ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު ހަމަވާން މަދު ވަގުތުކޮޅަކަށް ވެފައި ވަނިކޮށް، އިންތިހާބުގައި ވާދަކުރެއްވުމަށް އެމްޑީޕީގެ ކުރީގެ ރައީސް ޑރ. މުހައްމަދު މުނައްވަރު މިއަހަރުގެ ރިޔާސީ އިންތިޚާބަށް ކުރިމަތި ނުލައްވަން ނިންމަވައިފިއެވެ.
ކުރީގެ ރައީސް މައުމޫން އަބްދުލްޤައްޔޫމުގެ ވެރިކަމުގައި ބަންޑާރަ ނައިބުގެ މަޤާމު އަދާކުރެއްވި، އައްޑޫއަށް ނިސްބަތްވާ ޑރ. މުނައްވަރު. ރިޔާސީ އިންތިހާބުގައި ވާދަ ކުރައްވާކަން އިއުލާނު ކުރެއްވީ މިދިޔަ މާޗު 5، ގައެވެ.
އަމިއްލަ ގޮތުން ވާދަކުރެއްވުމަށް 1،500 މީހުންގެ ތާއީދު ސޮއި ހޯއްދެވުމުގެ މަސައްކަތް ވެސް މިދިޔަ މަހުން ފެށިގެން މުނައްވަރު ކުރައްވަމުން ގެންދެވިއެވެ. ނަމަވެސް މިއަދު ކުރެއްވި ޓްވީޓެއްގައި އޭނާ ވިދާޅުވީ ރިޔާސީ އިންތިޚާބުގައި ވާދަކުރެއްވުމުގެ ވިސްނުން ދޫކޮށްލައްވާފައިވާ ކަމަށެވެ.
We have decided not to continue with my candidacy. I thank all those who supported me, encouraged me and gave their signatures. I also thank all those who assisted me in the preparatory work
— Mohamed Munavvar (@MMunavvar) August 7, 2023
ރިޔާސީ އިންތިޚާބުގެ ޤާނޫނު ބުނާ ގޮތުން ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީއެއްގެ ޓިކެޓުގައި ވާދަކުރުމުގެ ބަދަލުގައި އަމިއްލަ ގޮތުން އެ އިންތިހާބަށް ވާދަކުރާނަމަ މަދުވެގެން 1،500 މީހުންގެ ސޮއި ހިމެނޭ ތާއީދު ފޯމުތައް އިލެކްޝަންސް ކޮމިޝަނަށް ހުށަހަޅަން ޖެހެއެވެ.
ސިޔާސީ ކަންކަމާ ދުރުގައި ހުންނެވުމަށްފަހު، މި އަހަރުގެ ކުރީކޮޅު ބޭއްވި އެމްޑީޕީގެ ރިޔާސީ ޕްރައިމަރީގެ ތެރެއިން ކުރީގެ ރައީސް މުހައްމަދު ނަޝީދު އަރިހުގައި އެމަނިކުފާނުގެ ކެމްޕޭނުގައި މުނައްވަރު އުޅުއްވިއެވެ.
އޭގެ ފަހުން، ފޯޅަވަހި ހިމެނޭހެން ޗާގޯސް ޖަޒީރާތަކަކީ މޮރިޝަސްގެ ބައެއް ކަމަށް ބަލައިގެން ރާއްޖެއާއި އެ ގައުމާ ދެމެދު ފުށުއަރާ ކަނޑުގެ ސަރަހައްދުގެ އިން ކަނޑައެޅި މައްސަލާގައި، ސަރުކާރުގެ ސްޓޭންޑާއި އިޓްލޮސްގެ ނިންމުމާ ދެކޮޅަށް އުފެއްދި އިއްތިހާދު ލީޑު ކުރެއްވުމުގައި ވެސް މުނައްވަރު ޙަރަކާތްތެރިވެ ވަޑައިގެންނެވިއެވެ.
