ބ. ތުޅާދޫގައި އާއިލާއެއް ދިރިއުޅޭނެ ތަނެއް ނެތި، ބިކަހާލުގައި ޖެހި ދަރިންނާއެކު ކައުންސިލް ދޮށުގައި މިއަދު އިހުތިޖާޖު ކޮށްފިއެވެ.
ދެމަފިރިންނާއި ތިން ދަރިންގެ އިތުރުން މާމަ ކިޔާ ދެ ކުދިންނާއެކު މިއަދު ހެނދުނު ކައުންސިލް އިދާރާގެ ކުރިމަތީގައި އިށީނދެ ތިބެ އިހްތިޖާޖްކުރަމުންދިޔައިއިރު، އެ މީހުން ތިބީ އެކިއެކި ޝުއޫރުތައް ލިޔެފައި ޕޯސްޓަރުތައް ހިފައިގެންނެވެ.
އެމީހުން ބުނަމުން ދިޔައީ، ގެވަޅެއް ހޯދަން، ސިޓީ ލިޔެ، އެކަމާ އުޅެއުޅެ ގެވަޅެއް ލިބިފައި ނުވާކަމަށެވެ. އަދި ދިރިއުޅެމުންދަނީ ކުޑަ ތަންކޮޅެއްގައި ކަމުން ދިރިއުޅެން ދަތިވެފައިވާ ކަމަށްވެސް އެ އާއިލާއިން ފާހަގަކުރެއެވެ.
އުޅޭނެ ތަނެއް ނެތުމުން ކައުންސިލަރުންނާއި ކިތަންމެ ފަހަރަކު ވާހަކަ ދައްކަމުން އައިސްފައިވާ ކަމަށާއި، އެކަމަކު ފްލެޓް ދޭއިރު ތަނެއް ނެތް މީހުންނަށް ފުރުސަތު ނުދޭ ކަމަށް ފާހަގަކުރަމުން، އެ އާއިލާއިން ބުނީ ދަރިން ގިިނައިން ތިބި މީހުންނަށް ފްލެޓްދޭ ވާހަކަ ކައުންސިލުން ބުނަމުންދާ ކަމަށެވެ. ނަމަވެސް ފޯޯމްލާލާ ވަރުބަލިވެއްޖެކަމަށާއި، އެއްވެސް ފަހަރަކު ފުލެޓް ލިބޭ ތަނެއް ނާންނަކަމަށްވެސް އެއާއިލާއިން ބުނެއެވެ.
އަދި އެ އާއިލާ އޮތީ މަގުމަތިވެފައި ކަމަށާއި، ކައުންސިލުން ވަގުތީ ހިޔާވަހިކަމެއް ދޭނެ ކަމަށް ބުނިނަމަވެސް އެކަންވެސް ކޮށްދީފައި ނުވާކަމަށް އެއާއިލާއިން ފާހަގަކުރެއެވެ.
މި ކަމާގުޅިގެން ކައުންސިލުން ރިޕޯޓްކޮށްފައިވަނީ، އެކަމަށް ހައްލެއް ހޯދަން މަސައްކަތް ކުރަމުންދާ ކަމަށެވެ އެ މައްސަލައިގައި ފަރުުދީ ގޮތުން މައިންބަފައިންގެ ޒިންމާއެއް ވެސް އޮންނަން ޖެހޭނެ ކަމަށް ޤަބޫލުކުރާ ކަމަށްވެސް ހާމަކޮށްފައިވެއެވެ. އަދި އެއާއިލާއަށް ދިމާވެފައިވާ ދަތިތަކާ ގުޅިގެން ޖެންޑާ މިނިސްޓްރީއާ މަޝްވަރާކުރަމުންދާކަމަށްވެސް ކައުންސިލުން ވިދާޅުވެއެވެ.
