ޕްލާސްޓިކް ފުޅީގައި ހުންނަ ސުޕާރީވެސް 1 ޖެނުއަރީ 2024 އިން ފެށިގެން ވިއްކުން މަނާކުރުމަށް ނިންމަވައިފިއެވެ. މިކަން މިގޮތަށް ނިންމަވައި، "އެއް ފަހަރު ބޭނުންކޮށްފައި އުކާލާ ޕްލާސްޓިކް އެތެރެކޮށް ބޭނުންކުރުން މަނާކުރުމަށް ރައީސުލްޖުމްހޫރިއްޔާގެ ޤަރާރަކުން ކަނޑައަޅާފައިވާ އުސޫލު" ވެސްވަނީ މުރަޖާޢާކުރައްވާފައެވެ.
އެންވައިރުމަންޓް މިނިސްޓްރީން ވިދާޅުވީ ތިމާވެއްޓަށް ގެއްލުންދޭ، އެއްފަހަރު ބޭނުންކޮށްފައި އުކާލާ ޕްލާސްޓިކްގެ ބާވަތްތަކުގެ ތެރެއިން ރައީސުލްޖުމްހޫރިއްޔާގެ ޤަރާރަކުން ކަނޑައަޅުއްވާފައިވާ 13 ބާވަތުގެ ތެރެއިން 2 ބާވަތަކަށް އިސްލާޙު ގެންނަވާފައިވާކަމަށެވެ. އެގޮތުން ރާއްޖެއަށް އެތެރެކޮށް ވިއްކުން މަނާ އެއް ބާވަތަކީ ޕްލާސްޓިކް ކޮތަޅުގައި ބަންދުކޮށްފައިވާ ސުޕާރީއެވެ.
މިބާވަތް މަނާވެފައި އޮތްނަމަވެސް، ޕްލާސްޓިކް ފުޅީގައި ބަންދުކޮށްފައި ހުންނަ ސުޕާރީ އެތެރެކޮށް ވިއްކަމުންދާކަން ފަހަކަށް އައިސް ފާހަގަކުރެވިފައިވާކަމަށާއި، އެހެންކަމުން އެއްފަހަރު ބޭނުންކޮށްފައި އުކާލާ ފަދަ ބާވަތްތަކުގައި ނުވަތަ ޕްލާސްޓިކް ފުޅީގައި ބަންދުކޮށް ވިއްކަމުންދާ ސުޕާރީގެ ބާވަތްތައް "ރާއްޖެއަށް އެތެރެކޮށް ވިއްކުން މަނާ ޕްލާސްޓިކްގެ" ލިސްޓުގައި ހިމަނުއްވާފައިވާ ކަމަށެވެ. އަދި 1 ޖެނުއަރީ 2024އިން ފެށިގެން އެއްފަހަރު ބޭނުންކޮށްފައި އުކާލާ ފަދަ ބާވަތްތަކުގައި ނުވަތަ ޕްލާސްޓިކް ފުޅީގައި ބަންދުކޮށް ވިއްކަމުންދާ ސުޕާރީގެ ބާވަތްތައް ބޭނުންކުރުން މަނާވާނެކަމަށް އެންވަޔަރަންމަންޓް މިނިސްޓްރީން ވިދާޅުވެއެވެ.
މިލިސްޓުގެ ތެރެއިން ދެން އިސްލާޙު ގެންނަވާފައިވަނީ 50 މައިކްރޯންއަށްވުރެ ތުނި ޕްލާސްޓިކް ކޮތަޅުގެ ބާވަތްތަކެވެ. އެންވަޔަރަމަންޓް މިނިސްޓްރީން ވިދާޅުވީ، ރާއްޖެއަށް މިބާވަތް އެތެރެކުރުމަށް ހުއްދަ ދޫކޮށްފައިވާ މުއްދަތުގައި، އެއްކުރެވިފައިވާ ސާމްޕަލްތަކުން ރާއްޖެއަށް އެތެރެކުރާ ހުރިހާ ކޮތަޅެއްގެ ބޯމިންވެސް ހުންނަނީ 50 މައިކްރޯންއަށްވުރެ ތުނިކޮށްކަން ރިކޯޑުކުރެވިފައިވާކަމަށެވެ.
އެއްފަހަރު ބޭނުންކޮށްފައި އުކާލާ ޕްލާސްޓިކްގެ 13 ބާވަތެއް ރާއްޖެއަށް އެތެރެކޮށް ބޭނުންކުރުން މަނާކުރައްވާފައިވަނީ ރާއްޖޭގެ ނާޒުކު ތިމާވެށި ޙިމާޔަތްކުރެއްވުމަށް ސީދާ ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން ކަނޑައަޅުއްވާފައިވާ ޤަރާރަކުންނެވެ. މީގެތެރެއިން 12 ބާވަތެއް ރާއްޖެއަށް އެތެރެކޮށް ބޭނުންކުރުން މަނާކުރައްވައި އަންނަނީ ތަންފީޒުކުރައްވަމުންނެވެ.
