ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް، އަބްދުﷲ ޔާމީން އަބްދުލްގައްޔޫމަށް ކުރިއަށް އޮތް ރިޔާސީ އިންތިހާބުގައި ވާދަ ނުކުރެއްވޭނެ ކަމަށް އިލެކްޝަންސް ކޮމިޝަން (އީސީ)ން ނިންމި ނިންމުމާއި ދެކޮޅަށް އެމަނިކުފާނު ސުޕްރީމް ކޯޓަށް ހުށަހެޅި މައްސަލައިގެ ހުކުމް ކުރުން މާދަމާއަށް ތާވަލު ކޮށްފިއެވެ.
އިލެކްޝަންސް ކޮމިޝަންގެ ނިންމުމާއި ދެކޮޅަށް އެމަނިކުފާނު ސުޕްރީމް ކޯޓަށް ހުށަހެޅި މައްސަލައިގެ އަޑުއެހުންތައް އިއްޔެ ވަނީ ނިންމާލައިފައެވެ.
އިއްޔެ ހަވީރު 3:45 ގައި ފެށި ޝަރީއަތުގެ އަޑުއެހުންތައް ހަތް ގަޑިއިރަށް ދެމިގެން ދިޔައެވެ، އެ މައްސަލަ ހުށަހެޅި ފަރާތް، މައްސަލަ ރައްދުވާ ފަރާތުގެ އިތުރުން މައްސަލައިގައި ތަދައްހުލުވެފައިވާ ފަރާތްތަކަށް ވާހަކަ ދެއްކުމުގެ ފުރުސަތު ފަނޑިޔާރުންގެ ބެންޗުން ދެއްވިއެވެ.
އެނގިފައިވާގޮތުން މި މައްސަލައިގެ ހުކުމް ކުރުންް މާދަމާ ހެނދުނު 10:00 އަށް ވަނީ ތާވަލު ކޮށްފައެވެ.
އިއްޔެ ކުރިއަށްގެންދިޔަ ޝަރީއަތުގެ އަޑުއެހުމުގައި އިލެކްޝަންސް ކޮމިޝަން (އީސީ)ގެ ވަކީލް، މަހްފޫޒް ސައީދު ވަނީ ރައީސް ޔާމީނަށް އިންތިހާބުގައި ކުރިމަތި ނުލެވޭކަން ކަނޑައަޅާފައިވަނީ ހަމައެކަނި ޤާނޫނުގެ 109 ވަނަ މާއްދާގެ (ޅ) އާއި ގުޅިގެން ނޫން ކަމަށް ވިދާޅުވެފައެވެ. އަދި އެކަން އެގޮތަށް ނިންމާފައިވަނީ އެމަނިކުފާނުގެ މައްޗަށް "ސާބިތު ދަރަންޏެއް" ވެސް އޮތުމުން ކަމަށް އޭނާ ވިދާޅުވިއެވެ.
އެކަމާއި ގުޅިގެން ރައީސް ޔާމީންގެ ވަކީލް، ހަމްޒާ ލަތީފް ވިދާޅުވީ، އިލެކްޝަނުން އެންމެ ފުރަތަމަ ފޮނުވި ލިޔުމުގައި "ސާބިތު ދަރަންޏެއް"ގެ ވާހަކަ ނެތް ކަމަށެވެ. އެކަން ހިނގާދިޔަ ގޮތް ކިޔާ ދިނުމަށް އީސީގެ ވަކީލުންނަށް ފުރުސަތު އެރުވުމުން މަހްފޫޒު ވިދާޅުވީ، އެންމެ ފުރަތަމަ ފޮނުވި ލިޔުމުގައި "ސާބިތު ދަރަނީ"ގެ ވާހަކަ ނެތް ކަމަށާއި އެކަން އެގޮތަށް ހިނގާދިޔައީ އިދާރީ އޮޅުމަކުން ކަމަށެވެ.
ފަހުން އެކަން ޕާޓީއަށް އަންގާފައިވާ ކަމަށް މަހްފޫޒު ވިދާޅުވިއެވެ. ފަހުން ވާހަކަ ދައްކަވަމުން ޔާމީންގެ ވަކީލް، ހަމްޒާ ވަނީ ފަސް މިލިއަން ޑޮލަރުގެ ޖޫރިމަނާއެއް ދެއްކުމަށް ކްރިމިނަލް ކޯޓުން ކޮށްފައިވާ ހުކުމާ އެއްގޮތަށް އެ ދަރަނި ނުދައްކާތީ ވެސް ކެންޑިޑެސީ ބާތިލުވާނެ ކަމަށް އިލެކްޝަންސް ކޮމިޝަނުން ބުނާ ނުކުތާއަށް ޗެލެންޖު ކުރަން ޔާމީންގެ ވަކީލުން ޝަރީއަތުގައި ވަނީ އެދިވަޑައިގެންފައެެވެ.
