ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ކެންޑިޑެސީ، މިއަދު އިލެކްޝަންސް ކޮމިޝަނުން ބަލައި ނުގަތުމުން، އެ މައްސަލަ ސުޕްރީމް ކޯޓަށް ވެއްދުމުގެ މަސައްކަތް ޕީޕީއެމްއިން ފަށައިފިއެވެ.
އިލެކްޝަންސް ކޮމިޝަނުން ވިދާޅުވެފައިވަނީ، އެމަނިކުފާނުގެ ކެންޑިޑެސީ ފޯމް ޤަބޫލު ނުކުރަން ނިންމާފައި ވަނީ، ޖިނާއީ ކުށެއް ސާބިތުވެ 12 މަސް ދުވަހަށް ވުރެ ދިގު މުއްދަތަަށް (11 އަހަރު ދުވަހު) ގެ ހުކުމެއް އެމަނިކުފާނުގެ މައްޗަށް އައިސްފައިވާވުމާއެކު، މި ހުކުމް ތަންފީޒުކޮށް ނިމިފައިނުވާކަން ހުށަހަޅާފައިވާ ކުށުގެ ރިކޯޑަށް ބެލެމުން އެނގެން އޮންނާތީ ކަމަށެެވެ.
އިންތިޚާބުގައި ވާދަކުރާ ކެނޑިޑޭޓެއްގެ ކެންޑިޑެސީ އާއި މެދު ސުވާލު އުފައްދާ، ސުޕްރީމް ކޯޓަށް ހުށަހަޅާ މައްސަލަތައް ނިންމަން އެކޯޓަށް ހަތް ދުވަހުގެ މުހުލަތެއް ލިބޭނެއެވެ. އިންތިޚާބަށް ކުރިމަތިލުމުގެ މުއްދަތު ހަމަވާނީ މިމަހުގެ ހަތް ވަނަ ދުވަހުއެވެ.
އިންތިހާބަށް ކުރިމަތިލާން އޮތް މުއްދަތު ހަމަވުމުގެ ކުރިން ރައީސް ޔާމީންގެ ކެންޑިޑެސީ އާއިމެދު އުފެދިފައިވާ ޤާނޫނީ ސުވާލުތަކަށް ޖަވާބު ނުލިބިދާނެތީ، ބެކަޕް ޕްލޭންގެ ދަށުން ޕީއެންސީން ކެންޑިޑޭޓަކު ކަނޑައަޅަން ރައީސް ޔާމީން އިއްޔެ އެދިވަޑައިގެންނެވިއެވެ. އެކަމާގުޅިގެން ޕީއެންސީ އިން ނިންމީ އެޕާޓީގެ ކެންޑިޑޭޓެއް ކަނޑައެޅުމުގެ ބާރު ރައީސް ޔާމީނަށް ދިނުމަށެވެ. ޕީޕީއެމް ކޯލިޝަންގެ ސެނެޓްގެ ބަހެއް މިކަމުގައިވެސް ހޯދާފައެއް ނުވެއެވެ.
މި ހުރިހާ ކަމެއް ހިނގަމުން މިއަންނަނީ، ވޭތުވެދިޔަ ކައިރި މާޒީގައިވެސް އަދި އޭގެ ކުރިންވެސް މި ސުވާލާއެކު، މި މައްސަލަ ފެންމަތިވާނެ ކަން އެނގި ތިބެއެވެ. މިކަން މިހެން ވާނެ ކަން ސައިހޮޓާތަކާއި ހޮޅުއަށިތަކުން ފެށިގެން ޤައުމީ ބޮޑެތި ސައްލާތަކުގައާއި ސިޔާސީ ފޯރަމްތަކުގައިވެސް ދިޔައީ ފާހަގަކުރަމުންނެވެ. ކޮންމެ ގޮތެއްވިޔަސް، އިދިކޮޅު އެންމެ ބޮޑު ޕާޓީ، ޕީޕީއެމްގެ ރިޔާސީ ޓިކެޓް ލިބިވަޑައިގެންފައިވާ ކުރީގެ ރައީސްް ޔާމީންގެ ކެންޑިޑެސީގެ މައްސަލަ މިއަދު ވަރަށް ހޫނުވެއްޖެއެވެ. މިކަމުގެ އެންމެ ބޮޑު ކަންބޮޑުވުމެއް އުޅެނީ "ގްރާސްރޫޓް" ނުވަތަ ޕާޓީއަށް އިޚްލާޞްތެރިން މެންބަރުންގެ މެދުގައެވެ.
މިއަދު ދިމާވެގެން އުޅޭ ކަންތަކަކީ، ސިޔާސީ ޕާޓީއެއްގެ ޙަޔާތުގައި ދިމާވާނެ އެންމެ މުހިއްމު އެންމެ ޚައްޞާޞް މައްސަލައެެވެ. އެހެނީ، ކޮންމެ ސިޔާސީ ޕާޓީއެއްގެމެ އެންމެ މުހިއްމު އަސާސަކީ ވެރިކަމަށް އައުމެވެ. ސިޔާސީ ޕާޓީތަކުގެ އަސާސްތައް ބިނާވެ، އެ އަސާސްތައް ކުރިލާ ހެދެނީ ވެރިކަމަށް އަންނަން ކުރާ މަސައްކަތްތައް ކާމިޔާބުކޮށް، ވެރިކަމަށް އައުމުގައެވެ.
ކޮންމެ ސިޔާސީ ޕާޓީއެއްގައިވެސް ކަންތައްތައް ނިންމާ ގުނަވަންތަކެއް ހުރެއެވެ. ސިޔާސީ ޕާޓީތަކުގެ އެންމެ މުހިއްމު އަސާސަކީ ޑިމޮކްރެސީގެ މައިތަނބު ކަމަށްވާ މަޝްވަރާގެ މަތިވެރި އުސޫލުން ކަންކަން ހިންގުމެވެ. ކޮންމެ ޕާޓީއެއްގައިވެސް ލީޑަރޝިޕެއް އޮންނާނެެއެވެ. އެހެންނަމަވެސް، ސިޔާސީ ޕާޓީތަކުގެ އަސާސީ ޤަވާޢިދުގައި ވަރަށް ޞަރީޙަކޮށް ބަޔާންވެގެންވާ އެންމެ މުހިއްމު ބަޔަކީ، ކައުންސިލު ނުވަތަ ހިންގާ ކޮމިޓީ ނުވަތަ ސެނެޓް އާއި އޭގެ ދަށުން އުފެދި ހެދުމެން އަންނަ ގޮފިތަކެވެ.
ސުވާލަކީ، ސިިޔާސީ ޕާޓީގެ އެންމެ މުހިއްމު ގުނަވަނަށް ބާރުދީ، މަޝްވަރާގެ މަތިވެރި އުސޫލުން ކަންކަން ހިންގައި، ޕާޓީގެ އާންމު މެންބަރުންނާއި ޖުމްލަކޮށް މުޅި ޤައުމުގެ ރައްޔިތުންގެ މަސްލަޙަތު ޤާއިމުކުރުމަށް މަސައްކަތް ކުރެވޭތޯއެވެ؟
މިއީ ތުންތުން މަތިން އިވޭ ވާހަކައެއް ނޫނެވެ. ހަމަ ޙަޤީޤަތުގައިވެސް ވަމުން އަންނަ ކަމެކެވެ. އިވެމުންދާ ޙަޤީޤީ ވާހަކަތަކެވެ. ޕީޕީއެމް ކޯލިޝަންގެ ސެނެޓެއް އޮންނައިރު، އެ ސެނެޓްގެ މެދުގައި މަޝްވަރާކުރެވި ކަންކަން ނިންމަމުން ނުދާ ކަމުގެ ޝަކުވާއާއި ހިތްހަމަ ނުޖެހުންތައް ފާޅުކުރާ މަންޒަރު ފެންނަނީ މަދެއް ކޮށެއް ނޫނެވެ. ލީޑަރޝިޕްގައި އުޅޭ ދެތިން ބޭފުޅަކު އެކުވެލާފައި ނުވަތަ، ރައީސް ޔާމީން އޯޑަރ ދެއްވާކަންކަން ފޮލޯކޮށްލައި، ހަމަ އެކަނި ލިޑަރޝިޕަށް އެއޮއްބޮޑު ޕާޓީ ލެނބެން ޖެހުމުން، އާންމު މެންބަރުންނާއި މުޅި ގްރާސްރޫޓްގެ އުދާސްތައް ހިލިގެންދެއެވެ.
މިއީ ޕީޕީއެމް ކޯލިޝަނަށް ޚައްސާސް ދަނޑިވަޅެކެވެ. މިހާރު އެންމެ 6 ދުވަހަށް ވީއެވެ. ރައީސް ޔާމީންގެ ކެންޑިޑެސީ ފޯމް ބަލައި ނުގަތެވެ. އެވަރުންވެސް، މިކަމާ މަޝްވަރާކޮށްލައި ގޮތެއް ނިންމުމަށް "ސެނެޓް"އާ ހަމައަށް ނުގެންދަނީ ކީއްވެހޭ އާންމު މެންބަރުން އެބަ ސުވާލުކުރެއެވެ. ސެނެޓްއަކީ ހަމަ ޔަޤީނުންވެސް ރައީސް ޔާމީންގެ "ޖަދު" ދުއްވާލާނެ ބައެއް ނޫންކަން އެ ދަނީ ބުނަމުންނެވެ. ރައީސް ޔާމީނަށް އޮތީ އެއަށްވުރެ ބޮޑު ކުލަނަކާއި ލޯތްބެއް ޖެހިފައެވެ. ރައީސް ޔާމީން ވެރިކަމާ ޙަވާލުވުމަކީ ޕީޕީއެމް ކޯލިޝަންގެ ބޮޑު ބައި ބޭނުންވާނެ ގޮތް ކަން ޔަޤީނެވެ.
ދޭތެރެއަކުން ޑރ. މުޢިއްޒު ރޮއްވާލައެވެ. އެވަރުން ނުވެގެން ޑރ. ޝަހީމް ރޮއްވާލައެވެ. އެކަކު އަނެކަކަށް ޝައްކު ކުރަނީއެވެ. ސިއްރިޔާތުގައި ގޯސް މެސެޖުތައް ފޯރުކޮށްދެވެނީއެވެ. ދޭ ތެރެއަކުން ޕީޕީއެމް ކޯލިޝަންގެ ވެރިޔާ ޢަބްދުއްރަޙީމްއާ ވެސް ޖެހިގެން ފާނެއެވެ. ކުރީގެ މަޖިލިަސް މެންބަރަކު، ރައީސް ޔާމީން އަރިހުގައި އަދުރޭއޭ ކިޔައިގެން "ކުޓްވާލަފާނެ”އެވެ. މިހުންނަނީ ދެރަ ކަންކަމެވެ. ޕާޓީ ތެރޭގައި ކޫސަނިވަނީއެވެ. ކުނިޖެހެނީއެވެ. ޕީޕީއެމްއަކީ ބޮޑު ސިޔާސީ ޕާޓީއެކެވެ. އެހެންނަމަވެސް، މިއަހަރުގެ ސެޕްޓެންބަރު މަހު ބާއްވާ ރިޔާސީ އިންތިޚާބަށް ވަގުތު ކައިރިވެ، ކެންޑިޑެސީ އަށް އިޢުލާންކޮށް އިންތިޚާބުގެ މަރުޙަލާތައް ހުޅުވެމުން ނިއުޅެމުންދާއިރުވެސް، ޤައުމުގެ މުސްތަޤްބަލާ ދޭތެރޭ ވިސްނާލަައިފައިނަމަވެސް، މަޝްވަރާއަށް ހުޅުވާނުލަނީ ކީއްވެހެއްޔެވެ؟
މަޝްވަރާއަކީ ވަރަށްވެސް ފޮނި މީރުކަމެއް އެކުލެވޭ ކަމަކަށްވީއިރު، މި ރީތި މޮޅު ގޮތް އިޚްތިޔާރުކުރުމަށް ފަސްޖެހެނީ ކީއްވެހެއްޔެވެ؟
ރިޔާސީ ކެންޑިޑޭޓަކަށް ރައީސް ޔާމީންއަށް ފުރުޞަތު ނުލިބިއްޖެ ޙާލަތެއްގައި ދެން ހަދާނެ ގޮތަކާ މެދު މަޝްވަރާކޮށްލަން، "ސެނެޓް" އަށް މައްސަލަ ވައްދާ ނިކަން މިނިވަން ބަހުސެއް ކޮށްލަން ހިފަހައްޓަންވީ ސަބަބެއް އޮތް ކަމަކަށް ނުދެކެމެވެ. މަޝްވަރާކޮށްގެން ނުކުންނާނީ ރަނގަޅު ދިޔައެކެވެ. އެހެނީ، އެ ޕާޓީގައި ލައްކަ މޮޅަށް ކިޔަވައިގެންތިބި، ތަޖްރިބާ ލިބިފައިވާ ފަންނުވެރިން އެބަ ތިއްބެވެ، ސިޔާސީ މޮޅެތި މުފައްކިރުން އެބަތިއްބެވެ. ސަރުކާރު ހިންގުމަށް ކުޅަދާނަ ފަހުލަވާނުން އެބަ ތިއްބެވެ.
މި މުހިއްމު ދަނޑިވަޅުގައި ވާގިނެތިފައި އޮންނަހެން "ސެނެޓް" ނުބާއްވައި، ނިކަން މޮޅަށް ރުކުރުވާލެވިއްޖެނަމަ، އެ ސެނެޓްގެ މެންބަރުންގެ ހީވާގިކަން އިތުރުވެ، ޕީޕީއެމްއާއި ޤައުމަށް އެންމެ ފައިދާހުރި ނިންމުމެެއް ނިންމާނެ ކަމާމެދު އެއްވެސް ސުވާލެއް ނުއުފެދެއެވެ.
