ޕީޕިއެމްގެ ރައީސް އަދި ޕީޕީއެމްގެ ރިޔާސީ ކެންޑިޑޭޓް، ރައީސް ޢަބްދުﷲ ޔާމީން ޢަބްދުލްޤައްޔޫމް ކުރަން ދެއްކެވި ކޮންމެ މަސައްކަތެއް ކުރާނެ ކަމުގެ ފުރިހަމަ ޔަގީންކަން އަރުވާ ކަަމަށް ޕީޕީއެމްގެ ނައިބު ރައީސް އަދި ގުރައިދޫ ދާއިރާގެ މެމްބަރު މުޙައްމަދު ޣައްސާން މައުމޫން ވިދާޅުވެއްޖެއެވެ.
ޣައްސާން މިހެން ވިދާޅުވީ، އިދިކޮޅު ޕީޕީއެމް ކޮލިޝަންގެ ރިޔާސީ ކެންޑިޑޭޓް، ރައީސް ޢަބްދުﷲ ޔާމީންގެ ރަނިންމޭޓަކަށް ކުރީގެ ނައިބު ރައީސް ޑރ. މުހައްމަދު ޖަމީލް އަޙްމަދު މިއަދު ހަމަޖެއްސުމާއި ގުޅިގެން ކުރެއްވި ޓްވީޓެއްގައެވެ.
ޑރ. ޖަމީލަށް މަރުހަބާ ވިދާޅުވަމުން ޣައްސާން ވިދާޅުވީ، ޕީޕީއެމް ލީޑާރޝިޕް އާއި ސެނެޓް އަދި ހިތްވަރުގަދަ ލަޝްކަރު މިތިބީ ރައީސް ޔާމީމް ފަަހަތްޕުޅުގައި އެމަނިކުފާނު ވެރިކަމަށް ގެނައުމަށް ވަރުގަދަ އަޒުމުގައި ކަމަށެވެ.
"ކުރަން ދެއްކެވި ކޮންމެ މަސައްކަތެއް ކުރާނެ ކަމުގެ ފުރިހަމަ ޔަގީންކަން އަރުވަން".
ޣައްސާން ވިދާޅުވިއެވެ.
Marhaba VP Dr @MJameelAhmed. PPM ge Leadership aai Senate adhi hivvarugadha lashkar mithiby Raees Yameen fahaippulhuga e manikfaan verikamah genaumuge varugadha azumga. Kuran dhekkevi komme masahkatheh kuräne kamuge furihama yagynkan aruvan! #RY2023 pic.twitter.com/zEuxgGnOkK
— Mohamed Ghassan Maumoon (@mgmaumoon) July 30, 2023
އަންނަ ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި ވާދަކުރައްވާ ޔާމީންގެ ރަނިންމޭޓަކަށް ޖަމީލް ހަމަޖައްސާފައިވާއިރު، މަޢުލޫމާތު ލިބޭ ގޮތުގައި މި ނިންމުމަކީ ޔާމީންގެ އަމިއްލަފުޅު ނިންމެވުމެކެވެ.
ޔާމީންގެ ވެރިކަމުގެ ފަހު ދުވަސްކޮޅުގައި ޖަމީލް ވަނީ ރާއްޖެ އިން ބޭރަށް ވަޑައިގެން ޕީޕީއެމް ސަރުކާރާ ދެކޮޅަށް މަސައްކަތް ކުރައްވައިފައެވެ. އިނގިރޭސިވިލާތުގައި އަމިއްލައަށް އަރުވާލެވިގެން ހުންނެވި ޖަމީލް އޭރުގެ ސަރުކާރާ ދެކޮޅަށް ވަރަށް އިސްކޮށް މަސައްކަތް ކުރައްވައި ރައީސް ޔާމީންގެ ބޮލުގައި ވައްކަމާއި ކޮރަޕްޝަންގެ އެތައް ތުހުމަތުތައް އެޅުވިއެވެ.
ޖަމީލް ވަނީ ޖުމްހޫރީ ޕާޓީ (ޖޭޕީ) ގައި ވެސް މަސައްކަތް ކުރައްވައިފައެވެ. 2019 ވަނަ އަހަރު ބޭއްވުނު ރައްޔިތުންގެ މަޖިލީހުގެ ވިލިމާލޭ ދާއިރާގެ އިންތިޚާބުގައި ނާކާމިޔާބުވެވަޑައިގަތެެވެ. އޭގެ ފަހުން އޭނާ އޭގެ ފަހުން، އޭނާ ވަނީ ޕީޕީއެމާ އަލުން ގުޅިވަޑައިގެން، ޔާމީންގެ ވަކީލެއްގެ ގޮތުގައި މަސައްކަތް ކުރައްވަން ފައްޓަވައިފައެވެ.
