ޖުމްހޫރީ ޕާޓީ (ޖޭޕީ)ގެ ރިޔާސީ ކެންޑިޑޭޓް ޤާސިމް އިބްރާހިމްގެ ކެންޑިޑެސީ ފޯމު، އިލެކްޝަންސް ކޮމިޝަން (އީސީ) އަށް ހުށަހަޅުއްވައިފިއެވެ.
އެގޮތުން މިއަދު ހެނދުނު 9:00 ގައި ގާސިމްގެ ފޯމް އިލެކްޝަންސް ކޮމިޝަނަށް ހުށަހެޅުއްވުމުގެ އިވެންޓްގައި، މ. ކުނޫޒުން ގާސިމް އާއި އޭނާގެ ޓީމާއެކު ދަތުރު ފެށީ އިލެކްޝަންސް ކޮމިޝަންގެ އިންތިހާބީ މަރުކަޒު ދަރުބާރު ގެއަށް ހިންގަވާފައެވެ. ވަރަށް ފޯރިއާއި ޖޯޝްގައި، ޤާސިމް އާއި ޓީމް އެކުގައި ވަޑައިގެންނެވިއިރު، ގިނަބަޔަކު ތިބީ ޖޭޕީގެ ތޮފި އަޅައިގެން، ގައުމީ ދިދަވެސް ހިފައިގެންނެވެ. އަދި ޤާސިމަށް ތާޢީދުކޮށް އަޑުއުފުލަމުން ގެންދިޔައެވެ.
އިލްކްޝަންސް ކޮމިޝަންގެ ފަރާތުން އެ ފޯމާއި ހަވާލުވެވަޑައިގެންނެވީ އެ ކޮމިޝަންގެ ރައީސް ފުއާދު ތައުފީޤެވެ. އަދި ޤާސިމްގެ ފަރާތުން އެ ފޯމް އީސީއާ ހަވާލުކޮށްދެއްވީ ގާސިމެވެ. މި ރަސްމިއްޔާތުގާއި ގާސިމްގެ އިތުރުން، އޭނާގެ ރަނިންމޭޓް ޑރ. އަމީން އިބްރާހިމްގެ އިތުރުން، ޕާޓީގެ އިސް ބޭފުޅުންވެސް ބައިވެރިވެވަޑައިގެންނެވިކަން ފާހަގަކޮށްލެވެއެވެ.
ސެޕްޓެމްބަރު މަހު އޮންނަ ރިޔާސީ އިންތިހާބުގައި އެ ޕާޓީން ކެންޑިޑޭޓަކު ނެރެން ނިންމީ ޖޭޕީގެ 151 ވަނަ ކައުންސިލް ބައްދަލުވުމުގައެވެ. އަދި ޖޭޕީއާ އެކުގައި ކޯލިޝަން ހެދުމާ ގުޅޭ ގޮތުން ސިޔާސީ ޕާޓީތަކާއި ޖަމިއްޔާތަކާ މަޝްވަރާ ކުރުމަށް ވެސް ކައުންސިލުން ފާސްކުރިއެވެ. އަދި އޭގެ ފަހުން އިދިކޮޅު ޕާޓީތަކާއެކު ތަފާތު ބައްދަލުވުންތައް ކުރިއަށް ގެންގޮސްފައިވެއެވެ.
ރައީސް އިބްރާހީމް މުޙައްމަދު ޞާލިޙަށް ތާޢީދުކުރެއްވުމަށް، އެމްޑީޕީއިން ދަޢުވަތު ލިބުނު ކަމުގައި ވިޔަސް، ޖޭޕީއިން ނިންމެވީ، އެމްޑީޕީގެ ރިޔާސީ ކެންޑިޑޭޓަށް ތާޢީދު ނުކޮށް، ޖޭޕީއިން ވަކިން ނުކުންނާށެވެ.
ޖޭޕީގެ ރިޔާސީ ޓިކެޓު ގާސިމަށް އެރުވި މިއީ ތިން ވަނަ ފަހަރެވެ. މީގެ ކުރިން، 2008 ވަނަ އަހަރު ބޭއްވި ރިޔާސީ އިންތިހާބާއި 2013 ގެ ރިޔާސީ އިންތިހާބުގައި ވެސް ޖޭޕީގެ ރިޔާސީ ޓިކެޓު ދިނީ ޤާސިމަށެވެ. އެ ދެ އިންތިހާބުގައި ވެސް ޤާސިމަށް ދެވަނަ ބުރަށް ދެވޭ ވަރަށް ވޯޓު ލިބިފައެއް ނުވެއެވެ.
