ރައީސް އިބްރާހިމް މުހައްމަދު ޞާލިހް ވެރިކަމުގެ ދެވަނަ ދައުރެއް ހޯއްދެވުމަށް މިހާރު ފައްޓަވާފައިވާ ކެމްޕެއިންގައި ފުވައްމުލަކަށް ވަޑައިގަންނަވާ އިރު، އެމަނިކުފާނުގެ އަރިހުގައި ނައިބު ރައީސް ފައިސަލް ނަސީމް ވެސް ބައިވެރިވެވަޑައިގަންނަވާ ކަމަށް މައުލޫމާތު ލިބިއްޖެއެވެ.
ރައީސްގެ ދަތުރުފުޅުގައި މިއަދު ހަވީރު ދޫޑިގަން އަވަށު ފުޓްބޯޅަ ދަނޑާއި ފުވައްމުލަކު ސްކޫލްގައި އަލަށް އިމާރާތް ކުރި މަލްޓި ޕާޕަސް ހޯލް ހުޅުއްވައި ދެއްވުމަށްފަހު، މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ޕޮލިޓިކަލް ސެންޓަރު ހުޅުވުން އޮންނާނެ ކަމަށް މަޢުލޫމާތު ލިބެއެވެ.
ފުވައްމުލަކުގެ ރައްޔިތުންނާ ބައްދަލު ކުރެއްވުމަށް ބާއްވާ ޖަލްސާ އޮންނާނީ މިރޭ 9 ޖަހާއިރު، ފުވައްމުލަކު ސްޓޭޑިއަމް ސަރަހައްދުގައެވެ.
ރައީސްގެ މި ދަތުރުފުޅުގައި މާދަމާ އޮންނަ ކަންކަމުގެ ތެރޭގައި ހޯމް ސޯލާ ޕްރޮގްރާމް އިފްތިތާހުކޮށް ދެއްވުމާއި އަދާލަތު ޕާޓީގެ ޖަގަހަ ހުޅުއްވައި ދެއްވުމާއި ކެމްޕެއިން ޓީމުތަކާ ބައްދަލު ކުރެއްވުން ހިމެނެއެވެ. އެމަނިކުފާނު ފުވައްމުލަކުން ފުރާވަޑައިގަންނަވާނީ މާދަމާގެ ވަގުތެއްގައެވެ.
ރައީސްގެ މި ދަތުރުފުޅަށް ފަހު، ދެން އެމަނިކުފާނު ވަޑައިގަންނަވާނީ ހދ. އަތޮޅާއި ށ. އަތޮޅަށެވެ. އެމަނިކުފާނުގެ ކެމްޕެއިން ރަސްމީކޮށް ފެއްޓެވީ ވެސް ށ. އަތޮޅުންނެވެ. ށ. ފޯކައިދޫގައި ބޭއްވި ޖަލްސާގައި ނައިބު ރައީސް ފައިސަލް ވެސް ބައިވެރިވެވަޑައިގެންނެވިއެވެ.
ރައީސް ފުވައްމުލަކަށް ވަޑައިގަންނަވާއިރު، ނައިބު ރާއިސްގެ އިތުރުން ކޯލިޝަންގެ ޕާޓްނަރުން ކަމުގައިވާ އަދާލަތު ޕާޓީ އާއި އެމްޑީއޭގެ އިސްވެރިންނާއި ސަރުކާރުގެ ބައެއް އިސް ވެރިން ބައިވެރިވެވަޑައިގަންނަވާނެއެވެ.
ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި ރައީސް ސޯލިހް ވާދަކުރައްވާ އިރު، އެމަނިކުފާނުގެ ރަނިންމޭޓަކު އަދި ކަނޑަނާޅައެވެ. އެންމެ ފަހުން އެމަނިކުފާނު ނޫސްވެރިންނާ ވާހަކަފުޅު ދައްކަވަމުން ވިދާޅުވީ ރަނިންމޭޓުގެ ކަންތައްތަކުގައި އެމްޑީޕީގެ އިސް ބޭފުޅުންނާ ވަކިވަކިން ބައްދަލު ކުރައްވަމުން ގެންދަވާ ކަމަށެވެ. އަދި "ކޮންމެ ދުވަހަކު، ކޮންމެ ރެއަކު" ކަހަލަ ގޮތަކަށް އެބޭފުޅުންގެ ވިސްނުން ހޯއްދަވަމުންދާ ކަމަށް ވެސް އެމަނިކުފާނު ވިދާޅުވިއެވެ.
