށް ފޯމު ހުށަހެޅުމުގެ ސުންގަޑި – 27 ޖުލައި 2023 ގެ 16:00 އަށް
- 3. ނަން އަނބުރާ ގެންދިއުމުގެ ސުންގަޑި – 28 ޖުލައި 2023 ގެ 14:00 އަށް
- ކެންޑިޑޭޓުންގެ ނަން ޢިއުލާން ކުރުން – 28 ޖުލައި 2023 ގެ 16:00 އަށް
- ނަން ތަރުތީބުކުރުމަށް ގުރުއަތު ނެގުން – 28 ޖުލައި 2023 ގެ 16:30 އަށް
- ވޯޓުލުން އޮންނާނީ 01 އޮގަސްޓް 2023 ވާ އާދީއްތަ ދުވަހު (އޮންލައިން ވޯޓިން)
މިއަހަރު ބޭއްވޭ ރިޔާސީ އިންތިޚާބުގައި ވާދަކުރުމަށ،ް ޝައުޤުވެރިކަން ހުރި ކަމަށް، މީގެ ކުރިން އެކި ފަހަރު މަތިން ފާރިސް ހާމަކުރައްވާފައިވާއިރު، އެ ޕާޓީން ފާރިސް ޕްރޮމޯޓްކުރުމަށް މީގެ ގިނަ ޙަރަކާތްތަކެއް ހިންގަވާފައިވާ ކަން ފާހަގަކުރެވެއެވެ.
އަދި ފާރިސްއަށް ތާޢީދުކުރާ ފަރާތްތަކުން ސޯޝަލް މީޑިއާގައި އޭނާ ޕްރޮމޯޓްކުުރުމުގެ އިތުރުން ތަފާތު އިވެންޓްތަކާއި ބައްދަލުވުންތައްވެސް މީގެ ކުރިން ވަނީ ބާއްވާފައެވެ.
ފާރިސް އަބަދުަވެސް ވަކާލާތުކުރަށް ވަމުން ގެންދަވަނީ، އިސްލާޙީ ހެޔޮ ބަދަލު ގެންނަން ޖެހޭ ވާހަކައެވެ. އަދި ޕާޓީތަކުން ވަޢުދުވެ ވެރިކަމާ ޙަވާލުވުމުން އެކަންކަން ހަނދާން ނުހުންނަކަން ފާހަގަކުރައްވަމުން ގެންދަވައެވެ.
އެމްއާރްއެމް އިން ދާދިފަހުން ބޭއްވި އިވެންޓެއްގައި ވާހަކަދައްކަވަމުން، ފާރިސް ވިދާޅުވީ، ވެރިކަން ކުރަން ނިކުންނަ އިރު، ދިވެހި ދިދަ ހިފައިގެން ނިކުމެ، ބާކީ ތިބި ހުރިހާ ސިޔާސީ ލީޑަރުން އެއްކޮށްގެން ވެރިކަމަށް އަންނަކަމަށާއި، ވަރަށް ވަރުގަދަ ކޯލިޝަނެކޭ ކިޔާފައި ނިކުމެ، ހުރިހާ ބޭފުޅުންނަށްވެސް ފުރުޞަތު އޮންނާނޭ، ދިވެހި ރައްޔިތުން އެދޭ ހުރިހާ ކަމެއް ކޮށްދޭނަމޭ ވިދާޅުވާކަމަށެވެ. ފާރިސް އިތުރަށް ވިދާޅުވީ، ކަންކަން އިސްލާޙުކުރުމަށްކަމަށް ބުނެ ވެރިކަމަށް އައިސް ވައުދުވާ ކަންކަން މަތިން ހަނދާނެތޭ ކަމަށެވެ
