ކެމްބޯޑިޔާގެ ބޮޑުވަޒީރު ހުންސެން، އޭނާގެ ދަރިކަލުންނަށް ބޮޑު ވަޒީރުކަން ޙަވާލުކުރަން ނިންމަވައިފިއެވެ.
ކެމްބޯޑިޔާގެ ބޮޑުވަޒީރު ހުންސެން، އޭނާގެ ދަރިކަލުންނަށް ބޮޑު ވަޒީރުކަން ޙަވާލުކުރަން ނިންމާފައިވާކަން ހާމަކޮށްފައިވަނީ، ބުދަ ދުވަހު އޭނާ ޤައުމާ މުޚާޠަބުކޮށް ދެއްކެވި ވާހަކަފުޅުގައެވެ.
ބޮޑުވަޒީރު ހުންސެން ވިދާޅުވީ، އޭނާގެ ދަރިކަލުން ހުން މަނެޓަށް ވެރިކަން ފޮރޮޅާލަން ނިންމާފައިވާ ކަމަށާއި، އަންނަ އޯގަސްޓް މަހުގެ 10 ވަނަ ދުވަހު މަޤާމު ޙަވާލުކުރައްވާނެ ކަމަށެވެ.
ހުން ސެން އެ ޤައުމުގެ ވެރިކަމުގައި ހުންނަވާތާ 40 އަހަރުވެފައިވާއިރު، އޭނާ މަޤާމު ދޫކޮށްލަން ނިންމަވާފައިވާ ކަން ހާމަކުރައްވަމުން އައިސްފައިވަނީ މިފަހަކުންނެވެ. އެހެންނަމަވެސް، އޭނާ ނިސްބަތްވާ ކެމްބޯޑިއަން ޕީޕަލްސް ޕާޓީގެ ވެރިކަން އޭނާ ދޫކޮށް ނުލައްވާނެ ކަމަށްވެސް ވިދާޅުވިއެވެ.
އަލަށް އިންތިޚާބުވެފައިވާ ޕާލިމެންޓް މެންބަރުން ހުވާކުރުމަށް ހަމަޖެހިފައިވަނީ، އޯގަސްޓް މަހުގެ 22 ވަނަ ދުވަހު ކަމަށްވެސް ހުން ސެން ވިދާޅުވިއެވެ.
