މި ހަފުތާގައި މި ބަލާލަނީ، "ދީނުގެ މަގު" ގެ ދެވަނަ އަދަދަށެވެ. 1407 ވަނަ އަހަރުގެ ރަމަޟާން މަހުގެ 21 ވީ ހުކުރު ދުވަހު (30 މެއި 1986) ގައި ނެރުއްވި އަދަދުގައި ރައީސް މައުމޫން، "މުޤައްރިރުގެ ޤަލަމުން" ލިޔުއްވާފައިވާ ލިޔުންކޮޅަށެވެ.
"ދީނުގެ މަގު" ގެ މިއަދަދުގައި ލިޔުއްވާފައިވަނީ، "މި މަތިވެރި ފަރުޞަތު ނަގާ ނުލަމާތޯއެވެ!" މި ސުރުޚީގެ މައްޗަށެވެ.
ލިޔުން ފައްޓަވަމުން، ރަމަޟާން މަހުގެ ދުވަސްތަކުގެ ތެރެއިން ފަހު ދިހައިގެ ދުވަސްތަކުގެ މާތް ކަމަށް އިޝާރަތްކުރައްވައި، ވިދާޅުވެފައިވަނީ، އެ ދުވަސްތަކަކީ ރަމަޟާން މަހުގެ އެހެން ދުވަސްތަކަށްވުރެ މާތްކަން ބޮޑު ދުވަސްތަކެއް ކަމުގައި ޞައްޙަ ޙަދީސްތަކުން ސާބިތުވާ ކަމަށެވެ.
ފަހު ދިހައިގެ ދުވަސްތައް އަތުވެއްޖެނަމަ ކީރިތި ރަސޫލާ ރޭ އަޅުކަން ޤާއިމުކުރެއްވުމުގައި އެހެނިހެން ރޭތަކަށްވުރެ މާ ބޮޑަށް ހިންމަތްކުރައްވާ ކަމަށް ޢާއިޝަތުގެފާނުގެ ކިބައި ރިވާވެފައިވާކަމަށާއި، އަދި އެރޭތަކުގައި އެކަލޭގެފަނުގެ އަނބިއަނބި ކަނބަލުންވެސް ރޭ އަޅުކަން ޤާއިމުކުރެއްވުމަށް އެކަލޭގެފާނު ނަޞޭޙަތްތެރިވެވަޑައިގެން ބާރުއަޅުއްވާ ހެއްދެވިކަމަށް ރައީސް މައުމޫން ވިދާޅުވެފައިވެއެވެ.
"ބަރަކާތްތެރި ރަމަޟާން މަހުގެ ތެރޭގައި ﷲ ލައްވާފައިވާ އެއްހާސް މައްސަރަށްވުރެ އެ ރެއެއްގެ ހެޔޮކަން ބޮޑު ރެއަކީވެސް ގިނަ ޢިލްމުވެރިން ވިދާޅުވާ ގޮތުގައި އެ މަހުގެ ފަހު ދިހައިގެ ރޭތަކުގެ ތެރެއިން ރެއެކެވެ." ރައީސް މައުމޫން ވިދާޅުވެފައިވެއެވެ.
އެރެއަކީ ރޭތަކުގެ ތެރެއިން އެންމެ ޝަރަފްވެރި އަދި އެންމެ ޤަދަރު އުފުލިގެންވާ ރޭ ކަމަށް ވިދާޅުވެ، އެފަދަ މާތް ރެއެއް ކަމުގައި އެރޭ އެ ހިމެނުނީ މުޅި އިންސާނިއްޔަތަށް ހިދާޔަތެއް ކަމުގައި ﷲ ބާވައިލެއްވި އެކަލާނގެ ކަލާމްފުޅު ކަމުގައިވާ ކީރިތި ޤުރުއާން ބާވާލައްވަން ފެއްޓެވި ރެއަކީ އެރޭ ކަމަށް ވާތީ ކަމަށް ފާހަގަކުރައްވަމުން، ކީރިތި ޤުރުއާނުން ހެކި ދައްކަވާފައިވެއެވެ.
މިފަދަ މާތް ދުވަސްތަކާއި ރޭތަކަކީ، ﷲ ތަބާރަކަވަތަޢާލާގެ ދަރުމަވަންތަވެރިކަމުން ދެއްވާފައިވާ ރަނުގެ ފުރުޞަތެއް ކަމާއި، ތިމާމެންގެ ފުށުން ވެވިފައިވާ ކުށް ފާފަ ފުއްސެވުމަށް އެދި ދުޢާކޮށް ހެޔޮ ޢަމަލުތައް ކުޅައުމަށް މިފަދަ ދުވަސްތަކާއި ރޭތަަކަށްވުރެ ވަކި ރަނގަޅު ފުރުޞަތެއް ނުލިބޭނެ ކަމަށް ރައީސް މައުމޫން ވިދާޅުވެފައިވެއެވެ.
ލިޔުން ނިންމަވާލައްވާފައިވަނީ، އެންމެހައި މުސްލިމުންގެ މައްޗަށް ވާޖިބުވެގެންވަނީ ކީރިތި ރަސޫލާ މިފަދަ ދުވަސްތަކާއި ރޭތަކުގައި ޢަމަލުކުރެއްވި ގޮތްތަކަށް އިޤްތިދާއުވެ މިފަދަ ރޭތަކާއި ދުވަސްތަކުގައި ނަމާދުކުރުމާއި ޤުރުއާން ކިޔެވުމާއި ދުޢާކުރުމާއި މިނޫންވެސް ހެޔޮ ޢަމަލުތައް ކުރުމުގައި ގިނަ ވަގުތު ހޭދަކޮށް، އެ މަތިވެރި މާތް ރަނުގެ ފުރުޞަތު ނަގާ ނުލުމަށް ނަޞޭޙަތްތެރިވެ ވަޑައިގަންނަވަމުންނެވެ.
އަންނަ ހުކުރުގައި ވެސް، އިންޝާﷲ، "ދީނުގެ މަގު" ގެ ލިޔުމަކަށް އަލިއަޅުވާލާ ނަމެވެ.
(ދީނުގެ މަގަށް ނަޒަރެއް: ފުރަތަމަ އަދަދު، 1986، ރައީސް މައުމޫންގެ ލިޔުއްވުމެއް) – މި ލިޔުން ވިދާޅުވުމަށް: https://fiyaonline.com/59015
