ކުރީގެ ޓޫރިޒަމް މިނިސްޓަރކަން ކުރައްވާފައިވާ ތަޢުލީމީ ދާއިރާގެ ތަޖުރިބާކާރު، ޑރ. މަހްމޫދް ޝައުޤީ ޖުމްހޫރީ ޕާޓީ (ޖޭޕީ)އަށް ސޮއި ކުރައްވައިފިއެވެ.
ޑރ. ޝައުޤީ އެ ޕާޓީއަށް ސޮއިކުރެއްވީ މިއަދު މެންދުރު އެ ޕާޓީގެ އޮފީސް މ. ކުނޫޒްގައި ބޭއްވި ރަސްމިއްޔާތެއްގައެވެ.
ސައުގީގެ ޝައުޤީގެ މެންބާޝިޕް ފޯމާއި ހަވާލުވެވަޑައިގަތީ ޖޭޕީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމެވެ.
މި ރަސްމިއްޔާތުގައި ޤާސިމް ވިދާޅުވީ، ޑރ. ޝައުގީ މި ގައުމަށްޓަކައި އިހްލާސްތެރި މަސައްކަތްތަކެއް ކޮށްދިނުމުގެ ވިސްނުންފުޅު އެބަ ހުރި ކަމަށެވެ. ޑރ. ޝައުޤީ ވިދާޅުވެފައިވަނީ، އެ ޕާޓީއަށް ސޮއި ކުރީ އަދިވެސް ސިޔާސީ މީހަކަށް ވުމުގެ ބޭނުމުގައި ނޫން ކަމަށާއި، އަދި އޭނާއަކީ ފަންނީ މީހެއް ކަަމަށާއި، އަދި މަސައްކަތް ކުރަނީވެސް ފަންނީ މީހެއްގެ ގޮތުގައި މަަސައްކަތް ކުރުމަށް ކަމަށެވެ.
"އަޅުގަނޑު މި ނިންމުން މިއަދު މި ނިންމީ އަޅުގަނޑަށް ޝައްކެއް ނެތް މިންވަރަށް އެނގޭ ގާސިމް އިބްރާހިމް އަކީ މި ދިވެހި ގައުމު ދެކެ ވަރަށް ލޯބިވާ ގައުމަށް ވަފާތެރި ބޭފުޅެއް، ރާއްޖޭގެ މިނިވަންކަމާއި ސިޔާދަތު ގާސިމްގެ ވެރިކަމެއްގައި ހިމާޔަތް ކުރާނެ ކަމާއި ދޭތެރޭގައި އަޅުގަނޑު އެއްވެސް ޝައްކެއް ނެތް".
ޝައުޤީ ވިދާޅުވިއެެވެ.
އަދި ޤާސިމް ވަނީ އޭނާގެ އެޑްވައިޒަރު ކަމުގެ މަގަމަށް ޑރ. ޝައުޤީ ހަމަަޖައްސަވާފައެވެ.
ޑރ. ޝައުޤީއަކީ، ރައީސް މައުމޫނުގެ ފަހު ދައުރުގައި 2005 ވަނަ އަހަރުން 2008 ވަނަ އަހަރާއި ދެމެދު ރާއްޖޭގެ ޓޫރިޒަމް މިނިސްޓަރުގެ މަގާމު ފުރުއްވާފައިވާ ބޭފުޅެކެވެ.
