އެމްއާރްއެމްގެ ރިޔާސީ ޓިކެޓް ފާރިސް ކަށަވަރު ކުރައްވައިފި

އެމް.އާރު.އެމް ގެ ފަރާތުން 2023 ވަނަ އަހަރުގެ ރިޔާސީ އިންތިހާބުގައި ވާދަކުރާނެ ކެނޑިޑޭޓެއް ހޮވުމަށް ބާއްވާ ޕްރައިމަރީގައި ވާދަކުރުމަށް ހުޅުވާލި ފުރުޞަތުގައި، ޕްރައިމަރީގައި ވާދަކުރުމަށް ފޯމު ހުށަހެޅުއްވި ހަމައެކަނި ކެންޑިޑޭޓަކީ، އެޕާޓީގެ ރައީސް ފާރިސް މައުމޫން ކަމުން، އެމްއާރްއެމްގެ ރިޔާސީ ޓިކެޓް ފާރިސްއަށް ކަށަވަރުވެއްޖެއެވެ.

އެމްއާރްއެމް އިން "ފިޔަ އޮންލައިން" އަށް ކަށަވަރުކޮށްދެއްވި ގޮތުގައި، މިއަދުގެ 16:00 ގެ ނިޔަލަށް ފޯމު ލުމަށް ހުޅުވާލި ފުރުޞަތުގައި، ޕްރައިމަރީއަށް ކުރިމަތިލައްވާފައި ވަނީ ހަމައެކަނި ފާރިސް މައުމޫނެވެ.

އެ ޕާޓީގެ އަސާސީގައި ޤަވާއިދުގައިވާ ގޮތުން، ރިޔާސީ ޓިކެޓް މުޅިން ކަށަވަރުވާނީ އެމްއާރްއެމްގެ އެކްސްކޯރގެ އެންޑޯޒްމަންޓެއް އެކަމަށް ލިބުމުންނެވެ. އެއާއެކު އިލެކްޝަންޝް ކޮމިޝަނަށް ފޯމު ހުށަހެޅުއްވުމުގެ މަސައްކަތް ކުރިއަށް ގެންދަވާނެ ކަމަށް މަޢުލޫމާތު ލިބެއެވެ.

‎2023 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި މޯލްޑިވްސް ރިފޯމް މޫވްމެންޓް (އެމް.އާރް.އެމް) ގެ ޓިކެޓްގައި ވާދަކުރުމަށް ބޭނުންވާ މެންބަރުން އެކަމަށް އެދި ހުށަހެޅުމުގެ ފުރުޞަތު،  25 ޖުލައި 2023 ވާ އަންގާރަ ދުވަހުން 27 ޖުލައި 2023 ވާ ބުރާސްފަތި ދުވަހުގެ ހަވީރު 16:00 އާ ހަމައަށް އެ ޕާޓީން ހުޅުވާލެއްވިއެވެ.

މިއަހަރު ބޭއްވޭ ރިޔާސީ އިންތިޚާބުގައި ވާދަކުރުމަށ،ް ޝައުޤުވެރިކަން ހުރި ކަމަށް، މީގެ ކުރިން އެކި ފަހަރު މަތިން ފާރިސް ހާމަކުރައްވާފައިވާއިރު، އެ ޕާޓީން ފާރިސް ޕްރޮމޯޓްކުރުމަށް މީގެ ގިނަ ޙަރަކާތްތަކެއް ހިންގަވާފައިވާ ކަން ފާހަގަކުރެވެއެވެ.

އަދި ފާރިސްއަށް ތާޢީދުކުރާ ފަރާތްތަކުން ސޯޝަލް މީޑިއާގައި އޭނާ ޕްރޮމޯޓްކުުރުމުގެ އިތުރުން ތަފާތު އިވެންޓްތަކާއި ބައްދަލުވުންތައްވެސް މީގެ ކުރިން ވަނީ ބާއްވާފައެވެ.

ފާރިސް އަބަދުަވެސް ވަކާލާތުކުރަށް ވަމުން ގެންދަވަނީ، އިސްލާޙީ ހެޔޮ ބަދަލު ގެންނަން ޖެހޭ ވާހަކައެވެ. އަދި ޕާޓީތަކުން ވަޢުދުވެ ވެރިކަމާ ޙަވާލުވުމުން އެކަންކަން ހަނދާން ނުހުންނަކަން ފާހަގަކުރައްވަމުން ގެންދަވައެވެ.

އެމްއާރްއެމް އިން ދާދިފަހުން ބޭއްވި އިވެންޓެއްގައި ވާހަކަދައްކަވަމުން، ފާރިސް ވިދާޅުވީ، ވެރިކަން ކުރަން ނިކުންނަ އިރު، ދިވެހި ދިދަ ހިފައިގެން ނިކުމެ، ބާކީ ތިބި ހުރިހާ ސިޔާސީ ލީޑަރުން އެއްކޮށްގެން ވެރިކަމަށް އަންނަކަމަށާއި، ވަރަށް ވަރުގަދަ ކޯލިޝަނެކޭ ކިޔާފައި ނިކުމެ، ހުރިހާ ބޭފުޅުންނަށްވެސް ފުރުޞަތު އޮންނާނޭ، ދިވެހި ރައްޔިތުން އެދޭ ހުރިހާ ކަމެއް ކޮށްދޭނަމޭ ވިދާޅުވާކަމަށެވެ. ފާރިސް އިތުރަށް ވިދާޅުވީ، ކަންކަން އިސްލާޙުކުރުމަށްކަމަށް ބުނެ ވެރިކަމަށް އައިސް ވައުދުވާ ކަންކަން މަތިން ހަނދާނެތޭ ކަމަށެވެ.