ކުރިއަށް އޮތް ރިޔާސީ އިންތިހާބުގައި އަމިއްލަ ކެންޑިޑޭޓެއްގެ ގޮތުގައި ވާދަކުރައްވާ، އަޙްމަދު ފާރިސް މައުމޫންއަށް ތާޢީދު ކުރައްވަން ކުރީގެ މިނިސްޓަރ އޮނަރަބަލް ޢަބްދުﷲ ކަމާލުއްދީން ނިންމަވައިފިއެވެ.
ޢަބްދުﷲ ކަމާލުއްދީން ފާރިސްއަށް ތާޢީދުކުރައްވައި ނެރުއްވި ވީޑިއޯ މެސެޖުގައި ވިދާޅުވީ، ކުރީގެ ސަރުކާރުގެ މެޖޯރިޓީ އޮއްވައި، ސަރުކާރުގެ މީހަކު މަޖިލީގެ ރިޔާސަތުގައި އިންދާ، ވަރަށް އުނދަގޫ މާހައުލެއްގައި، ވަރަށް އުނދަގޫ މަސައްކަތެއް، އޭރުގެ ސަރުކާރުގެ ނޭއްގާނީ ކަންކަމާ ދެކޮޅަށް ވަރަށް ކެތްތެރިކަމާއެކު ފާރިސް ކުރެއްވި ކަމަށެވެ. ފާރިސް ޚިޔާރު ކުރެއްވީ ރައްޔިތުންގެ ޚިދުމަތުގައި ދެމި ހުންނަވަން ކަމަށާއި، ފަސޭހަ މަގު އޮއްވައި ސްޓޭޓް މިނިސްޓަރ ކަން ދޫކުރައްވައި ޚިޔާރު ކުރެއްވީ އުނދަގޫ މަގު ކަމަށްވެސް ކަމާލުއްދީން ފާހަގަކުރެއްވިއެވެ. އެގޮތުން ދިއްގަރު ދާއިރާގެ ގޮނޑިއަށް އިންތިޚާބު ވެެވަޑައިގަންނަވާ ރައްޔިތުންނަށްޓަކައި އެތަކެއް މަސައްކަތްތަކެއް ކޮށްދެވިކަމަށެވެ.
އޭރު ސަރުކާރުގެ ނޭއްގާނީ ކަންކަމާ ދެކޮޅަށް ކުރެވުނު މަަސައްކަތްތަކު ތެރެއިން، ސިޔާސީ ލީޑަރުން އެއްގަލަށް އެރުއްްވުމުގައި އިސް ރޯލެއް އަދާކުރެއްވީ ފާރިސް ކަމަށް ވިދާޅުވެ، އެކަންކަން ވަރަށް ގާތުން ފެނިވަޑައިގެންނެވި ބޭފުޅެއްގެ ހައިސިއްޔަތުން ކަމާލުއްދީން ފާރިސް އަށް ވަރަށް ބޮޑަށް ތަޢުރީފްކުރެއްވިއެވެ. ފަހުން އެކަމުގެ ތެރެއިން ޖަލަށް ވަޑައިގަންނަވަން ޖެހިވަޑައިގެންނެވި ކަމަށާއި، ޖަލުގައި ހުންނެވި އިރު ފާރިސްގެ ކިބައިން ކެތްތެރިކަމުގެ ސިފަ ވަރަށް ބޮޑަށް ފެނިގެން ދިޔަ ކަމަށްވެސް ކަމާލުއްދީން ވިދާޅުވިއެވެ.
ކަމާލުއްދީން އިތުރަށް ވިދާޅުވީ، ލީޑރަޝިޕް ވަަރަށް ގިނަ ކޮލިޓީތަކެއް ފާރިސްގެ ކިބައިގައި އެބަހުރިކަމަށާއި އެމްއާރްއެމް އުފައްދަވައިގެން ކުރެއްވި މަސައްކަތްތަކުގެ ތެރެއިން، ވަރަށް ކެތްތެރިކަމާއެކު، އެހެން މީހުންގެ ވާހަކަތައް އަޑު އައްސަވައިގެން، ކޯފާވުމެއް ނެތި މަސައްކަތް ކުރެއްވިކަމަށެވެ.
ވަރަށް ތުއްޕުޅު އިރުއްސުރެ ފާރިސްގެ ކަންކަން ވަރަށް ގާތުން ފެންނަމުން އައިސްފައިވާ ކަމަށާއި، ޢާންމު ޚިދުމަތުގެ ރޮނގުން އެންމެ ފުރަތަމަ ފެނިވަޑައިގަތީ 2008 ވަނަ އަހަރު ޑީއާރްޕީގެ ތެރެއިން ކެމްޕެއިން ހިނގަމުން ދިޔަ ދުވަސްވަރު ކަމަށާއި، އޭރު ރައީސް މައުމޫންގެ ކެމްޕެއިން މެނޭޖަރުކަން ކުރެއްވިއިރު ވަރަށް ބޮޑަށް، ފާރިސްގެ އިދާރީ ހިންގުންތެރިކަން ފެނިވަޑައިގެންނެވިކަމަށް ކަމާލުއްދީން ވިދާޅުވިއެެވެ.
"ފާރިސް ހުނަރު ދެއްކެވި، ސިޔާސީ މައިދާނުގައި ލީޑަރޝިޕް ދެއްކެވި، ޢާއިލީ ޒިންމާ ނެންގެވި."
ކަމާލުއްދީން ވިދާޅުވިއެވެ.
ފާރިސްގެ ބައްޕާފުޅު، ރައީސް މައުމޫންގެ ކަންކަން ވަރަށް ގާތުން ބެއްލެވި، ޢާއިލީ ޒިންމާ ފުރިހަމައަށް ނެންގެވި ދަރިއެއްގެ ގޮތުގައި ފާހަގަކުރެވޭ ކަމަށްވެސް އެމަނިކުފާނު ވިދާޅުވިއެވެ.
"ފާރިސް އަކީ ޢިލްމީ ބޭފުޅެއް، ޒިންމާ އުފުލައްވާ ބޭފުޅެއް"
ކަމާލުއްދީނު ވިދާޅުވިއެވެ.ފާރިސްގެ ކިބައިިގައި ޤައުމުގެ ރިޔާސަތުގައި ހުންނަވާ ބޭފުޅެއްގެ ކިބައިގަައި ހުންނަންޖެހޭވަރަށް ގިނަ ރަނގަޅު ސިފަތައް ހުރުމާއެކު، ފާރިސްއަށް ވޯޓް ދެއްވުމަށް ކަމާލުއްދީން އެދިވަޑައިގެންނެވިއެވެ.
ފާރިސްގެ ކެމްޕެއިން ޙަރަކާތްތައް މިހާރު ފަށާފައިވާއިރު، އިއްޔެ މާލޭގެ އެކި ސަރަޙައްދުތަކަށް ވަޑައިގެން، ރައްޔިތުންނާ ބައްދަލުކުރައްވައި، ރައްޔިތުންގެ ޚިޔާލު އަޑުއައްސަވައި، ފާރިސްގެ ސިޔާސަތުތައް ހާމަކުރައްވަމުން ގެންދެވިއެވެ. އެގޮތުން މާލޭގެ ގެތަކަށް ވަޑައިގަތުމުގެ އިތުރުން އެކި ސަރަޙައްދުތަކުން ރައްޔިތުންނާއި ބަދަލުކުރައްވާފައިވެއެެވެ. މީގެއިތުރުން، ބަނދަރު މަތީގެ ސަރަޙައްދުތަކަށްވެސް ފާރިސް ވަނީ ވަޑައިގެންފައެވެ. އެމަނިކުފާނުގެ އަރިހުގައި ރަނިން މޭޓް، ޑރ އަބްދުއްސައްްތާރު ޔޫސުފާއި، އެމްއާރްއެމްގެ އިސް ފަރާތްތަކުން ވަނީ ބައިވެރިވެވަޑައިގެންފައެވެ.
