ޕީޕީއެމްގެ ރިޔާސީ ކެންޑިޑޭޓް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ކެންޑިޑެސީ ބަލައިނުގަންނަން އިލެކްޝަން ކޮމިޝަން (އީސީ)ން ނިންމީ ޤާނޫނާ ޚިލާފަށް ކަމަށް ކުރީގެ އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީ ވިދާޅުވެއްޖެއެވެ.
އީސީން ވިދާޅުވީ، އެމަނިކުފާނުގެ ކެންޑިޑެސީ ފޯމް ގަބޫލު ނުކުރަން ނިންމާފައި ވަނީ ޖިނާއީ ކުށެއް ސާބިތުވެ 12 މަސް ދުވަހަށް ވުރެ ދިގު މުއްދަތަަށް (11 އަހަރު ދުވަހު) ގެ ހުކުމެއް އެމަނިކުފާނުގެ މައްޗަށް އައިސްފައިވާވުމާއެކު، މި ހުކުމް ތަންފީޒު ކޮށް ނިމިފައިނުވާކަން ހުށަހަޅާފައިވާ ކުށުގެ ރިކޯޑަށް ބެލެމުން އެނގެން އޮންނާތީ ކަމަށެެވެ.
"ޤާނޫނު އަސާސީގެ 109 ވަނަ މާއްދާގެ (ޅ) ގައި ބަޔާން ކުރާ ޝަރުތު ޢަބްދުﷲ ޔާމީން ޢަބްދުލްޤައްޔޫމްގެ ކިބިގައި ފުރިހަމަ ނުވެ".
އިސީގެ މި ނިންމެވުމާއި އިނގިލިދިއްކުރައްވައި، ކުރީގެ އުއްތަމަ ފަނޑިޔާރު ޑޑރ. އަޙްމަދު ޢަބްދުﷲ ދީދީ ވިދާޅުވީ، އިލެކްޝަން ކޮމިޝަނުން މިއަދު ރައީސް ޔާމީންގެ ފަރާތުން ރިޔާސީ އިންތިހާބަށް ކުރިމަތިލުމަށް ހުށަހެޅުއްވި ހުށަހެޅުން ބަލައި ނުގަންނަން ނިންމާފައި ޤާނޫނު އަސާސީ އާއި ޤާނޫނު އަސާސީން ކަނޑައަޅައިފައިވާ ދުސްތޫރީ އުސޫލުތަކާއި ޚިލާފަށް ކަމާމެދު އެއްވެސް ޝައްކެއްނެތް ކަމަށެވެ.
"ބުނެވުނެ ކެންޑިޑަސީ ގަބޫލުނުކުރުމަށް އިލެކްޝަންސް އިން ނިންމި ސަބަބަކީ ޤާނޫނު އަސާސީގެ 109 ވަނަ މާއްދާގެ (ޅ) ގައި ބުނާ ޝަރުޠު ފުރިހަމަ ނުވުންކަމަށް ބުނެފައިވާއިރު، އެމާއްދާގެ އެ އަކުރުގައި ބުނެފައިވާ ޖިނާއީ ހުކުމަކީ ތަންފީޒީ ބާރު ލިބިގެންވާ Executable ހުކުމެެއް ގެ ވާހަކަ ކަން ބުނެވުނު 109 ވަނަ މާއްދާގެ (ޅ) އަށް އެއްކޮށް ބެލުމުން އެނގޭ."
ޑރ. އަޙްމަދު ޢަބްދުﷲ ދީދީ ވިދާޅުވިއެވެ.
ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ކުރެއްވި ޓްވިޓްގައި ވިދާޅުވީ، ޖިނާއީ ޙުކުމަކަށް ތަންފީޒީ ބާރު ލިބޭނީ އެ ހުކުމެއް ނިހާއީ ޙުކުމަކަށް ވެގެން ކަމަށާއި، އަދި އެ ހުކުމެއް ނިހާއީ ހުކުމަކަށް ވާނީ އާންމު އުސޫލެއްގެ ގޮތުން، އިސްތިއުނާފުކުރުމުގެ ހައްގު ލިބިގެންވާ ފަރާތުން އެ ޙައްޤު ސަރީހަކޮށް ދޫކޮށްލުމުން ނުވަތަ އިސްތިއުނާފު ކުރުމުގެ މުއްދަތުގައި އިސްތިއުނާފު ނުކުރުމުން، ނުވަތަ އިސްތިއުނާފުގެ ޝަރްއީ ހުރިހާ މަރްހަލާތައް ހުކުމަށް ތާއީދުކޮށްގެން ނިމުމުން ކަމަށެވެ.
"ކަން މިހެން އޮތް އިރު އިލެކްޝަންސް ކޮމިޝަނުން ރައީސް ޔާމީން ތަންފީޒުކުރަމުންދާ ހުކުމެއް އޮތްކަމަށް އެ ބުނާ ހުކުމަކީ ހަގީގަތުގައި އިސްތިއުނާފުކުރުމުގެ ސަބަބު ތަންފީޒު ކުރުން ގާނޫނީގޮތުން ހުއްޓިފައިވާ ހުކުމެއް، ޝަރްއީ ނިޒާމުން ރައީސް ޔާމީން ގާނޫނީ އުސޫލުތަކާ ހިލާފަށް ހުކުމް ތަންފީޒުކުރާ ޖަލެއްގައި ބަންދުގައި ބެހެއްޓުމަކީ، އެއީ ތަންފީޒުކުރަމުންދާ ހުކުމެއްކަމަށް ބަލަންޖެހޭ ސަބަބެއް ނޫން".
ކުރީގެ އުއްތަމަ ފަނޑިޔާރު ވިދާޅުވިއެވެ.
އިލެކްޝަން ކޮމިޝަނުން މިއަދު ރައީސް ޔާމީންގެ ފަރާތުން ރިޔާސީ އިންތިޚާބަށް ކުރިމަތިލުމަށް ހުށަހެޅުއްވި ހުށަހެޅުން ބަލައި ނުގަންނަން ނިންމާފައިވަނީ ޤާނޫނުއަސާސީ އާއި ޤާނޫނު އަސާސީން ކަނޑައަޅައިފައިވާ ދުސްތޫރީ އުޞޫލުތަކާ ޚިލާފަށްކަމާ މެދު އެއްވެސް ޝައްކެއްނެތް؛ ބުނެވުނެ ކެންޑިޑަސީ…
— Dr. Ahmed Abdulla Didi (@AABDULLADIDI) August 1, 2023
އިންތިހާބުގައި ވާދަކުރާ ކެނޑިޑޭޓެއްގެ ކެންޑިޑެސީ އާއި މެދު ސުވާލު އުފައްދާ، ސުޕްރީމް ކޯޓަށް ހުށަހަޅާ މައްސަލަތައް ނިންމަން އެކޯޓަށް ހަތް ދުވަހުގެ މުހުލަތެއް ލިބޭނެއެވެ. އިންތިހާބަށް ކުރިމަތިލުމުގެ މުއްދަތު ހަމަވާނީ މިމަހުގެ ހަތް ވަނަ ދުވަހުއެވެ.
އިންތިހާބަށް ކުރިމަތިލާން އޮތް މުއްދަތު ހަމަވުމުގެ ކުރިން ރައީސް ޔާމީންގެ ކެންޑިޑެސީ އާއިމެދު އުފެދިފައިވާ ގާނޫނީ ސުވާލުތަކަށް ޖަވާބު ނުލިބިދާނެތީ، ބެކަޕް ޕްލޭންގެ ދަށުން ޕީއެންސީން ކެންޑިޑޭޓަކު ކަނޑައަޅަން ރައީސް ޔާމީން އިއްޔެ އެދިވަޑައިގެންނެވިއެވެ. އެކަމާގުޅިގެން ޕީއެންސީ އިން ނިންމީ އެޕާޓީގެ ކެންޑިޑޭޓެއް ކަނޑައެޅުމުގެ ބާރު ރައީސް ޔާމީނަށް ދިނުމަށެވެ.
