"ޤައުމަށް އައި މިނިވަން ނޫރާނީ"ގެ އަޑު އަހާލަން ޝަޢުޤުވެރިވިއެވެ. ހިތުގެ އެންމެ ހިމަ ނާރުގައިވެސް ޖަހަމުން ދިޔައީ އެ ރީތި ނާނާގެ ވިންދެވެ. އެ އަޑު ކަންފަތުގައި ބީހުމުން، އުފެދުނު ޤައުމީ ޖޯޝް ބުނެދޭން ނޭނގުނަސް، ޤައުމަށްޓަކައި އުފެދެނީ މަތިވެރި ލޯތްބަކާއި ޤަދަރެވެ.
އާދޭހެވެ. ހިތްގައިމު ރަން އަޑުގެ ވެރިޔާ، ނ. ހޮޅުދޫއަށް އުފަން މަޝްހޫރު ޢަބްދުﷲ ޙަސަން، ހޮޅުދޫ ޢަބްދުﷲ ވިދާޅުވެދެއްވި، މި ލަވައިން ޖެހި ވިންދު ބުނެދޭން އެހާ ފަސޭހައެއް ނޫނެވެ. އެހެންނަމަވެސް، އާވެއަލާ ވަނީ ޤައުމީ ޝުޢޫރެވެ. އާވެއާލާވަނީ ޤައުމަށްޓަކައި، މި ލޮބުވެތި ވަޠަނުގެ އަބުޠާލުން ވެވަޑައިގެންނެވި ޤުރުބާނީގެ މަތިވެރި ޒިކުރާއެވެ. ޤައުމަށްޓަކައި ކެރިގެން ޖިހާދުކުރެއްވި ފަހުލަވާނުންގެ ކުޅަދާނަކަމާއި، ޙިކުމަތްތެރިކަމާއި، ކުޅަ މަތިވެރި ޖިހާދުގެ ހަނދާންތަކެެވެ.
"ޤައުމަށް އައި މިނިވަން ނޫރާނީ"ން ބުނެދެނީ، ތަފާތު ދައުރުތަކުގައި ތަފާތު ޙާލަތްތަކުގައި، "އައުދާނަ"، ޝަރަފުވެރި އަބުޠާލުން ޤައުމަށްޓަކައި ވީ ޤުރުބާނީގެ ޒިކުރާތަކެެވެ. އެ މަތިވެރި ޤުރުބާނީގެ ހަނދާންތަކަށް ފަނޑުކަމެއް އައުމެއް ނެތެވެ.
އެއީ އުޖާލާ މަންޒަރުތަކެއް އެކުލެވިގެންވި މާޒީއެކެވެ. މާ ބޮޑަށްވެސް ރީތި މަންޒަރުތަކެއް އެމާޒީން ސިފަކުރެވިގެންދެއެވެ. ތާރީޚު އިޔާދަވާ ފަދައެވެ. އަބަދުވެސް ދާނީ، އެ ހަނދާންތައް ހާމަވަމުންނެވެ. ފާޅުވަމުންނެވެ. ޙުއްބުލްވަތަންގެ ކަރާމަތާއި ދިފާޢުގައި ޤުރުބާންވި ޝަހީދުންގެ ޒިކުރާއަށް ފަނޑުކަމެއް އައުމެއް ނެތެވެ. އަބަދުވެސް ހުންނާނީ އާވެއާލާ ވޭވެއެވެ.
އަޅުގަނޑުމެންގެ އަބުޠާލުން ހިތުގެ އަޑީން ޤަބޫލުކުރީ، މި ބިމަކީ އިއްޒަތްތެރި ބިމެއް ކަމެވެ. ޤަދަރާއި ހައިބަތު އުފުލިގެންވާ ފަސްގަނޑެއް ކަމެވެ. ފަޚްރާއި ޝަރަފް ލިބެންވާ ޤައުމެއް ކަމެވެ. ހިމާޔަތްކުރާނެ ވަޠަނެއް ކަމެވެ. ދަނޑުގޮވާން ކޮށް އުޅުނު މިމަތިވެރި ފަސްގަނޑަށް ގެނެސްދިނީ ދިރުމެވެ. އެއީ ކީއްވެތޯއެވެ؟ ދިވެހީންގެ މުރާލިކަމުގެ ސަބަބުންނެވެ. ހީވާގި ކަމާއިއެކު ބުރަ މަސައްކަތް ކުރުމުގެ ސަބަބުންނެވެ. މިވަޠަނުގެ ކަރާމަތާއި ޝަރަފަށްޓަކައި ވީ ޤުރުބާނީގެ ނަތީޖާއަކީ، "ރުވަމުން ދިޔަ ގަސްތައް ފޯދި" ދާ އުސޫލުން ޤައުމަށް ލިބުނު އަމާންކަމާއި ހަމަޖެހުމެވެ. ޤައުމަށް އައި ކުރިއެރުމެވެ. މިނިވަންކަމުގެ ހިޔަލުގައި އުޅުމުގެ މަތިވެރި ނަސީބު ލިބުމެވެ.
ޤަބޫލުކުރާށެވެ. ޤައުމަށްޓަކައި ޤުރުބާންވާ އަބުޠާލުންގެ ހަނދާންތަކަށް ނިމުމެއް ނެތެވެ. އެބައިމީހުންގެ ކަށިތަކާއި މަސްތައް ވިރިގެން ދިޔަ ކަމުގައިވިޔަސްމެއެވެ. ޤައުމަށްޓަކައި ޖިހާދުކުރުމަށް "އިސްނެންގެވި ކާބަފައިން ދެއްވާ" ހަދިޔާއަކީ މިނިވަންކަމުގެ ރޫޙް ދިރުމެވެ. އަދުގެ ޖީލާއި އަންނާން އޮތް ޖީލަށް ދެނީ އެ ހަދިޔާއެވެ. ޤައުމަށްޓަކައި ޤުރުބާންވާން ތަައްޔާރު ވާށެވެ. ފަސް ނުޖެހޭށެވެ. އިސްނަގާށެވެ. ކާބަފައިން ދެއްކެވީ އިސްނެގުމުގެ މިސާލެވެ. "ލީޑަރޝިޕް" ގެ ފުރިހަމަ ނަމޫނާއެވެ.
ޤައުމު މިނިވަންކަމުގައި މުސްތަޤްބަލަށްޓަކައި މަންޒަރުތައް ކުރަހާއިރު، މިނިވަން ދިދައިގެ ހިޔަލުގައި، މި ފަޚްރުވެރި ބިމުގައި ތިބެ އިޙްސާސްކުރެވޭނީ އުފާވެރިކަމާއި ހިނިތުންވުމުގެ ޝުޢޫރުތަކެވެ. ޤައުމަށްޓަކައި ޝަހީދުވި އަބުޠާލުންގެ ޒިކުރާ އައު ކުރެވޭނީ، ހިނިތުންވުމާއެކުގައެވެ.
ޝައްކެތްނެތެވެ. ޤައުމަށްޓަކައި ޤުރުބާންވި މުޖާހިދުންނަށް ޙައްޤުވަނީ ސާބަހާއި އައްސަރިބަހެވެ. "ފަތިފައްޗަށް އަމުނައިގެން" ވެސް ބަރުތީލަ ކުރެވޭނީ ޝުކުރުވެރިކަމުގެ ބަސްތަކެވެ. އަބަދާއި އަބަދުމެ، އެ މަތިވެރި ޝުކުރު އަދާކުރާނެއެވެ.
އާއެކެވެ. ޤައުމަށް މިވަނީ " މިނިވަން ނޫރާނީ" އައިސްފައެވެ. މިއީ ޤައުމުގެ އަބުޠާލުންވި މަތިވެރި ޤުރުބާނީގެ ނަތީޖާއެވެ. އެ އަބުޠާލުންގެ ޒިކުރާ އަބަދަށް ދެމިގެންވެއެވެ. އެހެންކަމުން "ދައުރުން މިހަނދާންތައް" އައުކޮށް އަންނަން އޮތް ޖީލަށްޓަކައި، މިނިވަން ޤައުމެއްގެ ގޮތުގައި ވާސިލުކޮށް ދެމާތޯއެވެ.
