ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް، އަބްދުﷲ ޔާމީން ޢަބްދުލްޤައްޔޫމަށް ކުރިއަށް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް އިލެކްޝަންސް ކޮމިޝަނުން ނިންމި ނިންމުމާއި ދެކޮޅަށް އެމަނިކުފާނު ސުޕްރީމް ކޯޓަށް ހުށަހެޅި މައްސަލައިގެ އަޑުއެހުންތައް ނިންމާލައިފިއެވެ.
ހަވީރު 3:45 ގައި ފެށި ޝަރީއަތުގެ އަޑުއެހުންތައް ދެންމެ ވަނީ ނިންމާލާފައެވެ. ޝަރީޢަތުފެ އަޑުއެހުމުގައި، މައްސަލަ ހުށަހެޅި ފަރާތް، މައްސަލަ ރައްދުވާ ފަރާތުގެ އިތުރުން މައްސަލައިގައި ތަދައްހުލުވެފައިވާ ފަރާތްތަކަށް ވާހަކަ ދެއްކުމުގެ ފުރުސަތު ފަނޑިޔާރުންގެ ބެންޗުން ވަނީ ދެއްވާފައެވެ.
7 ގަޑިއިރަށް ދިގު ދެމިގެން ދިޔަ މި ޝަރީއަތުގެ އަޑުއެހުމުގައި އިލެކްޝަންސް ކޮމިޝަންގެ ވަކީލް، މަހްފޫޒް ސައީދު ވަނީ ރައީސް ޔާމީނަށް އިންތިހާބުގައި ކުރިމަތި ނުލެވޭކަން ކަނޑައަޅާފައިވަނީ ހަމައެކަނި ޤާނޫނުގެ 109 ވަނަ މާއްދާގެ (ޅ) އާއި ގުޅިގެން ނޫން ކަމަށާއި، އެކަން އެގޮތަށް ނިންމާފައިވަނީ އެމަނިކުފާނުގެ މައްޗަށް "ސާބިތު ދަރަންޏެއް" ވެސް އޮތުމުން ކަމަށެވެ.
އެކަމަށް ރައްދުދެއްވައި، ރައީސް ޔާމީންގެ ވަކީލް، ހަމްޒާ ލަތީފް ވިދާޅުވީ، އިލެކްޝަނުން އެންމެ ފުރަތަމަ ފޮނުވި ލިޔުމުގައި "ސާބިތު ދަރަންޏެއް"ގެ ވާހަކަ ނެތް ކަމަށެވެ. އެކަން ހިނގާދިޔަ ގޮތް ކިޔާ ދިނުމަށް އިލެކްޝަންސް ކޮމިޝަންގެ ވަކީލުންނަށް ފުރުސަތު އެރުވުމުން މަހްފޫޒު ވިދާޅުވީ، އެންމެ ފުރަތަމަ ފޮނުވި ލިޔުމުގައި "ސާބިތު ދަރަނީ"ގެ ވާހަކަ ނެތް ކަމަށާއި އެކަން އެގޮތަށް ހިނގާދިޔައީ އިދާރީ އޮޅުމަކުން ކަމަށެވެ. ނަމަވެސް ފަހުން އެކަން ޕާޓީއަށް އަންގާފައިވާ ކަމަށް މަހްފޫޒު ވިދާޅުވިއެވެ.
އޭގެ ފަހުން ޔާމީންގެ ވަކީލް، ހަމްޒާ ވަނީ ފަސް މިލިއަން ޑޮލަރުގެ ޖޫރިމަނާއެއް ދެއްކުމަށް ކްރިމިނަލް ކޯޓުން ކޮށްފައިވާ ހުކުމާ އެއްގޮތަށް އެ ދަރަނި ނުދައްކާތީ ވެސް ކެންޑިޑެސީ ބާތިލުވާނެ ކަމަށް އިލެކްޝަންސް ކޮމިޝަނުން ބުނާ ނުކުތާއަށް ޗެލެންޖު ކުރަން ޔާމީންގެ ވަކީލުން ޝަރީއަތުގައި އެދިވަޑައިގެންފައެވެ.
އަޑުއެހުންތައް ނިންމާލުމަށް ދިން ފުރުސަތުގައި އީސީގެ ވަކީލުންނާއި މައްސަލައިގައި ތަދައްހުލު ކުރުވި، އެޓާނީ ޖެނެރަލްގެ ވަކީލުން ރައީސް ޔާމީނަށް އިންތިހާބުގައި ވާދަ ނުކުރެއްވޭނެ ކަމަށް އިލެކްޝަންސް ކޮމިޝަނުން ނިންމި ނިންމުން ދަމަހައްޓަން އެދިވަޑައިގެންނެވިއެވެ.
އަޑު އެހުންތައް ނިންމާލައްވަމުން އުއްތަމަފަނޑިޔާރު އަލްއުސްތާޛު އަޙްމަދު މުއުތަސިމް އަދުނާން ވިދާޅުވީ، އަޑުއެހުންތަކަށް ފަހުން، ފަނޑިޔާރުން ބަހުސް ކުރައްވާނެ ކަމަށެވެ. އަދި، ބަހުސް ކުރެއްވުމުގެ ތެރެއިން އިތުރު ކަމެއް ސާފު ކުރަން އޮތް ކަމަށްވާނަމަ، އިތުރު އަޑުއެހުމެއް ބާއްވާނެ ކަމަށެވެ. އިތުރު ކަމެއް ސާފު ކުރަން ނެތްނަމަ، ދެން ޝަރީއަތުގެ މަޖިލީހެއް ބާއްވާނީ މައްސަލަ ނިންމަން ކަމަށް ވެސް އުއްތަމަފަނޑިޔާރު އަލްއުސްތާޛު އަޙްމަދު މުއުތަސިމް އަދުނާން ފާހަގަކުރެއްވިއެވެ.
