ބޯގަނވިލާއަކީ ރީތި މަލެކެވެ. ރާއްޖޭގައިވެސް އާންމު ގޮތެއްގައި ހައްދާ އުޅޭ ގަހެކެވެ. ގޯތިތެރޭގެ ބަގީޗާގައި ރަސްކަންކުރަމުން އަންނަ މަލަކީ ބޯގަނވިލާއޭ ބުންޏަށް ދޮގަކަށް ނުވާނެއެވެ.
މިހާރު ރާއްޖޭގެ އެކި ރަށްރަށުގައި މަގުމަތީގެ ރީތިކަން ފެނިގެންދާ އެއްކަމަކީވެސް ތަފާތު ކުލަކުލައިގެ ބޯގަނވިލާ މާ ގިނަ އަދަދަކަށް ހައްދާފައިވުމެވެ.
މާއަޅާ ގަސްހެއްދުމަކީ، ހިތްހަމަޖެހުން ލިއްބައިދޭނެ ކަމެކެވެ. ޚާއްޞަކޮށް ބޯގަނވިލާ މަލަކީ އޭގެ ފިޔަތައް ހުންނަލެއް ރީތިކަމުންނާއި، ތަފާތު ކުލަކުލައިގެ މަލުގެ ސަބަބުން އަޅުގަނޑުމެން ހިތްތަކަށް ތާޒާކަމާއި އާރޯކަން ގެނުވާ ކަމެކެވެ. "ސްޓްރެސް" ވުމާއި ހާސްކަމުން ދުުރުކޮށްދޭނެ ފަސޭހަ މަގެކެވެ.
މަގުމަތީގެ ހިތްހަމަޖެހުން ލިއްބައިދޭ އެއްކަމަކީ ބޯގަނވިލާ މާ ފޮޅިފައިވާ މަންޒަރު ފެނުން ކަމަށްވާއިރު ގޭތެރެއިން ނުވަތަ ގޯތި ތެރެއިން މި މަންޒަރު ފެންނާނެ ގޮތެއް ހަދާނީ ކިހިނެތް ހެއްޔެވެ؟ ގޭތެރޭގައި ޕޮޓުގައި ބޯގަނވިލާ ހައްދާނީ ކިހިނެތް ހެއްޔެވެ؟
މަތީގައިވާ ފޮޓޯގައި އެވާ ބޯގަނވިލާއަކީ ރާއްޖޭގައި އާންމުކޮށް ހައްދާ ގަހެކެވެ. ނަމަވެސް ގޭތެރޭގައި ޕޮޓުގައިވެސް ފަސޭހަ ކަމާއެކު ހެއްދިދާނެ ގަހެކެވެ. 4 އިންޗިއާއި 8 އިންޗިއާ ދެމެދުގެ ހުސްމިނަކަށް، 3 އިންޗިއާއި 6 އިންޗިއާ ދމެދުގެ ފުޅާ މިނަކަށް ހައްދައިލެވޭނެއެވެ. އެ ސައިޒަކީ ގޭތެރޭގައި ބަހައްޓާލަން ވަރަށް ރަގަޅު ސައިޒަކަށް ވާނެއެވެ.
މިވައްތަރުގެ ބޯގަނވިލާއަކީ ޕޮޓުތެރޭގައި މޫތަށް ގިނަވެ، ގަހުގެ ރީތިކަން ގެއްލޭނެ ގަހެއް ނޫނެވެ.
ޕޮޓުގައި ބޯގަނވިލާ ހައްދާނަމަ، ފޮޓުގެ ފުލުގައި ލޯވަޅުތަކެއް ތޮރުފަން ވާނެއެވެ. އެހެންނޫންނަމަ، ޕޮޓުތެރޭގައި ފެން ގިނަވެ، މޫތަައް މަރުވާ ގޮތްވާނެއެވެ.
ގަސްހަރުލާ ގޮތަށް ބެހެއްޓުމަށްޓަކައި، ޕޮޓަށް އެއްޗެއް ޖަހާނަމަ، ގަސް އިންދުމުގެ ކުރިން އެއްޗެއް ޖަހާށެވެ. އެހެން ނޫނަމަ، ފަހުން އެއްޗެއް ޖަހަން އުޅެގެން ގަސް މަރުވުމަކީ އެކަށީގެންވާ ކަމެކެވެ.
ގަސް އިންދުމަށްފަހު ޤަވާޢިދުން ފެންޖެހުމަކީ ވަރަށް މުހިއްމުކަމެކެވެ. ފެން ޖަހާނީ އަބަދުވެސް ފަސްކޮޅުގެ މަތި އެއްކޮށް ހިކިފައިވާކަން ކަށަވަރުވުމުންނެވެ.
ގޭތެރޭގައި ހެއްދިޔަސް އިރުގެ އަލި، ދުވާލަކު 6 ގަޑިއިރު ލިބޭނެ ގޮތަށް ޕޮޓު ބަހައްޓަން ސަމާލުކަން ދޭންވާނެއެވެ. އެއީ މަލަށް ރީތިކަމާއި ތާޒާކަން ގެނައުމަށް ކުރަންޖެހޭ ކަމެކެވެ.
ގަސް ރީތިކޮށް ބެހެއްޓުމަށްޓަކައި ދެ ހަފުތާއި ދެހަފުތާއިން ގަހަށް ފާޓިލައިޒާ އަޅަންވާނެއެވެ.
މަތީގައި ބުނެފައިވާ ބޯގަނވިލާ ނޫނަށް ތިރީގައިވާ ބޯގަނވިލާ ހެއްދޭނެއެވެ.
- އަފްޓަރގްލޯ
- ބާރބަރާ ކާސްޓް
- ކެލިފޯނިޔާ ގޯލްޑް
- އިމްޕީރިއަލް ޑިލައިޓް
- ޖޭމްސް ވޯކާރ
- މޮނެތު
- ސަންޑައުން އޮރެންޖް
- ބެންގަލް އޮރެންޖް
- ރޯސެންކާ
- ސިންގަޕޯރ ވައިޓް
- ހެލެން ޖޯންސަން
- ޕިކްޒީީ
