މި ސަރުކާރަށް ދިވެހި ރައްޔިތުންގެ ތާއީދު ނެތްކަން ސާފުވުމުން މަސައްކަތް ކުރަމުންދަނީ ދަ ޑިމޮކްރެޓްސް ޕާޓީގެ ތެރޭގައި ފިތުނަ އުފައްދަން ކަމަށް، ޑިމޮކްރެޓްސް އުފެއްދުމުގައި އިސްކޮށް ޙަރަކާތްތެރިވެވަޑައިގެންނެވި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ވިދާޅުވެއްޖެއެވެ.
"އަޅުގަނޑާ ގުޅުވާފައި ވެސް ދޮގު ވާހަކަތައް ފަތުރާ މި ޕާޓީތެރޭ ފިތުނަ އުފައްދަން މަސައްކަތްކުރާތީ ދަންނަވަން. ސަރުކާރުގެ ދޯހަޅި ސިޔާސަތާއި ދަރަންޏާ ކޮރަޕްޝަނާ ގުޅޭ ގޮތުން ވާހަކަ ދެއްކުން ހުއްޓައެއް ނުލާނަން. ދަ ޑިމޮކްރެޓްސްއަށް ރައްޔިތުން ކުރާ އިތުބާރު ދަނީ ދުވަހެއް ދުވަހަކަށް އިތުރުވަމުންކަން ވަރަށް ސާފު."
އަމްރުގެ ބަޔާނުގައި ވެއެވެ.
އަމްރުގެ ފުރިހަމަ ތާއީދު ދަ ޑިމޮކްރެޓްސް ކެނޑިޑޭޓަށް އެބައޮތް ކަމަށާއި އަދި މިހާރު ވެސް ދަނީ ކެމްޕޭން ރޭވުމާ ހަރަކާތްތައް ހިންގުމުގެ މަސައްކަތުގެ ފުރިހަމައަށް ބައިވެރިވަމުން ކަމަށްވެސް އަމްރު ވިދާޅުވިއެވެ.
ސަރުކާރަށް ތާއިދެއް ނެތްކަން ސާފުވުމުން ފިތުނަ އުފައްދަން ފަތުރާ ދެއުޅިއެއްނުވާ ދޮގު ވާހަކައަކުން ދިވެހި ރައްޔިތުންނަށް އަޅުގަޑަކީ ކާކުކަން އޮޅުވައެއް ނުލެވޭނެ. pic.twitter.com/jStj1PIXLi
— Amr 🎈 (@HusenAmr) August 1, 2023
ފުރިހަމައަށް ޤަބޫލުކުރާ އަސާސްތައް ނެގެހެއްޓުމަށާއި ދިވެހިންނަށް އުންމީދީ ފުދުންތެރި މުސްތަގުބަލެއް ހޯދަދެވޭނެ ޕާޓީއަކީ ދަ ޑިމޮކްރެޓްސްކަން ޤަބޫލްކުރެވޭތީ އެ ޕާޓީ އުފެއްދުމުގައި ވެސް އަދި ކުރިއެރުވުމުގައިވެސް ދެމިހުރުމަކީ ލިބޭ އުފަލެއް ކަމަށް އަމްރު ފާހަގަ ކުރައްވާފައިވެއެވެ.
